ដោយ៖ យ៉ា រសាត់ | ថ្ងៃអង្គារ ទី26 ឧសភា 2015
http://vodhotnews.com
រដ្ឋាភិបាលសម្រេចដំឡើងប្រាក់ឧបត្ថមប្រចាំខែដល់សមាជិក និងប្រធានក្រុមប្រឹក្សាឃុំ សង្កាត់ នៅទូទាំងប្រទេស ទៅតាមតួនាទី និងឋានៈរបស់ខ្លួន ពី ៣៥០ ០០០ រៀល ដល់៥៧០ ០០០រៀល ចាប់ពីខែកក្កដា ឆ្នាំ២០១៥ តទៅ ។
អនុក្រឹត្យចុះថ្ងៃទី២៥ ខែឧសភា ឆ្នាំ២០១៥ ចុះហត្ថលេខា ដោយលោកនាយករដ្ឋមន្ដ្រី ហ៊ុន សែន ឲ្យដឹងថា ប្រធានក្រុមប្រឹក្សា និងជាមេឃុំ ឬចៅសង្កាត់ ក្នុងមួយនាក់ទទួលបានប្រាក់ឧបត្ថមចំនួន ៥៧០ ០០០រៀល និងជំទប់ទី១ ជំទប់ទី២ ឬចៅសង្កាត់រងទី១ និងចៅសង្កាត់រងទី២ ក្នុងមួយនាក់ៗទទួលបានចំនួន ៤០០ ០០០រៀលក្នុងមួយខែ ។ ចំណែក សមាជិកក្រុមប្រឹក្សាឃុំសង្កាត់ផ្សេងៗទៀតដែលមិនស្ថិតនៅក្នុងមុខតំណែងខាងលើ ក្នុងមួយនាក់ៗ ទទួលបាន ៣៥០ ០០០រៀល ក្នុងមួយខែ។
អនុក្រឹត្យដដែលបន្ដថា ការផ្ដល់ប្រាក់ឧបត្ថម្ភនេះត្រូវចាប់ផ្ដើមអនុវត្ដចាប់ពីខែកក្កដា ឆ្នាំ២០១៥ ហើយសម្រាប់តែមន្ដ្រីក្រុមប្រឹក្សាឃុំសង្កាត់ដែលកំពុងស្ថិតនៅក្នុងមុខតំណែងប៉ុណ្ណោះ ។
គួរបញ្ជាក់ថា បច្ចុប្បន្ន ប្រធានក្រុមប្រឹក្សា និងជាមេឃុំ ឬចៅសង្កាត់ទទួលបានប្រាក់ឧបត្ថម្ភប្រចាំខែចំនួន៤០ម៉ឺនរៀល ជំទប់ឃុំទទួលបាន៣៥ម៉ឺនរៀល និងសមាជិកក្រុមប្រឹក្សា ទទួលបាន៣០ម៉ឺនរៀល ៕
សរសេរមកកាន់ លោក យ៉ា រសាត់ តាមរយៈ rorsart@vodhotnews.com