ដោយ៖ ឡាយ សាមាន | ថ្ងៃចន្ទ ទី1 មិថុនា 2015
http://vodhotnews.com
កុមារធ្វើការនៅសិប្បកម្មផលិតឥដ្ឋ នៅកម្ពុជា (រូបថតពីអង្គការលីកាដូ)
ភាគីពាក់ព័ន្ធអំពាវនាវរួមគ្នា ឲ្យលុបបំបាត់រាល់ទម្រង់ពលកម្មលើកុមារ ដោយត្រូវបញ្ចៀសការប្រើប្រាស់កម្មករក្រោមអាយុ១៥ឆ្នាំ ដើម្បីលើកកម្ពស់សិទ្ធិជាមូលដ្ឋានរបស់កុមារ និងធានាដល់ការគោរពច្បាប់ ។
ការអំពាវនាវនេះ ធ្វើឡើងចំពេលទិវាសិទ្ធិកុមារអន្តរជាតិខួបលើកទី៦៦ នៅថ្ងៃនេះ និងទិវាពិភពលោកប្រឆាំងពលកម្មកុមារខួបលើកទី១៤ ដែលនឹងចូលមកដល់នៅថ្ងៃទី១២ ខែមិថុនាខាងមុខ ។
សេចក្តីថ្លែងការណ៍របស់អង្គការលីកាដូ កាលពីម្សិលមិញ រកឃើញថា អនីតិជន ត្រូវបានគេវាយដំ ទះ និងទាត់ដោយអ្នកជាប់ពន្ធនាគារផ្សេងទៀត ហើយពេលខ្លះនៅក្រោមការបញ្ជាពីឆ្មាំពន្ធនាគារ ប៉ុន្តែអ្នកទាំងនោះមិនមានកិច្ចការពារ ឬយន្តការដែលមានប្រសិទ្ធភាព ដើម្បីអនុញ្ញាតឲ្យមានការប្តឹងប្រឆាំងការធ្វើទារុណកម្ម និងការធ្វើបាបនោះទេ ។ តាមរយៈសេចក្តីថ្លែងការណ៍នេះ លីកាដូ អំពាវនាវដល់រដ្ឋាភិបាល បង្កើតនូវប្រព័ន្ធយុត្តិធម៌សម្រាប់អនីតិជនដែលជាប់ឃុំ ដាច់ដោយឡែកពីអ្នកទោសពេញវ័យ ។
ដោយឡែក សេចក្តីប្រកាសព័ត៌មានរបស់សមាគមរោចក្រកាត់ដេរនៅកម្ពុជា(GMAC) ដែលចេញផ្សាយកាលពីថ្ងៃទី២៨ ខែឧសភា បានលើកឡើងថា បើរោងចក្រកាត់ដេរ យកកម្មករក្រោមអាយុ១៥ឆ្នាំធ្វើការ ជាអំពើខុសច្បាប់ ។ ករណីនេះ GMAC ក្រើនរំឭកសមាជិករបស់ខ្លួន ត្រូវចាត់វិធានការតាមតែអាចធ្វើទៅបាន ដើម្បីធានាដល់ការគោពច្បាប់ ។
យ៉ាងណាក៏ដោយ លិខិតជូនពរភ្ជាប់នឹងការអំពាវនាវរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី២៦ ខែឧសភា បានអំពាវនាវឲ្យលុបបំបាត់រាល់ទម្រង់លើពលកម្មកុមារ និងធានាឲ្យកុមារទទួលបានការអប់រំ ដើម្បីលើកកម្ពស់សិទ្ធិជាមូលដ្ឋានរបស់កុមារ ។
ប៉ុន្តែអនុប្រធានកម្មវិធីផ្នែកសិទ្ធិស្ត្រី និងកុមារ នៃសមាគមអាដហុក លោកស្រី លឹម មុន្នី សម្តែងការគាំទ្រចំពោះការអំពាវនាវនេះ តែលោកស្រីថា គួរមានវិធានការណាមួយឲ្យមានប្រសិទ្ធភាពជាជាងការអំពាវនាវតាមរយៈលិខិតនេះ ។ លោកស្រីយល់ថា មូលហេតុដែលនៅតែមានពលកម្ម និងពេស្យាចារកុមារ ដោយសារកត្តាក្រីក្រ ខ្វះការអប់រំ និងការអនុវត្តច្បាប់មិនសូវមានប្រសទិដ្ឋភាពជាដើម ។
កាលពីឆ្នាំ២០១៤ របាយការណ៍របស់អង្គការអន្តរជាតិផ្នែក (ILO) រកឃើញថា កម្មករមិនទាន់គ្រប់អាយុមានចំនួន៣៤នាក់ នៅក្នុងរោងចក្រចំនួន១៥កន្លែង ដែលចំនួននេះ មានការធ្លាក់ចុះជាងឆ្នាំ២០១៣ ដែលមានកម្មករមិនទាន់គ្រប់អាយុរហូតដល់៦៤នាក់ នៅក្នុងរោងចក្រចំនួន២៤កន្លែង។ របាយការណ៍បន្តថា ករណីនេះ ភាគច្រើនកម្មករទាំងនោះបានកុហកតាមរយៈការប្រើប្រាស់ឯកសារបន្លំ ឬកោសលុបប្តូរ ឬក៏ក្លែងជាអ្នកដទៃ ដែលមានអាយុច្រើនជាងខ្លួន ធ្វើយ៉ាងណាដើម្បីទទួលបានការងារដើម្បីជួយដល់គ្រួសារ ៕
សូមសរសេរមកលោក ឡាយ សាមាន តាមរយៈ samean@vodhotnews.com