ដោយ អ៊ុក សាវបូរី
2015-08-08
RFA
ស្ដាប់ ឬ ទាញយកសំឡេង
ប្រជាកសិករធ្វើស្រែនៅតំបន់ទួលអំពិល ខេត្តកំពង់ឆ្នាំង លោក គៀត ភារម្យ បូមទឹកចេញពីក្នុងស្រែប្រាំងរបស់គាត់ កាលពីថ្ងៃទី៣ ខែមករា ឆ្នាំ២០១៤។ RFA/Chin Chetha
រដូវវស្សានៅឆ្នាំ២០១៥ នេះ ទឹកភ្លៀងធ្លាក់យឺតជាងឆ្នាំមុន នាំឲ្យកសិករមួយចំនួនបារម្ភពីកង្វះទឹកប្រើប្រាស់ក្នុងដំណាំស្រូវវស្សា ព្រោះការធ្វើស្រែវស្សានៅកម្ពុជា ពឹងផ្អែកទាំងស្រុងលើទឹកភ្លៀង។ បញ្ហានេះ អង្គការសេដាក (CEDAC) អំពាវនាវឲ្យកសិករពង្រាបដីស្រែឲ្យរាបស្មើ លើកភ្លឺឲ្យបានខ្ពស់ ដើម្បីទប់ទឹកបានច្រើន រៀបប្រព័ន្ធប្រឡាយក្នុងស្រែសម្រាប់ស្តុកទឹក ត្រៀមពូជ ត្រៀមជីកំប៉ុស ត្រៀមបង្ការសម្រាប់ធ្វើស្រែវស្សានៅពេលទឹកភ្លៀងធ្លាក់ជោគជាំក្នុងរដូវកាន់បិណ្ឌ។
អង្គការសេដាក ជំរុញឲ្យកសិករដាំដំណាំរួមផ្សំ ខណៈការធ្វើស្រែវស្សានៅខ្វះទឹក។
ប្រធានអង្គការសេដាក លោកបណ្ឌិត យ៉ង សាំងកុមារ ថ្លែងថា ជាទូទៅក្រោយចូលឆ្នាំខ្មែរ កសិករតែងតែសាបព្រោះស្រូវបង្កើនរដូវ ប៉ុន្តែរដូវវស្សាឆ្នាំ២០១៥ នេះ ការធ្វើស្រូវបង្កើនរដូវ បានជួបនឹងគ្រោះធម្មជាតិរាំងស្ងួតអូសបន្លាយ។ លោកណែនាំកសិករកុំអស់សង្ឃឹម ព្រោះតាមប្រតិទិនខ្មែរ រដូវកាន់បិណ្ឌតែងតែសម្បូរទឹកភ្លៀងធ្លាក់ជោកជាំ គឺចន្លោះពីថ្ងៃទី២៥ ខែកញ្ញា ទៅដល់ថ្ងៃទី១២ ខែតុលា។ លោកសុំកសិករកាយដីបាតស្រះត្រៀមស្តុកទឹក លើកភ្លឺឲ្យធំ និងខ្ពស់ ត្រៀមជីកំប៉ុស ត្រៀមគ្រាប់ពូជស្រូវ ហើយប្រញាប់ដាំដំណាំរួមផ្សំដែលមិនសូវត្រូវការទឹក ដូចជាដំឡូងជ្វា ត្រសក់ ឪឡឹក ល្ពៅ ពោត ជាដើម ដើម្បីគ្រប់គ្រងស្បៀងនៅក្នុងគ្រួសារ។ លោកថា នៅរយៈពេលរង់ចាំទឹកភ្លៀង កសិករគួរពង្រាបដីស្រែឲ្យស្មើ ដើម្បីត្រៀមធ្វើស្រែវស្សាឲ្យបានល្អ៖ «ដូចគ្នាដែរ ក៏យើងត្រូវត្រៀមជីធម្មជាតិឲ្យបានច្រើន ត្រៀមពូជ ត្រៀមកូនដំណាំអី ទុកដាំទៅ ហើយធ្វើម៉េចនៅចុងខែ១០ ឬយ៉ាងយូរបំផុតនៅចុងខែ១១ អ៊ីចឹង យើងអាចចាប់ផ្ដើមដាំដំណាំនោះបានហើយ។ នៅពេលហ្នឹង ក៏វាមានដីសើមល្អ ហើយអាកាសធាតុក៏រៀងត្រជាក់ស្រួល អំណោយផលលើការដាំដុះ អ៊ីចឹងគឺជារួម គឺយើងកុំទាន់អាលអស់សង្ឃឹម»។
ការជំរុញរបស់អង្គការសេដាក ឲ្យត្រៀមបង្ការធ្វើស្រូវវស្សាឲ្យល្អនោះ លោកស្រី ភោគ ឡា រស់នៅភូមិព្រហូត ឃុំក្រាំងលាវ ស្រុកបាទី ខេត្តតាកែវ អះអាងថា គាត់បានបម្លែងដីស្រែពីដាំស្រូវទៅដាំត្រាវយកមើមវិញ ព្រោះត្រាវជាដំណាំប្រើទឹកតិច និងប្រមូលផលដូចស្រូវដែរ ហើយមើមត្រាវលក់បានថ្លៃជាងស្រូវ៖ «ឆ្នាំនេះ គឺខ្ញុំសាកល្បងដាក់ត្រាវមើល។ ខ្ញុំប្រមូលជីធម្មជាតិឲ្យក្លាយជាកំប៉ុស ហើយខ្ញុំក៏មានទិញអង្កាមគេមកដុត ដើម្បីធ្វើជាជីកំប៉ុសដាក់ដំណាំ។ ហើយស្រូវក៏ខ្ញុំដាក់ធ្យូងអង្កាមជាមួយនឹងកំប៉ុសដែរ»។
ក្នុងការត្រៀមបង្ការធ្វើស្រូវវស្សាឆ្នាំនេះដែរ លោក ហឹម ណន កសិករភូមិត្បែងទទឹង ឃុំតាភេម ស្រុកត្រាំកក់ ខេត្តតាកែវ អះអាងថា គាត់ពង្រាបដីស្រែរួចរាល់ហើយ និងត្រៀមជីកំប៉ុសកាកសំណល់ឡជីវឧស្ម័នច្រើនតោនដែរ។ ទន្ទឹមនោះ គាត់កំពុងដាំបន្លែរួមផ្សំ បង្ការភាពរាំងស្ងួតអូសបន្លាយ៖ «ខ្ញុំដាំបានស្រែមួយដែរ ដាំដំណាំ មានត្រសក់ផង មានឪឡឹកផង សម្រាប់ទុកស្ទូងដែរ ប៉ុន្តែដល់ពេលរាំងពេក ខ្ញុំប្រមូលផលជិតអស់ពាក់កណ្ដាលទៀតទៅហើយ»។
ចំណែក លោកស្រី ផាន់ នាង រស់នៅភូមិជើងទឹក ឃុំរោងដំរី ស្រុកបាភ្នំ ខេត្តព្រៃវែង ឲ្យដឹងថា ក្រៅពីត្រៀមពូជ និងជីកំប៉ុស គាត់ក៏បានត្រៀមថ្នាំបំប៉នស្រូវ និងកម្ចាត់សត្វល្អិតយាយីដំណាំស្រូវ និងបន្លែដែរ ព្រោះតាមគាត់ចំណាំ នៅពេលរាំងស្ងួតយូរ ហើយភ្លៀងទឹកមិនគ្រប់គ្រាន់ គឺសត្វល្អិតយាយីដំណាំ៖ «ក្នុងស្រែខ្ញុំមានកូនប្រឡាយ មានដាំបន្លែតាមភ្លឺស្រែ បានស្ទូងស្រូវទៀត ហើយមានត្រីអី»។
បន្ថែមលើការត្រៀមបង្ការរបស់កសិករ លោក យ៉ង សាំងកុមារ ប្រធានអង្គការសេដាក បញ្ជាក់ថា កសិករគួរធ្វើស្រែដោយមើលខែខ្មែរ ហើយត្រូវត្រៀមពូជស្រូវ និងវត្ថុធាតុដើមសម្រាប់ដាំដំណាំរួមផ្សំ ការពារពេលភ្លៀងធ្លាក់នៅចុងរដូវ។ ការត្រៀមខ្លួនបានល្អ គួបផ្សំនឹងឱកាសភ្លៀងធ្លាក់មកដល់ នឹងនាំឲ្យកសិករទទួលបានជោគជ័យក្នុងការធ្វើស្រែវស្សា ឬដាំដំណាំផ្សេងៗទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- អ្នកជំនាញកសិកម្មបារម្ភពីសុខភាពមនុស្សដោយសារកសិករប្រើប្រាស់ជីគីមីនិងថ្នាំពុល
- កត្តានាំឲ្យអាជីវកម្មស្ករត្នោតខេត្តកំពង់ស្ពឺមិនអាចបង្កើនការផលិត
- ពលរដ្ឋខេត្តកំពង់ចាមព្រួយបារម្ភរឿងសត្វល្អិតបំផ្លាញដំណាំស្រូវ
- សមាគមចុងភៅលើកទឹកចិត្តកសិករនៅសៀមរាបឲ្យដាំបន្លែផ្គត់ផ្គង់តាមភោជនីយដ្ឋាន
- មន្ត្រីកសិកម្ម៖ ស្រូវវស្សាជាង២ម៉ឺន២ពាន់ហិកតារខ្វះទឹកស្រោចស្រព
- ហេតុអ្វីកសិករត្រូវការធានារ៉ាប់រងលើវិស័យកសិកម្ម?
- សេដាកបង្កើតប្រព័ន្ធធានារ៉ាប់រងកសិកម្មខ្នាតតូច
- ក្រុមកសិករផលិតពូជស្រូវនៅខេត្តកំពង់ឆ្នាំងប្រឈមនឹងបញ្ហាខ្វះទឹក
- កសិករនៅខេត្តកំពង់ធំប្រឈមនឹងខូចខាតដំណាំដោយសារគ្មានទឹកភ្លៀង