ដោយ៖ ឡាយ សាមាន | ថ្ងៃសៅរ៍ ទី29 សីហា 2015
http://vodhotnews.com
រដ្ឋមន្ត្រីក្រសួងមហាផ្ទៃថៃ បានឯកភាព ជាមួយកម្ពុជាម្តងទៀតថា នឹងទប់ស្កាត់លំហូរឆ្លងដែនខុសច្បាប់ ដោយអនុឡោម តាមបទដ្ឋាន ដែលទទួលស្គាល់ ដោយអន្តរជាតិ ផ្អែកទៅតាមគោលការណ៍ច្បាប់ និងលិខិតបទដ្ឋានគតិយុត្តិធម៌នៃប្រទេសទាំងពីរ។
ការសម្រេចនេះ ធ្វើឡើងក្នុងពិធីបិទកិច្ចប្រជុំអភិបាលខេត្តជាប់ព្រំដែនកម្ពុជា ថៃលើកទី៥ កាលពីថ្ងៃទី២៨ខែសីហា ឆ្នាំ២០១៥ នៅទីក្រុងបាងកកប្រទេសថៃ រវាងរដ្ឋមន្ត្រីក្រសួងមហាផ្ទៃកម្ពុជាលោក ស ខេង និង រដ្ឋមន្ត្រីក្រសួងមហាផ្ទៃថៃលោក អនុពង្ស ផៅចិន្តា។
កាលពីឆ្នាំ២០១៤ ពលករខ្មែរជាង២០ម៉ឺននាក់ ត្រូវមេដឹកនាំយោធាថៃចាប់បញ្ជូនទាំងតក់ក្រហល់ មកទម្លាក់ចោល នៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ក្រោមហេតុផលពង្រឹងផ្ទៃក្នុង ។
ជាងនេះទៅទៀត ពលរដ្ឋខ្មែរមួយចំនួន ត្រូវទាហានថៃបាញ់សម្លាប់ក្រៅច្បាប់ ជារៀលរាល់ឆ្នាំ ពេលពួកគេ ចូលទៅរកការងារធ្វើនៅប្រទេសថៃ ដោយខុសច្បាប់ ។ បើទោះបីមន្ត្រីជាន់ខ្ពស់ថៃ ធ្លាប់បាន សន្យានិងពេលខ្លះ មន្ត្រីជាន់ខ្ពស់ថៃ ធ្លាប់បានសុំទោស កម្ពុជាជាសាធារណៈ ពីការសម្លាប់ក្រៅច្បាប់នេះក៏ដោយ។
តាមការចុះផ្សាយ របស់អគ្គស្នងការនគរបាលជាតិ ឲ្យដឹងថា រដ្ឋមន្ត្រីក្រសួងមហាផ្ទៃថៃ លោក អនុពង្ស ផៅចិន្តាបានឯកភាព ជាមួយរដ្ឋមន្ត្រីក្រសួងមហាផ្ទៃកម្ពុជា លោក ស ខេង ក្នុងកិច្ចប្រជុំនោះថា នឹងជួយសម្រួលដល់ពលករនៃប្រទេសទាំងពីរ ឲ្យប្រើប្រាស់ប័ណ្ណព្រំដែនសម្រាប់ឆ្លងកាត់ព្រំដែនដើម្បីធ្វើការប្រចាំថ្ងៃ និងតាមរដូវកាល ។
គេហទំព័រដដែល បន្តថា ភាគីទាំងពីរ ក៏បានឯកភាពគ្នាថា នឹងរំឭកទៅអាជ្ញាធរ មានសមត្ថកិច្ចទាំងអស់នៅ ជាប់ព្រំដែន ត្រូវបង្កើនការអនុវត្តតាមខ្លឹមសារ កំណត់ហេតុនៃកិច្ចប្រជុំ ឲ្យមានប្រសិទ្ធភាព ដើម្បីជំរុញធ្វើឲ្យសន្តិសុខ សណ្តាប់ធ្នាប់ និងការអភិវឌ្ឍតាមព្រំដែន មានភាពល្អប្រសើរ។
ក្រៅពីនេះ ភាគីទាំងពីរ ក៏បានឯកភាពគ្នា ថានឹងបន្តលើកកម្ពស់ក្នុងការរក្សាសន្តិភាព ស្ថេរភាព សន្តិសុខ និងការបង្ការទប់ស្កាត់ បង្ក្រាបឧក្រិដ្ឋកម្មឆ្លងដែន ការសម្របសម្រួលដល់ការចេញចូលឆ្លងកាត់ព្រំដែន ការផ្លាស់ប្តូទំនិញ កសិផល ការធ្វើពាណិជ្ជកម្ម និងការធ្វើវិនិយោគទុនតាមតំបន់ព្រំដែនផងដែរ។
កាលពីដើមខែកក្កដាឆ្នាំ២០១៥ រដ្ឋមន្ត្រីក្រសួងមហាផ្ទៃ លោក ស ខេង បានថ្លែងថាក្នុងចំណោមប្រជាពលរដ្ឋខ្មែរប្រមាណ១លាននាក់ដែលទៅធ្វើការនៅក្រៅប្រទេស៧០ភាគរយកំពុងបានទទួលរងការប្រថុយប្រថានធ្វើការងារគ្មានច្បាប់អនុញ្ញាត ការកេងប្រវ័ញ្ចនិងអំពើជួញដូរមនុស្ស។
សង្គមស៊ីវិលយល់ថា ដើម្បីទប់ស្កាត់ចំណាកស្រុកខុសច្បាប់ រដ្ឋាភិបាលកម្ពុជា ត្រូវបង្កើនការងារនៅក្នុងស្រុក ឲ្យមានប្រាក់ឈ្នួលក្នុងកម្រិតខ្ពស់ ប្រហាក់ប្រហែលប្រទេសជិតខាង និងបង្កភាពងាយស្រួល លើការបំពេញបែបបទ ពីសេវាផ្តល់លិខិតឆ្លងដែនជាដើម៕
សូមសរសេរមកកាន់លោក ឡាយ សាមាន តាមរយៈsamean@vodhotnews.com