ដោយ៖ ទូច សុខា | ថ្ងៃអង្គារ ទី26 ឧសភា 2015
http://vodhotnews.com
លោក មាជ សុវណ្ណារ៉ា (ស្ដាំ) និងលោក អ៊ុក ពេជ្រសំណាង ពេលចេញពីសវនាការកាលពីថ្ងៃអង្គារសប្ដាហ៍មុន (រូបភាព៖ ទេព សូនី)
សាលាដំបូងរាជធានីភ្នំពេញនៅព្រឹកថ្ងៃអង្គារនេះ បន្តការសាកសួរបន្ថែមលើលោក មាជ សុវណ្ណារ៉ា និងសកម្មជន ព្រមទាំងអ្នកគាំទ្រគណបក្សសង្គ្រោះជាតិផ្សេងទៀត ពាក់ព័ន្ធនឹងករណីហិង្សានៅជិតទីលានប្រជាធិបតេយ្យ កាលពីខែកក្កដា ឆ្នាំ២០១៤ កន្លងទៅ ។
សវនាការសាកសួរនៅថ្ងៃនេះជាការសាកសួរបន្ត បន្ទាប់ពីតុលាការធ្វើការសាកសួរបានតែសកម្មជនចំនួន៥នាក់ ក្នុងចំណោម១១នាក់ ដែលខ្លួនកោះហៅចូលបំភ្លឺកាលពីថ្ងៃអង្គារសប្ដាហ៍មុន ។ សកម្មជនគណបក្សសង្គ្រោះជាតិចំនួន៥នាក់នោះរួមមានលោក អ៊ុក ពេជ្រសំណាង លោក អឿ ណារិទ្ធ លោក ឃិន ជំរឿន លោក កែ ឃីម និងលោក សាន សីហៈ ។
មេធាវីរបស់គណបក្សសង្គ្រោះជាតិគឺលោក ជូង ជូងី ឲ្យVODដឹងថា លោក មាជ សុវណ្ណារ៉ា និងសកម្មជនផ្សេងទៀតបានចូលខ្លួនបំភ្លឺថ្ងៃនេះ តាមការកោះហៅរបស់តុលាការ ។
យោងតាមដីកាកោះហៅរបស់ព្រះអាជ្ញារងសាលាដំបូងរាជធានីភ្នំពេញ លោក កែវ សុជាតិ កន្លងមក សកម្មជន និងអ្នកគាំទ្រគណបក្សសង្គ្រោះជាតិដែលត្រូវបានកោះហៅទាំង១១នាក់រួមមាន លោក មាជ សុវណ្ណារ៉ា លោក ស៊ុំ ពុទ្ធី លោក ទេព ណារិន លោក អ៊ុក ពេជ្រសំណាង និងលោក កែ ឃីម ជាដើម ។
គួរបញ្ជាក់ថា លោក មាជ សុវណ្ណារ៉ា និងសកម្មជនគណបក្សសង្គ្រោះជាតិផ្សេងទៀត ត្រូវបានអាជ្ញាធរចាប់ខ្លួន ក្នុងករណីហិង្សាលើសន្តិសុខខណ្ឌដូនពេញ នៅជិតទីលានប្រជាធិបតេយ្យកាលពីថ្ងៃទី១៥ ខែកក្កដា ឆ្នាំ២០១៤ កន្លងទៅ ។ នៅថ្ងៃទី១៣ ខែមេសា ឆ្នាំ២០១៥ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិផ្សេងទៀត ព្រមទាំងព្រះសង្ឃ៣អង្គ ត្រូវបានដោះលែងឲ្យនៅក្រៅឃុំបណ្តោះអាសន្ន ៕
សូមសរសេរមកលោក ទូច សុខា តាមរយៈ sokha@vodhotnews.com