ដោយ៖ ថោ ស៊ីណា | ថ្ងៃសុក្រ ទី10 កក្កដា 2015
http://vodhotnews.com
ស្តាប់សំឡេង៖ |
ចម្លងទុក |
មន្ត្រីក្រសួងការងារ និងបណ្តុះបណ្តាលវិជ្ជាជីវៈ អះអាងថា ច្បាប់គ្រប់គ្រងសហជីពដែលក្រសួងការងារដាក់ជូនអន្តរក្រសួងពិនិត្យ នឹងបន្តដាក់ជូនរដ្ឋសភាអនុម័តក្នុងពេលដ៏ខ្លីខាងមុខនេះ។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ប្រាប់ VOD នៅថ្ងៃនេះថា ច្បាប់គ្រប់គ្រងសហជីពដែលក្រសួងធ្វើដាក់ជូនទៅអន្តរក្រសួងឲ្យពិនិត្យ រហូតមកដល់ពេលនេះ អន្តរក្រសួងសម្រេចបានជាង៩០ភាគរយហើយ។ លោក ហេង សួរ អះអាងថា ច្បាប់នេះនឹងដាក់ជូនសភាអនុម័តក្នុងពេលដ៏ខ្លីខាងមុខ។
លោក ហេង សួរ ឲ្យដឹងថា ច្បាប់សហជីពថ្មីនេះមានគោលដៅការពារសិទ្ធិ និងការពារផលប្រយោជន៍របស់កម្មករនិយោជិត និងធានាសិទ្ធិសេរីភាពនៃអង្គការវិជ្ជាជីវៈរបស់កម្មករ និយោជិត និងនិយោជក និងជំរុញឲ្យមានសុខដុមរមនានៃទំនាក់ទំនងវិជ្ជាជីវៈ រួមចំណែកក្នុងការបង្កើតការងារសមរម្យ និងបង្កើនផលិតភាព ដើម្បីអភិវឌ្ឍន៍ប្រទេស។
ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី មានប្រសាសន៍ថា លោកខកចិត្តចំពោះភាពមានះ របស់មន្ត្រីរដ្ឋាភិបាលដែលនៅតែបន្តធ្វើសេចក្តីព្រៀងច្បាប់សហជីព ដែលមានចេតនាជ្រៀតជ្រែកដល់កិច្ចការផ្ទៃក្នុងរបស់សហជីព ដែលខំការពារសិទ្ធិកម្មករ។
លោក ជា មុនី បន្តថា លោកនឹងប្រាប់ដល់កម្មករកម្មការិនីដែលជាសមាជិករបស់សហជីពលោក មិនឲ្យបោះឆ្នោតដល់គណបក្សប្រជាជនកម្ពុជាទៀតទេ ក្រោមហេតុផលថា តំណាងរាស្ត្ររបស់គណបក្សកំពុងកាន់អំណាចនេះ មានចេតនាបង្កើតច្បាប់រិតត្បិតសេរីភាពកម្មករ និងមន្ត្រីសហជីព។
លោក អាត់ ធន់ ប្រធានសហភាពការងារកម្ពុជា ជាមន្ត្រីសហជីពសកម្មមួយរូប ក្នុងការតវ៉ាប្រឆាំងទៅនឹងក្រសួងការងារមិនឲ្យធ្វើសេចក្តីព្រៀងច្បាប់សហជីព បានប្រាប់ VOD ថាលោកនឹងបន្តការតវ៉ាបន្តទៀត ដោយដាក់លិខិតទៅអ្នកបញ្ជាទិញ និងអង្គការអន្តរជាតិនានាឲ្យចេញការអន្តរគមន៍រដ្ឋាភិបាលកម្ពុជា កុំឲ្យអនុម័តច្បាប់សហជីពនេះ។
លោក អាត់ ធន់ បន្តថា បើក្រសួងការងារមិនលុបចោលច្បាប់សហជីពនោះ លោកនឹងដឹកនាំកម្លាំងបាតុកម្មទ្រង់ទ្រាយធំក្នុងពេលដ៏ខ្លីខាងមុខដែរ។
គួរបញ្ជាក់ថា រដ្ឋាភិបាលកម្ពុជាបច្ចុប្បន្នកំពុងមានភាពចម្រូងចម្រាសក្នុងការបង្កើតច្បាប់ពីរគឺ ច្បាប់ស្តីសមាគម អង្គការមិនមែនរដ្ឋាភិបាល និងច្បាប់សហជីព។ មន្ត្រីអង្គការសមាគម និងសហជីព ចោទរដ្ឋាភិបាលបង្កើតច្បាប់នេះឡើង ដើម្បីរឹតត្បិតសេរីភាពពួកគេ។ ប៉ុន្តែខាងរដ្ឋាភិបាលអះអាងថា ការបង្កើតច្បាប់ទាំងនេះឡើង គឺដើម្បីបង្កភាពងាយស្រួល ដល់មន្ត្រីអង្គការមិនមែនរដ្ឋាភិបាល ក្នុងការបំពេញការងារភាពជាដៃគូជាមួយរដ្ឋាភិបាល៕
សូមសរសេរមកលោក ថោ ស៊ីណា តាមរយៈ sina@vodhotnews.com