ដោយ៖ ឆុង ស៊ីណាន | ថ្ងៃអង្គារ ទី21 កក្កដា 2015
http://vodhotnews.com
មន្រ្តីនាយកដ្ឋានជនអន្តោប្រវេសន៍ឲ្យដឹងថាសមត្ថកិច្ចកម្ពុជាបានបញ្ជូនជនជាតិវៀតណាមខុសច្បាប់ចំនួន៣៣នាក់ទៅប្រទេសកំណើតវិញ នៅព្រឹកថ្ងៃអង្គារនេះ ក្រោយពីរកឃើញថាពួកគេរស់ដោយមិនមានលិខិតឆ្លងដែននៅកម្ពុជា។
ប្រធានផ្នែកស៊ើបអង្កេតនិងអនុវត្តនីតិវិធីនៃនាយកដ្ឋានអន្តោប្រវេសន៍ លោក អ៊ុក ហៃសីលា ប្រាប់វីអូឌី(VOD)ថាជនជាតិវៀតណាមទាំង៣៣នាក់នោះត្រូវសមត្ថកិច្ចចាប់បាន គិតពីដើមខែកក្កដា ឆ្នាំ២០១៥ នៅក្នុងខេត្តក្រុងចំនួន៣ គឺខេត្តព្រះសីហនុ ខេត្តរតនគិរីនិងរាជធានីភ្នំពេញ ដោយសារជនជាតិវៀតណាមទាំងនោះចូលមករកស៊ីនៅកម្ពុជាដោយគ្មានលិខិតឆ្លងដែនត្រឹមត្រូវ។ លោកបន្តថាអាជ្ញាធរបានបញ្ជូនពួកគាត់ទៅប្រទេសវៀតណាមវិញនៅម៉ោង៩:៣០ ឬម៉ោង១០ព្រឹកថ្ងៃអង្គារនេះ។ លោកបន្ថែមថារហូតមកដល់ពេលនេះ ជនជាតិវៀតណាមប្រមាណ២០០០នាក់ត្រូវបានបណ្តេញចេញពីកម្ពុជា ក្រោយពីរកឃើញថាពួកគេរស់នៅខុសច្បាប់នៅកម្ពុជា។
គួរបញ្ជាក់ថាមួយរយៈចុងក្រោយនេះ អាជ្ញាធរកម្ពុជាបានចុះចាប់ជនអន្តោប្រវេសន៍ដែលរស់នៅខុសច្បាប់នៅកម្ពុជាជាបន្តបន្ទាប់។ ក្នុងកិច្ចប្រជុំផ្សព្វផ្សាយផែនការអនុវត្តការគ្រប់គ្រងទៅលើជនអន្តោប្រវេសន៍ ដែលប្រព្រឹត្តធ្វើឡើងនៅទីស្តីការក្រសួងមហាផ្ទៃ កាលពីថ្ងៃទី១ ខែកក្កដា ឆ្នាំ២០១៥ អគ្គនាយកដ្ឋានជនអន្តោប្រវេសន៍ក្រសួងមហាផ្ទៃ បានឲ្យដឹងថាក្នុងរយៈពេល៦ខែដើមឆ្នាំ២០១៥នេះ ជនអន្តោប្រវេសន៍ខុសច្បាប់ប្រមាណ១២០០នាក់ត្រូវបានបណ្តេញចេញពីកម្ពុជា ដែលក្នុងនោះមាន៩៨ភាគរយជាជនជាតិវៀតណាម។
ថ្មីៗនេះ អគ្គស្នងការដ្ឋាននគរបាលជាតិបានសម្រេចបង្កើតផ្នែកអន្តោប្រវេសន៍ចំណុះឲ្យអង្គភាពមានសមត្ថកិច្ចនៅទូទាំងប្រទេស ដើម្បីជួយសម្រួលដល់ការប្រមូលព័ត៌មានទាក់ទងនឹងជនអន្តោប្រវេសន៍នៅកម្ពុជាឲ្យមានប្រសិទ្ធភាព។
លោក អ៊ុក ហៃសីលា មានប្រសាសន៍ថា៖“សង្ឃឹមថាការងារវាយើងក្តាប់បានណែន គ្រប់គ្រងបានគ្រប់ជ្រុងជ្រោយ ជនបរទេសទាំងអស់ កុំឲ្យមានការលំបាកក្នុងលំបាក ពេលមានស្ថាប័នឬទូតគេសួរនាំពីជនជាតិគេនៅស្រុកខ្មែរមានប៉ុន្មាន(យើងពិបាកដឹង) ដោយខ្វះព័ត៌មានចន្លោះប្រហោងអីអញ្ចឹងណា ហើយខ្ញុំគិតថាពេលយើងមានអធិការរងអន្តោប្រវេសន៍នៅតាមស្រុករាជធានី យើងអត់មានចន្លោះប្រហោងទេ យើងគ្រប់គ្រងបានល្អ"។
លោកឲ្យដឹងថាអធិការរងម្នាក់នឹងត្រូវចាត់តាំងឲ្យទទួលបន្ទុកក្នុងការងារនេះនិងរាយការណ៍ពីទិន្ន័យជនអន្តោប្រវេសន៍ទៅកាន់អគ្គនាយកដ្ឋានអន្តោប្រវេសន៍។ លោកថាអធិការរងនិងជំនួយការម្នាក់ទៀតនៅតាមក្រុងស្រុកខណ្ឌទាំងនោះនឹងត្រូវទទួលការបណ្តុះបណ្តាលជំនាញទាក់ទងនឹងជនអន្តោប្រវេសន៍នេះបន្ថែមទៀត៕
សរសេរមកកាន់លោក ឆុង ស៊ីណាន តាមរយៈchhong.sinan@yahoo.com