ដោយ៖ ញឹម សុខន | ថ្ងៃចន្ទ ទី1 មិថុនា 2015, 04:53 PM
http://vodhotnews.com
ស្តាប់សំឡេង៖ |
ចម្លងទុក |
បក្សប្រឆាំងអំពាវនាវឲ្យរាជរដ្ឋាភិបាល ត្រូវបង្ហាញពីតម្លាភាពក្នុងការធ្វើសេចក្តីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល រួមទាំងច្បាប់មួយចំនួនទៀត មុននឹងបញ្ជូនទៅរដ្ឋសភាពិភាក្សា និងអនុម័ត ដើម្បីធានាថា ការតាក់តែងច្បាប់នោះមិនរារាំងដល់ដំណើរការលទ្ធិប្រជាធិបតិយ្យ ។
តាមសេចក្តីថ្លែងការណ៍របស់គណបក្សសង្គ្រោះជាតិ ចុះថ្ងៃទី១ ខែមិថុនា ឆ្នាំ២០១៥នេះ បានអំពាវនាវទៅរាជរដ្ឋាភិបាលឲ្យបើកចំហ និងតម្លាភាពក្នុងដំណើរការលើសេចក្តីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល ។
គណបក្សសង្គ្រោះជាតិបញ្ជាក់ថា ការស្នើនេះដើម្បីបង្កលក្ខណៈងាយស្រួល ឲ្យមានការចូលរួមផ្ដល់យោបល់ពីប្រជាពលរដ្ឋខ្មែរ និងភាគីពាក់ព័ន្ធជាពិសេសសមាគម និងអង្គការមិនមែនរដ្ឋាភិបាលទាំងក្នុងស្រុក និងបរទេស ដែលជាក្រុមផលប្រយោជន៍ផ្ទាល់ តាមរយៈការរៀបចំវេទិកាពិគ្រោះយោបល់សាធារណៈ នៅមុនពេលសេចក្ដីព្រាងច្បាប់នេះបញ្ជូនទៅរដ្ឋសភា ដើម្បីពិភាក្សា និងអនុម័ត ។
ការអំពាវនាវរបស់បក្សប្រឆាំងមួយនេះ ធ្វើឡើងភ្លាមៗបន្ទាប់ពីលោក កឹម សុខា បានជួបជាមួយឧបការីរងក្រសួងការបរទេសសហរដ្ឋអាមេរិក ទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ លោក Scott Busby នៅស្ថានទូតអាមេរិកនាព្រឹកថ្ងៃទី១ ខែមិថុនានេះ ។
អនុប្រធានគណបក្សសង្គ្រោះជាតិ លោក កឹម សុខា សរសេរនៅលើបណ្តាញសង្គមផ្ទាល់ខ្លួនរបស់លោកនៅថ្ងៃចន្ទនេះបញ្ជាក់ថា ក្នុងជំនួបនោះ ភាគីទាំងពីរបានពិភាក្សាគ្នាអំពី ដំណើរការលទ្ធិប្រជាធិបតេយ្យ និងសិទ្ធិមនុស្សនៅកម្ពុជា ជាពិសេសផ្ដោតលើសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល ច្បាប់ស្ដីពីឧក្រិដ្ឋកម្មព័ត៌មាន និងច្បាប់ស្ដីពីសហជីព ។
យ៉ាងណាក៏ដោយ លោក កឹម សុខា មិនបញ្ជាក់ថា ក្នុងជំនួបនោះ មន្ត្រីរបស់សហរដ្ឋអាមេរិកដែលចូលជួបនោះបានបង្ហាញជំហរ ចង់ឃើញយ៉ាងម៉េចពីខ្លឹមសារនៃសេចក្តីព្រាងច្បាប់ទាំង៣នោះទេ ។
ចំណែកប្រធានខុទ្ទកាល័យរបស់លោក កឹម សុខា គឺលោក ម៉ុត ចន្ថា បានអះអាងថា លោកមិនអាចប្រកាសជាសាធារណៈពីការជំរុញបែបណារបស់មន្ត្រីអាមេរិកនោះបានទេ ដោយគ្រាន់តែបញ្ជាក់ថា ក្នុងជំនួបនោះបានពិភាក្សាពីសិទ្ធិមូលដ្ឋាន និងដំណើរការលទ្ធិប្រជាធិបតេយ្យ ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា ការដែលបក្សប្រឆាំងចង់បានបែបនេះ ឬបែបនោះ ហើយរិះគន់រដ្ឋាភិបាលថា ធ្វើនេះមិនត្រូវ ឬធ្វើបែបនេះមិនល្អ លោកចាត់ទុកថាជាទម្លាប់របស់បក្សប្រឆាំង ។ ប៉ុន្តែលោកអះអាងថា អ្វីដែលរដ្ឋាភិបាលបានធ្វើជាការទទួលខុសត្រូវខ្ពស់ និងបើកឲ្យមានកិច្ចពិភាក្សា ដោយបើកចំហរួចហើយ ។
សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ត្រូវលោកនាយករដ្ឋមន្ត្រី ហ៊ុន សែន ជំរុញស្ថាប័នជំនាញរបស់ខ្លួន ពន្លឿនឲ្យបញ្ចប់ត្រឹមខែឧសភាឆ្នាំ២០១៥នេះ ដើម្បីបញ្ជូនទៅឲ្យរដ្ឋសភាពិនិត្យនិងអនុម័ត ទាំងមិនផ្សព្វផ្សាយជាសាធារណៈនូវខ្លឹមសារសេចក្តីព្រាងច្បាប់ចុងក្រោយ ឲ្យដៃគូពាក់ព័ន្ធបានពិគ្រោះយោបល់ និងពិភាក្សា ។
ករណីនេះត្រូវបានអង្គការសង្គមជាតិ និងអន្តរជាតិ រួមទាំងអង្គការប្រជាជាតិផង ព្រួយបារម្ភថា ច្បាប់នោះនឹងបង្កការលំបាក ដល់សកម្មភាពនៃដំណើរការលទ្ធិប្រជាធិបតេយ្យ និងប៉ះពាល់ដល់សិទ្ធិមូលដ្ឋានជាដើម ហើយជំរុញឲ្យរដ្ឋាភិបាល បើកចំហពីការចូលរួមផ្ដល់មតិយោបល់ពីសង្គមស៊ីវិលដែលពាក់ព័ន្ធ ដើម្បីជំរុញឲ្យច្បាប់នោះធានាដល់ផលប្រយោជន៍សាធារណៈ តាមស្មារតីរដ្ឋធម្មនុញ្ញ និងកតិកាសញ្ញាអន្តរជាតិ ៕
សូមសរសេរមកលោក ញឹម សុខន តាមរយៈ sokhorn@vodhotnews.com