ដោយ៖ បូ សាវី | ថ្ងៃចន្ទ ទី25 ឧសភា 2015
http://vodhotnews.com
ស្តាប់សំឡេង៖ |
ចម្លងទុក |
សមត្ថកិច្ចចាប់វ៉ៃខ្នោះកម្មករអូសរទេះ ដែលធ្វើការតវ៉ានៅរសៀលថ្ងៃនេះ (រូបថត៖ ហ្វេសប៊ុក)
យ៉ាងហោចណាស់កម្មករអូសរទេះ ចំនួន៦នាក់ រងរបួសធ្ងន់ និងស្រាល ដោយសារការប៉ះទង្គិចគ្នារវាងកម្មករអូសរទេះ និងសមត្ថកិច្ចចម្រុះនៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ នៅរសៀលថ្ងៃចន្ទនេះ ។
កម្មករអូសរទេះមួយរូបក្នុងចំណោមកម្មករជាច្រើនទៀត លោក សឿង ប្រុស ប្រាប់ VOD នៅរសៀលថ្ងៃចន្ទនេះថា សមត្ថកិច្ចចម្រុះក្រុងប៉ោយប៉ែតជាច្រើននាក់ បានបង្ក្រាបការតវ៉ារបស់កម្មករអូសរទេះ ដោយប្រើកាំភ្លើងភ្ជង់ និងបាញ់គំរាមជាង១០គ្រាប់ ព្រមទាំងបានវាយកម្មករនឹងស្វ័យកាំភ្លើង បណ្ដាលឲ្យរបួសធ្ងន់ និងស្រាល ៦នាក់ ក្នុងនោះមានម្នាក់សន្លប់ ហើយត្រូវបានដឹកទៅសង្គ្រោះបន្ទាន់នៅមន្ទីរពេទ្យភ្លាមៗ ទាំងដៃជាប់ខ្នោះ ។
លោក សឿង ប្រុស បន្តថាការធ្វើបាតុកម្មរបស់កម្មករអូសរទេះទាំងនោះ គឺដើម្បីទាមទារឲ្យមេគយ ឈ្មោះ ឈុន ហៃ ដែលទើបឡើងថ្មី ដោះស្រាយបញ្ហាយកប្រាក់ពីពួកគេ ។ លោកថា «មិនចង់មានបញ្ហាអំពើហិង្សាទេ គឺគាត់គ្រាន់តែទាមទារ ប្រទាញប្រទង់រទេះពួកខ្ញុំដាក់ឲ្យបិទជិតផ្លូវដើម្បីរកដំណោះស្រាយ ប៉ុន្តែគាត់ប្រើហិង្សាមកលើ គឺយកខ្នោះមកដាក់ ជាន់ក បីបួននាក់ភ្ជង់កាំភ្លើងវ៉ៃពួកខ្ញុំ ពួកខ្ញុំអត់បានត្រូវទេ គឺគ្នាខ្ញុំប៉ុន្មាននាក់នោះឥឡូវរត់ទៅបាត់ហើយ ដោយសារពួកគាត់បាញ់មួយប្រាវហ្នឹង» ។
កម្មករម្នាក់ទៀត លោក សន វាសនា ឲ្យដឹងផងដែរថា ការធ្វើបាតុកម្មរបស់ក្រុមកម្មករទាំងអស់នោះ គឺដើម្បីទាមទារឲ្យគយបញ្ចុះតម្លៃទំនិញ និងឲ្យនគរបាលអន្ដោប្រវេសន៍ ឈប់យកថ្លៃចេញចូលប្រទេសថៃ ចំពោះអ្នកនៅក្នុងក្រុងប៉ោយប៉ែត ។ លោកថា អភិបាលក្រុងប៉ោយប៉ែត និងអភិបាលខេត្ដឲ្យបន្ធូរបន្ថយការយកលុយពួកគេឆ្លងដែនដឹកទំនិញ ប៉ុន្ដែក្រុមសមត្ថកិច្ចគយ និងសមត្ថកិច្ចពាក់ព័ន្ធមិនអនុវត្ដ ។ លោកថា «វាកើតឡើងមួយសាទៅពីរសាហើយ ដល់ពេលចំណាត់ការគាត់បានធ្វើតែមួយចំនួនតូចទេ ដល់ពេលមួយរយៈពេលខ្លី ដល់អ៊ីចឹងគាត់បែរជាឃុបឃិតជាមួយឈ្មួញធំៗ ដូចជាអ្នកស្រី ថោង ឡេង ឬមួយឈ្មួញធំៗចាប់តែឥវ៉ាន់ដូចៗ ដើម្បីកុំធ្វើឲ្យកម្មករមិនមានឥវ៉ាន់ដឹក» ។
អភិបាលក្រុងប៉ោយប៉ែត ង៉ោ ម៉េងជ្រួន ឲ្យ VOD ដឹងថា កម្មករអូសរទេះនៅច្រកអន្តរជាតិប៉ោយប៉ែត ប្រមាណ១០០នាក់ បានធ្វើបាតុកម្មតាំងពីម៉ោង៨ព្រឹក ដល់ម៉ោង១២ថ្ងៃត្រង់ បង្កឲ្យមានការកកស្ទះចរាចរណ៍ និងប៉ះពាល់សណ្ដាប់ធ្នាប់សាធារណៈ ។ លោកបន្ដថា ដើម្បីសម្រួលការកកស្ទះចរាចរណ៍នោះ សមត្ថកិច្ចបានបំបែកការតវ៉ា បណ្ដាលឲ្យកម្មករម្នាក់រងរបួសធ្ងន់ ហើយត្រូវដឹកទៅសង្គ្រោះបន្ទាន់នៅមន្ទីរពេទ្យ ។ លោក ង៉ោ ម៉េងជ្រួន បន្ថែមថា ក្រោយពេលមានកម្មកររងរបួស មានពាក្យចចាមអារ៉ាមថា កម្មករម្នាក់បានស្លាប់ក្នុងការប៉ះទង្គិចនោះ ជាហេតុធ្វើឲ្យកម្មករផ្ទុះកំហឹង ហើយនាំគ្នាប្រើដុំថ្មគប់ទៅលើសមត្ថកិច្ច បណ្ដាលឲ្យកងកម្លាំងបីនាក់រងរបួស ។ លោកថា «អ៊ីចឹងវាឈានដល់កម្លាំងសមត្ថកិច្ចចាប់ផ្តើមអនុវត្តនីតិវិធីផ្លូវច្បាប់ អ៊ីចឹងអ្នកណាដែលប្រើអំពើហិង្សា ពីព្រោះប្រជាពលរដ្ឋមួយចំនួន គាត់អត់បានប្រើអំពើហិង្សាទេ អ៊ីចឹងប្រើអំពើហិង្សាតែបុគ្គលមួយចំនួនតូច អ៊ីចឹងឲ្យបុគ្គលនោះ គាត់ទទួលខុសត្រូវចំពោះមុខច្បាប់ ក្រោយពីគេបានរកឃើញថា គាត់ជាអ្នកដៃដល់ គាត់ជាអ្នកប្រើអំពើហិង្សា ព្រោះមានភស្តុតាងទាំងអស់ រូបភាព ។ អ៊ីចឹងទេ ខ្ញុំគ្រាន់តែសុំបញ្ជាក់ប៉ុណ្ណឹង» ។
អ្នកសម្របសម្រួលអង្គការការពារសិទ្ធិមនុស្សអាដហុក ខេត្ដបន្ទាយមានជ័យ លោក ស៊ុំ ចាន់គា យល់ថា ការប្រើហឹង្សាមកលើក្រុមអ្នកតវ៉ានេះជារឿងខុសច្បាប់ ខណៈដែលពួកគាត់ធ្វើឡើងគ្រាន់តែចង់រកកម្រៃមួយដើម្បីផ្គត់ផ្គង់គ្រួសារប៉ុណ្ណោះ ។ លោកថា ក្រុមកម្មករផ្ទុះការតវ៉ាញឹកញាប់កន្លងមកនោះ ដោយសារអាជ្ញាធរ និងមន្ដ្រីជំនាញមិនអនុវត្ដតាមការសន្យា ។
សូមរំឭកថា នៅខែមករាដើមឆ្នាំ២០១៥នេះ កម្មករអូសរទេះជាង៣០០នាក់ នៅក្រុងប៉ោយប៉ែត បានតវ៉ាទាមទារឲ្យពន្ធដារគយច្រកប៉ោយប៉ែតបន្ធូរបន្ថយការយកពន្ធសម្រាប់កម្មករអូសរទេះ ប៉ុន្តែការតវ៉ានោះត្រូវបានកម្លាំងសមត្ថកិច្ចបង្ក្រាប ៕
ជនរងគ្រោះជនកម្មករអូសរទេះ ដែលចូលរួមក្នុងការតវ៉ា ត្រូវបានបញ្ជូនទៅកាន់មន្ទីរពេទ្យ
សូមសរសេរមកលោក បូ សាវី តាមរយៈ savy@vodhotnews.com