វិចិត្រករ ឯម ពិសី (ទី ២ រាប់ពីស្ដាំ) ក្នុងថ្ងៃកាត់ខ្សែបូរសម្ពោធពិព័រណ៍គំនូរ។ រូប សហការី
Thu, 23 July 2015
ប៉ាន់ រិទ្ធា
ភ្នំពេញប៉ុស្តិ៍
ភ្នំពេញៈ រូបក្មេងស្រីមានវ័យប្រហែលជាខ្ទង់ជាងដប់ឆ្នាំ ដែលសុទ្ធតែមានសកម្មភាពអង្គុយដោយឡែកៗពីគ្នាចំនួនបីផ្ទាំង ត្រូវបានវិចិត្រករវ័យក្មេង ឯម ពិសី ដាក់តាំងក្នុងពិព័រណ៍កម្រងស្នាដៃគំនូរដែលមានចំណង ជើងថា «ក្រដាសស ឬ Plain Paper» នៅឯវិចិត្រសាលរបស់សណ្ឋាគារអាំងទែរកុងទីណង់តាល់ ចាប់តាំងពីថ្ងៃទី ១៦ ខែកក្កដារហូតដល់ថ្ងៃទី ១៦ ខែសីហាឆ្នាំ ២០១៥ ខាងមុខ។
ពិព័រណ៍កម្រងស្នាដៃគំនូរក្រោមចំណងជើងថា «ក្រដាសស ឬ Plain Paper» នេះបានបង្កប់អត្ថន័យបែបប្រៀបធៀបមួយដោយការយកក្រដាសស ប្រៀបទៅនឹងលក្ខណៈរបស់កូនក្មេងមិនទាន់ដឹងក្តី ឬពេលពួកគេនៅមិនទាន់ទទួលរងនូវឥទ្ធិពលអ្វីមួយពីសង្គម និងបរិស្ថានជុំវិញខ្លួន។
ការរស់នៅក្នុងសង្គម កាលណាក្មេងស្ថិតនៅក្នុងបរិបទនៃមជ្ឈដ្ឋានបែបណា ឬទទួលបាននូវឥទ្ធិពលបរិស្ថានបែបណានោះ ពួកគេងាយដឹងដិតជាប់ក្នុងចិត្ត។
ចំពោះវិចិត្រករ ឯម ពិសី ដែលបានបញ្ចប់ជំនាញគំនូរពីសាកលវិទ្យាល័យភូមិន្ទវិចិត្រសិល្បៈ បានរៀបរាប់ពីគំនិតសំខាន់នៃស្នាដៃក្នុងផ្ទាំងគំនូរទាំងបីរបស់ខ្លួន ដែលបានដាក់តាំងពិព័រណ៍នោះថា៖ «ខ្ញុំបានលើកយកសកម្មភាពអង្គុយរបស់កុមារីមានស្ទីលខុសៗគ្នា។
ផ្ទាំងគំនូរទី ១ មានឈ្មោះថា Clean Day ដោយមានក្មេងស្រីអង្គុយលើកៅអីជ័រទាបបីជាន់ឆ្លាស់ពណ៌ត្រួតលើគ្នា។
គំនូរដាក់តាំងឯសណ្ឋាគារអាំងទែរកុងទីណង់តាល់។ ផា លីណា
ខ្ញុំចង់បង្ហាញពីសភាពដ៏ស្រស់ស្រាយ និងភាពអនាម័យរបស់នាងជាមួយនឹងទឹកមុខញញឹមប្រិមប្រិយ ដោយសារតែឥទ្ធិពលពីសង្គមគ្រួសារខ្លួន ដែលបានបង្ហាត់បង្ហាញដល់នាង។
ផ្ទាំងគំនូរទី ២ ឈ្មោះថា Calm Time មានក្មេងស្រីស្លៀកខោខូវប៊យពណ៌ទឹកប៊ិកមានជើងត្រឹមក្បាលជង្គង់ ពាក់អាវយឺត ហើយអង្គុយលើកៅអីជ័រខ្ពស់ពណ៌ក្រហមសម្តែងនូវទឹកមុខស្រងូតស្រងាត់ គឺជាឥទ្ធិពលមួយទៀតពីសង្គមគ្រួសាររបស់នាង ឬក៏ការបង្ហាញនូវសភាពផ្លូវចិត្តរបស់នាងតែម្តង»។
រីឯផ្ទាំងគំនូរទី ៣ មានឈ្មោះថា Deep in Eyes ជារូបក្មេងស្រីអង្គុយយកដៃឱបក្បាលជង្គង់ ដែលបង្ហាញពីការលេងក្រសែភ្នែករបស់នាង ជាមួយសត្វចិញ្ចឹមដ៏គួរឲ្យស្រឡាញ់។
អ្វីដែលគួរឲ្យកត់សម្គាល់លើផ្ទាំងគំនូរចំនួនពីររបស់វិចិត្រករវ័យក្មេងរូបនេះ គឺការប្រើផ្ទាំងសំពត់មានពណ៌ និងផ្កាភ្ញីនានាដែលឆ្លុះបញ្ចាំងពីស្ថានភាពរស់នៅរបស់ក្មេងស្រី។
វិចិត្រករ ឯម ពិសី ឲ្យដឹងថា៖ «វាជាវិធីសាស្រ្តបង្ហាញអត្ថន័យរបស់ខ្ញុំ។ ដូចជាផ្ទាំងគំនូរទី ១ បង្ហាញនូវភាពស្រស់ស្រាយតាមរយៈពណ៌នៃផ្ទាំងសំពត់ដ៏ស្រស់ឆើតឆាយ រីឯផ្ទាំងគំនូរទី ២ ផ្ទាំងសំពត់មានពណ៌រាងស្រអាប់បន្តិចបង្ហាញពីសភាពស្រងូតស្រងាត់មិនសូវរីករាយចិត្ត»៕