ដោយ៖ ឡាយ សាមាន | ថ្ងៃចន្ទ ទី1 មិថុនា 2015, 05:29 PM
http://vodhotnews.com
ស្តាប់សំឡេង៖ |
ចម្លងទុក |
អាជ្ញាធរជាតិអប្សរា ច្រានចោលការចោទប្រកាន់ថា ខ្លួនមិនបានអនុវត្តតាមអនុក្រឹត្យរបស់រដ្ឋាភិបាល ក្នុងការកាត់ដីចេញពីបុរីសណ្ឋាគារអង្គរសៀមរាប ចែកជូនប្រជាពលរដ្ឋមួយចំនួននៅខេត្តសៀមរាប ។
ការច្រានចោលនេះ បន្ទាប់ពីព័ត៌មានក្នុងស្រុកបានចុះផ្សាយថា អាជ្ញាធរជាតិអប្សរាមិនបានអនុវត្តតាមខ្លឹមថាអនុក្រឹត្យលេខ៥១ ស្តីពីការកាត់ផ្ទៃដីទំហំសរុប ១១៥,៤១ហិកតា និងអនុក្រឹត្យលេខ ៥២ ស្តីពីការកាត់ផ្ទៃដីសរុប ១១១,៤៩ហិកតា ចេញពីបុរីសណ្ឋាគារអង្គរសៀមរាប ដើម្បីធ្វើប្រទានកម្មជាកម្មសិទ្ធិជូនប្រជាពលរដ្ឋដែលបានកាន់កាប់ប្រើប្រាស់ និងដាំដុះជាក់ស្តែងនៅទីនោះ ។
សេចក្តីបំភ្លឺរបស់អាជ្ញាធរជាតិអប្សរា ចុះថ្ងៃទី៣១ ខែឧសភា បានចាត់ទុកការចោទប្រកាន់នោះថា គ្មានមូលដ្ឋានក្នុងន័យបម្រើផលប្រយោជន៍ក្រុមជនឆ្លៀតឱកាស និងជាចេតនាអាក្រក់របស់ឈ្មួញដី ។
អាជ្ញាធរជាតិអប្សរាអះអាងទៀតថា បន្ទាប់ពីទទួលបានអនុក្រឹត្យ ខ្លួនបានសហការជាមួយសាលាខេត្តសៀមរាប ក្នុងការរៀបចំវាស់វែងដីធ្លី ចែកជូនប្រជាពលរដ្ឋរស់នៅភូមិចុងកៅស៊ូ សង្កាត់ស្លក្រោម ភូមិព្រៃគុយណ ភូមិគោកចាន់ សង្កាត់អម្ពិល ក្រុងសៀមរាប ខេត្តសៀមរាប ។
យ៉ាងណាក៏ដោយ ពលរដ្ឋដែលរស់នៅភូមិព្រៃគុយ សង្កាត់អម្ពិល អ្នកស្រី យិន សុគន្ធា ដែលមានទំហំផ្ទៃដីក្បាល ២០គុណ៣០ម៉ែត្រ ប្រាប់ VOD ថា រហូតត្រឹមថ្ងៃទី០១ មិថុនានេះ គាត់មិនទាន់ឃើញអាជ្ញាធរណា ចុះវាស់វែងដីជូនប្រជាពលរដ្ឋតាមអនុក្រឹត្យរបស់លោក ហ៊ុន សែន ទេ ។ អ្នកស្រីបន្តថា នៅពេលពួកគាត់ចូលទៅធ្វើរបងលើដីនោះ ខាងអាជ្ញាមិនអនុញ្ញាតឲ្យពួកគាត់សាងសង់ឡើយ ។
ពលរដ្ឋម្នាក់ទៀតអ្នកស្រី ចាន់ សូលីដា អះអាងរស់នៅតំបន់នោះតាំងពីឆ្នាំ១៩៩៤ ដែលមានផ្ទៃដី ៨០ម៉ែត្រគុណនឹង១០០អះអាងថា បន្ទាប់ពីរដ្ឋាភិបាលចេញអនុក្រឹត្យកាត់ដីជូនប្រជាពលរដ្ឋមក អាជ្ញាជាតិអប្សរាមិនទាន់ចុះវាស់ដីជូនពលរដ្ឋនោះទេ ថែមទាំងយកគ្រឿងចក្រឈូសឆាយ ហើយហ៊ុមព័ទ្ធរបងមិនឲ្យពលរដ្ឋចូលទៅតំបន់នោះទៀតផង ។ អ្នកស្រីអំពាវនាវឲ្យអាជ្ញាធរថ្នាក់លើ ជាពិសេសលោកនាយករដ្ឋមន្ត្រីចុះពិនិត្យដីនោះជាថ្មី ដើម្បីឲ្យពលរដ្ឋបានកាន់ដីនោះវិញ ។
ពលរដ្ឋអះអាងថា ពួកគេ២៥គ្រួសារ ត្រូវបានអាជ្ញាអប្សរាបណ្តេញចេញកាលពីឆ្នាំ២០១៥ ដោយអះអាងថា រស់នៅលើដីរបស់រដ្ឋ និងយកដីនោះសម្រាប់ធ្វើការអភិវឌ្ឍ ។
VOD មិនអាចសុំការបញ្ជាក់បន្ថែម ពីអ្នកនាំពាក្យអាជ្ញាធរជាតិអប្សរាលោកស្រី ចៅ ស៊ុនកិរិយា បាននៅឡើយនៅថ្ងៃនេះ ដោយទូរសព្ទចូលតែគ្មានអ្នកទទួល ។
យោងអនុក្រឹត្យចុះហត្ថលេខាដោយលោកនាយករដ្ឋមន្ត្រី ហ៊ុន សែន ចុះថ្ងៃទី១៧ ខែមេសា ឆ្នាំ២០១៥ បានសម្រេចកាត់ផ្ទៃដីទំហំសរុប ១១៥,៤១ ហិកតា ចេញពីផ្ទៃដីបុរីសណ្ឋាគារអង្គរ ដែលគ្រប់គ្រងដោយអាជ្ញាធរអប្សរា ដើម្បីធ្វើប្រទានកម្មជាកម្មសិទ្ធិជូនប្រជាពលរដ្ឋ ដែលបានកាន់កាប់ ប្រើប្រាស់ និងដាំដុះជាក់ស្តែងលើដីនោះ ។ អនុក្រឹត្យបន្តថា ក្នុងនោះផ្ទៃដី ៥១,៤៣ហិកតា កាត់ឲ្យប្រជាពលរដ្ឋដែលរស់នៅភូមិបឹងដូនប៉ា សង្កាត់ស្លក្រាម ។ ចំណែកផ្ទៃដីទំហំ ៦៣,៩៨ហិកតា កាត់ឲ្យប្រជាពលរដ្ឋរស់នៅភូមិចុងកៅស៊ូ សង្កាត់ស្លក្រាម ខេត្តសៀមរាប ៕
សូមសរសេរមកលោក ឡាយ សាមាន តាមរយៈ samean@vodhotnews.com