ដោយ ខែ សុណង
2015-06-22
RFA

ទិដ្ឋភាព​នៃ​សាលា​ក្ដី​ខ្មែរ​ក្រហម កាល​ពី​ថ្ងៃ​ទី​៣ ខែ​កុម្ភៈ ឆ្នាំ​២០១២។ Photo courtesy of ECCC

ព្រះមហាក្សត្រ​បាន​តែងតាំង​ចៅក្រម​អន្តរជាតិ​ថ្មី​ចំនួន ២​រូប សម្រាប់​ការងារ​សាលា​ក្ដី​ខ្មែរ​ក្រហម។ ការ​តែងតាំង​នេះ បាន​ធ្វើ​ឡើង​បន្ទាប់​ពី​មាន​ការ​ចាត់​តាំង​ពី លោក បាន គីមូន (Ban Ki-moon) អគ្គលេខាធិការ​អង្គការ​សហប្រជាជាតិ និង​មាន​ការ​អនុម័ត​យល់ព្រម​ពី​ឧត្ដម​ក្រុម​ប្រឹក្សា​នៃ​អង្គ​ចៅក្រម។

សេចក្ដី​ប្រកាស​ព័ត៌មាន​របស់​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា នៅ​ថ្ងៃ​ទី​២២ ខែ​មិថុនា បាន​សរសេរ​ថា ព្រះមហាក្សត្រ​ទ្រង់​បាន​តែងតាំង​ចៅក្រម ប៊ែក កាងជីន (BAIK Kang Jin) ជា​ជនជាតិ​កូរ៉េ​ខាង​ត្បូង ឲ្យ​កាន់​តួនាទី​ជំនួស​ចៅក្រម រ៉ូវ៉ាន់ ដោននីង (Rowan Downing) ជា​ជនជាតិ​អូស្ត្រាលី ដែល​បាន​លាលែង​ពី​តំណែង​កាល​ពី​ដើម​ឆ្នាំ​២០១៥ នេះ។

កាល​ពី​ពេល​ថ្មីៗ​នេះ លោក ប៊ែក កាងជីន បាន​បំពេញ​ការងារ​ជា​ចៅក្រម​នៅ​តុលាការ​កំពូល​ទីក្រុង​សេអ៊ូល ប្រទេស​កូរ៉េ​ខាង​ត្បូង។ តាំង​ពី​ឆ្នាំ​២០១៣ មក លោក​បាន​បំពេញ​ការងារ​ជា​តំណាង​ពិសេស​នៃ​ក្រុម​ប្រឹក្សា​ទទួល​ខុស​ត្រូវ​ផ្នែក​កម្មសិទ្ធិ​បញ្ញា និង​ជា​សមាជិក​មិន​អចិន្ត្រៃយ៍​នៃ​គណៈកម្មការ​ការពារ​ព័ត៌មាន​ផ្ទៃ​ក្នុង​រដ្ឋាភិបាល​កូរ៉េ។ ក្រៅ​ពី​នេះ លោក​ត្រូវ​បាន​តែងតាំង​ជា​ចៅក្រម​លើក​ដំបូង​នៅ​ឆ្នាំ​១៩៩៤ ហើយ​គាត់​បាន​ចូលរួម​ជំនុំ​ជម្រះ​ក្ដី​លើ​សំណុំ​រឿង​ឧក្រិដ្ឋកម្ម​មួយ​ចំនួន នៅ​ក្នុង​តុលាការ​ថ្នាក់​ក្រោម ៣​ផ្សេង​គ្នា​ក្នុង​ប្រទេស​កំណើត​របស់​លោក។

ដោយ​ឡែក​សាលា​ក្ដី ក៏​បាន​ប្រកាស​ឲ្យ​ដឹង​ដែរ​ថា លោក​សាស្ត្រាចារ្យ ម៉ៃឃើល បូលេនឌើ (Michael Bohlander) ជា​ជនជាតិ​អាល្លឺម៉ង់ ត្រូវ​បាន​តែងតាំង​ជា​សហ​ចៅក្រម​ស៊ើប​អង្កេត​អន្តរជាតិ​បម្រុង​ថ្មី ជំនួស​ចៅក្រម អូលីវ័រយ៉េ បូវ៉ាលេ (Olivier Beauvallet) ជនជាតិ​បារាំង ដែល​ត្រូវ​បាន​តែងតាំង​ជា​ចៅក្រម​អន្តរជាតិ​នៃ​អង្គ​បុរេ​ជំនុំ​ជម្រះ​កាល​ពី​ពេល​កន្លង​មក​ក្នុង​ឆ្នាំ​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទ​ដែល​ទាក់ទង

• សាក្សី​បញ្ជាក់​ថា​ពិត​ជា​មាន​ផែនការ​ក្បត់​ដោយ​ធ្វើ​រដ្ឋ​ប្រហារ​អង្គការ​របប​កម្ពុជា​ប្រជាធិបតេយ្យ
• សាក្សី​ប្រាប់​ថា​នៅ​ការដ្ឋាន​ខេត្ត​កំពង់ឆ្នាំង​ខ្មែរ​ក្រហម​ធ្វើ​ទារុណកម្ម​មនុស្ស​ដោយ​ឆក់​ខ្សែ​ភ្លើង
• សាលាក្ដី​ខ្មែរក្រហម​ស្ដាប់​សាក្សី​ជា​អតីត​កង​ឈ្លប​អំពី​ការ​សម្លាប់​មនុស្ស​នៅ​ខេត្ត​កំពង់ធំ
• សាលាក្ដី​ខ្មែរ​ក្រហម​បន្ត​សវនាការ​ស្ដាប់​សាក្សី​ស្ដីពី​ការងារ​ដោយ​បង្ខំ​នៅ​ការដ្ឋាន​សាងសង់
• រដ្ឋាភិបាល៖ ការ​ភ្ជាប់​មរណភាព​លោក ជា ស៊ីម ទៅ​សាលាក្ដី​ខ្មែរ​ក្រហម​ជា​រឿ​មួលបង្កាច់
• ទស្សនៈ​សង្គម​ស៊ីវិល​ធ្វើ​ការ​ពាក់ព័ន្ធ​សាលា​ក្ដី​ខ្មែរ​ក្រហម​ចំពោះ​មរណភាព​លោក ជា ស៊ីម
• សាក្សី​អះអាង​ថា​ការងារ​និង​ស្ថានភាព​រស់នៅ​របស់​កម្មករ​នៅ​ការដ្ឋាន​កំពង់ឆ្នាំង​លំបាក​ខ្លាំង
• សាលាក្ដី​ខ្មែរ​ក្រហម​ស្ដាប់​សាក្សី​ស្ដីពី​ការងារ​ដោយ​បង្ខំ​នៅ​ការដ្ឋាន​សាងសង់​កំពង់ឆ្នាំង
• សាលាក្ដី​ខ្មែរ​ក្រហម​គ្រោង​ធ្វើ​សវនាការ​បណ្ដឹង​សាទុក្ខ​​សំណុំរឿង​០០២​វគ្គ​១​នៅ​ដើម​ខែ​កក្កដា