ដោយ៖ ទូច សុខា | ថ្ងៃចន្ទ ទី1 មិថុនា 2015
http://vodhotnews.com
ការធ្វើចរាចរណ៍លើផ្លូវ២០០៤នាព្រឹកថ្ងៃចន្ទនេះ (រូបភាព៖ ទេព សូនី)
សាលារាជធានីភ្នំពេញបញ្ឈប់ការការយកកម្រៃបញ្ឈប់ការយកម្រៃសេវាពីរថយន្តដែលឆ្លងកាត់ផ្លូវ២០០៤ និងផ្លូវ៣៧១ (ផ្លូវសឡា) ក្នុងសង្កាត់ ទឹកថ្លា ខណ្ឌសែនសុខ ចាប់ពីថ្ងៃចន្ទនេះតទៅ បន្ទាប់ពីទទួលបានការអនុញ្ញាតពីលោកនាយករដ្ឋមន្ត្រី ហ៊ុន សែន ។
សេចក្ដីជូនដំណឹងរបស់សាលារាជធានីភ្នំពេញកាលពីថ្ងៃទី៣១ ខែឧសភា ឆ្នាំ២០១៥ ឲ្យដឹងថា ដោយពិនិត្យឃើញស្ថានភាពចរាចរណ៍នៅលើកំណាត់ផ្លូវទាំងពីរកាន់តែមានភាពមមាញឹក និងដោយប្រជាពលរដ្ឋរស់នៅតាមដងផ្លូវកាន់តែច្រើនកុះករ លោកនាយករដ្ឋមន្ត្រី ហ៊ុន សែន បានសម្រេចឲ្យសាលារាជធានីភ្នំពេញបញ្ឈប់កិច្ចសន្យាយកកម្រៃសេវាលើលើរថយន្តគ្រប់ប្រភេទដែលឆ្លងកាត់លើផ្លូវទាំងពីរនេះចាប់ពីថ្ងៃទី០១ ខែមិថុនា ឆ្នាំ២០១៥ នេះតទៅ ។
សេចក្តីជូនដំណឹងឲ្យដឹងដែរថា កាលពីពេលកន្លងទៅសាលារាជធានីភ្នំពេញ បានចុះកិច្ចសន្យាវិនិយោគ BOT ជាមួយក្រុមហ៊ុនសឡាអិនវ៉េសមែនគ្រុប ដោយតម្រូវឲ្យរថយន្តគ្រប់ប្រភេទ ដែលធ្វើចរាចរណ៍លើផ្លូវទាំងពីរនេះបង់ថវិកា ដើម្បីឲ្យក្រុមហ៊ុនយកទុននេះមកធ្វើការអភិវឌ្ឍ កែលម្អ ជួសជុល និងថែទាំផ្លូវទាំងនេះ ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា សាលារាជធានីភ្នំពេញបានមើលឃើញថាចរាចរណ៍នៅលើផ្លូវទាំងពីរនេះមានសភាពមមាញឹក និងជាពិសេសផ្លូវ២០០៤ ជាផ្លូវមួយដែលអាចជួយរំលែកលំហូរចរចារណ៍ពីផ្លូវសហព័ន្ធរុស្សីបានផងនោះ ទើបសាលារាជធានីភ្នំពេញបានសុំគោលការទៅរដ្ឋាភិបាលឲ្យបញ្ចប់កិច្ចសន្យាជាមួយក្រុមហ៊ុនសឡាអិនវ៉េសមែនគ្រុប និងដាក់ឲ្យប្រជាពលរដ្ឋប្រើប្រាស់ដោយឥតបង់ថ្លៃ ។
លោកបន្ថែមថា «អញ្ចឹងទេបានជាយើងស្នើសុំគោលការណ៍ទៅកាន់រាជរដ្ឋាភិបាល ហើយសម្តេចតេជោ ក៏លោកបានឯកភាពឲ្យសាលារាជធានីភ្នំពេញបញ្ចប់កិច្ចសន្យាជាមូយក្រុមហ៊ុន ដើម្បីធ្វើយ៉ាងម៉េចយកផ្លូវហ្នឹងមកគ្រប់គ្រងខ្លួនឯងវិញ ដាក់លូ ធ្វើផ្លូវ ឲ្យស្របតាមស្តង់ដារបច្ចេកទេស ពង្រីកផ្លូវ ពង្រីកអីហើយ ចុងក្រោយដាក់ផ្លូវហ្នឹងឲ្យប្រជាពលរដ្ឋប្រើប្រាស់ដោយឥតបង់ថ្លៃ» ។
លោក ឡុង ឌីម៉ង់ បញ្ជាក់ថា សាលារាជធានីភ្នំពេញបានបញ្ចប់កិច្ចសន្យាជាមួយក្រុមហ៊ុននេះមុនពេលកំណត់ តែលោកមិនបានចាំថានៅប៉ុន្មានឆ្នាំទៀតនោះទេ។ លោកថា សាលារាជធានីនឹងធ្វើការប៉ះប៉ូវជូនភាគីក្រុមហ៊ុនវិញ តែលោកមិនទាន់អាចបញ្ជាក់បានថាត្រូវផ្តល់សំណងប៉ុន្មាននោះទេ ៕
សូមសរសេរមកកាន់លោក ទួច សុខា តាមរយៈ sokha@vodhotnews.com