សកម្មភាពលួចលាក់ជីករ៉ែត្បូងនៅខេត្ដរតនគិរីដែលមានទាំងជនជាតិខ្មែរ និងវៀតណាម។ រូបថត អាដហុក
Wed, 12 August 2015
ផាក់ ស៊ាងលី
ភ្នំពេញប៉ុស្តិ៍
រនតគិរីៈ ពលរដ្ឋខ្មែរ និងវៀតណាមប្រមាណជា ១០០ នាក់បាននិងកំពុងជីករ៉ែត្បូងយ៉ាងអនាធិបតេយ្យក្នុងដីសម្បទានសេដ្ឋកិច្ចក្រុមហ៊ុនចិននៅស្រុកបកែវខេត្តរតនគិរីអស់រយៈពេល ១ ខែមកហើយក្រោមការផ្គត់ផ្គង់ និងដឹកនាំដោយថៅកែត្បូងខុសច្បាប់មួយក្រុម។
បន្ទាប់ពីស្ងប់ស្ងាត់មួយរយៈសកម្មភាពជីករ៉ែត្បូងក្នុងដីសម្បទានសេដ្ឋកិច្ចក្រុមហ៊ុនចិនឈ្មោះស្វីហ្វរ៉ាប់ប៊ឺរលីមីធីត (Swift Rubber) ក្នុងភូមិត្រុំ ឃុំឡាមិញបានកើតឡើងសាជាថ្មីទៀត។ ប៉ុន្តែម្តងនេះមានទាំងវត្តមានជនជាតិវៀតណាមប្រមាណជា ២០ នាក់ថែមទៀតផងហើយក្រុមជីកត្បូងទាំងនោះបាននាំគ្នាប្រក់តង់នៅរណ្តៅដែលពួកគេកំពុងជីកប្រមាណ ៥០ រណ្តៅនៅលើផ្ទៃដីប្រមាណជា ៣០ ហិកតា។ នេះបើយោងតាមអង្គការអាដហុកខេត្តរតនគិរីកាលពីម្សិលមិញខណៈដែលអាជ្ញាធរមូលដ្ឋានកំពុងតែរៀបចំផែនការចុះបង្ក្រាបបទល្មើសនេះ។
អ្នកសម្របសម្រួលអង្គការអាដហុកលោក ឆាយ ធី បានបញ្ជាក់ថា៖ «គេជីកប្រហែល ១ ខែមកហើយទាំងខ្មែរ និងវៀតណាមចូល ១០០ នាក់ឯណោះ។ ពួកគេបោះតង់ក្នុងព្រៃជីកនៅដីក្រុមហ៊ុនចិនតែម្តងដោយគ្មានអ្នកទប់ស្កាត់នោះទេ»។ សកម្មជនសិទ្ធិមនុស្សរូបនេះបានហៅអ្នកជីកត្បូងទាំងនោះថាជា «ក្រុមអនាធិបតេយ្យ» ហើយថាអ្នកជីករ៉ែត្បូងទាំងនោះមិនមែនធ្វើឡើងដោយខ្លួនឯងនោះទេប៉ុន្តែមានពួកឈ្មួញ (កុងសែ) ជាអ្នកផ្គត់ផ្គង់ និងដឹកនាំហើយចាំទទួលទិញរ៉ែត្បូងពីពួកគេវិញផ្តាច់មុខដើម្បីទទួលបានផលប្រយោជន៍ផ្ទាល់ខ្លួនប៉ុណ្ណោះ។
លោក ឆាយ ធី បានបញ្ជាក់ថា៖ «ក្រុមអ្នកជីកត្បូងទាំងនេះមានកុងសែនៅពីក្រោយខ្នងហើយក្រុមហ៊ុនចម្ការកៅស៊ូក៏បានបណ្តែតបណ្តោយឲ្យជីកដែរ។ យើងសង្ស័យថាគេត្រូវរ៉ូវគ្នា។ ក្រុមហ៊ុនក៏មានចំណែកទទួលខុសត្រូវក្នុងរឿងនេះដែរ»។
ទោះជាយ៉ាងណាអាដហុកមិនទាន់បានដឹងទេថាតើក្រុមកុងសែនោះជាអ្នកណាទេ។
ប៉ុន្តែបានសង្កេតឃើញថាពួកគេនោះជាក្រុមអ្នកមានហើយហ៊ានទិញ ឬជួលដីគេនៅកន្លែងមានរ៉ែត្បូងតម្លៃរហូតដល់ទៅ ១ ម៉ឺនដុល្លាក្នុង ១ ហិកតាទៀតផងដើម្បីឲ្យកម្មករជីកយ៉ាងអនាធិបតេយ្យ។ ប៉ុន្តែពួកគេមិនដែលត្រូវបានអាជ្ញាធរមូលដ្ឋានចាប់បានម្តងណាទេដោយសារតែពួកគេដូចមានត្រចៀកទិព្វ ឬមានអ្នកផ្តល់ព័ត៌មានឲ្យមុនសមត្ថកិច្ចចុះបង្ក្រាប។
លោកថា តំបន់នោះគ្មានអ្នកចេញចូលក្រៅពីអ្នកជីកត្បូងទេហើយវាជាកន្លែងគ្រោះថ្នាក់សម្រាប់អ្នកដែលហ៊ានរាយការណ៍ពីសកម្មភាពខុសច្បាប់ដែលកើតឡើងដដែលៗនេះ។
លោកថា៖ «ពួកអ្នកឆ្មក់ជីកលួចលាក់ហើយដូចដឹងមុនព្រោះសមត្ថកិច្ចទៅគេរត់បាត់អស់។ នៅពេលសមត្ថកិច្ចត្រឡប់ទៅវិញពួកគេមកជីកដដែល។ គេមានបណ្តាញគេប្រាប់។ ព្រៃនោះវាគ្រោះថ្នាក់ណាស់។ មុខរបរគេគឺជីកខុសច្បាប់។ អ៊ីចឹងបើយើងចង់ឲ្យគេឈប់គេមិនសប្បាយចិត្តទេ និងបង្កបញ្ហាដល់អ្នកចង់ឲ្យឈប់ទៀតផង»។
លោក ងិន បូរិន តំណាងក្រុមហ៊ុនស្វីហ្វរ៉ាប់ប៊ឺរលីមីធីតបានបដិសេធថាក្រុមហ៊ុនមិនបានដឹង និងមិនមានពាក់ព័ន្ធនឹងការជីកត្បូងខុសច្បាប់នោះទេដោយសារតែអាជ្ញាធរបានផ្អាកសកម្មភាពក្រុមហ៊ុនក្នុងតំបន់នោះជិត ១ ឆ្នាំមកហើយបន្ទាប់ពីមានទំនាស់ដីធ្លីជាមួយនឹងប្រជាពលរដ្ឋក្រុមសាមគ្គី។ កន្លែងដែលកំពុងកើតមានសកម្មភាពជីកត្បូងខុសច្បាប់នេះត្រូវបានអាជ្ញាធរមានសមត្ថកិច្ចបង្ក្រាបផងដែរកាលពីខែកក្កដាឆ្នាំ ២០១៤។
ប៉ុន្តែអ្នកជីកប្រមាណជា ២០០ នាក់នាពេលនោះមិនត្រូវបានចាប់ឃាត់ខ្លួនទេ។
លោក ហេង ប៊ុននី អភិបាលស្រុកបកែវបានឲ្យដឹងថាអាជ្ញាធរបានដឹងពីសកម្មភាពជីកត្បូងនោះហើយបានបើកកិច្ចប្រជុំពិភាក្សាមួយរួចហើយដែរ។
លោកបានថ្លែងថា៖ «អ្នកជីករ៉ែក្នុងដីក្រុមហ៊ុននោះអត់មានច្បាប់ទេ។ យើងកំពុងរៀបចំចាត់វិធានការក្តៅហើយសូមឲ្យអង្គការក្រៅរដ្ឋាភិបាលចូលរួមផង និងកុំស្រែកពេលយើងចាប់ពលរដ្ឋ»។
ក្រសួងរ៉ែ និងថាមពលបានចុះទៅពិនិត្យជាក់ស្តែងពីបញ្ហាធ្វើអាជីវកម្មរ៉ែខុសច្បាប់នោះហើយបានស្នើឲ្យបញ្ឈប់ហើយងាកទៅរកសុំច្បាប់ធ្វើដោយស្របច្បាប់វិញ។
លោក ម៉េង សក្តិធារ៉ា អ្នកនាំពាក្យ និងជារដ្ឋលេខាធិការក្រសួងរ៉ែ និងថាមពលដែលបានចុះទៅពិនិត្យការធ្វើអាជីវកម្មខុសច្បាប់ក្នុងខេត្តរតនគិរីមិនអាចទាក់ទងសុំអត្ថាធិប្បាយបានទេកាលពីម្សិលមិញ។ ប៉ុន្តែលោកធ្លាប់បានប្រាប់នាពេលកន្លងមកថាជំហានដំបូងអាជ្ញាធរក៏ដូចជាក្រសួងបានអប់រំប្រជាពលរដ្ឋឲ្យបញ្ឈប់សកម្មភាពខុសច្បាប់នោះសិនហើយឲ្យទៅសុំច្បាប់វិញ។ ប៉ុន្តែក្នុងករណីដែលពួកគេមិនស្តាប់នោះវិធានការច្បាប់នឹងត្រូវបានអនុវត្តចំពោះអ្នកធ្វើអាជីវកម្មរ៉ែខុសច្បាប់៕