ដោយ ខែ សុណង
2015-08-31
RFA
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ថ្លែងបន្ទាប់ពីកិច្ចប្រជុំ នៅថ្ងៃទី៤ ខែឧសភា ឆ្នាំ២០១៥។ RFA/Morm Moniroth
គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសផ្សព្វផ្សាយតារាងឈ្មោះឃុំសង្កាត់ និងចំនួនភូមិ សម្រាប់ចុះឈ្មោះបោះឆ្នោតសាកល្បងតាមប្រព័ន្ធកុំព្យូទ័រចាប់ពីដើមខែវិច្ឆិកា ឆ្នាំ២០១៥។ បន្ទាប់ពីការចុះឈ្មោះសាកល្បងនេះ គ.ជ.ប នឹងធ្វើការដើម្បីកែសម្រួល និងចែងនៅក្នុងនីតិវិធីនៃការចុះឈ្មោះរៀបចំបញ្ជីថ្មី។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍នៅថ្ងៃទី៣១ សីហា ថា ការចុះឈ្មោះសាកល្បងនេះ នឹងធ្វើនៅតាមឃុំសង្កាត់ចំនួន២៥ ដោយក្នុងនោះឃុំសង្កាត់ខ្លះជ្រើសរើសយក ១ភូមិ ឃុំ សង្កាត់ ខ្លះជ្រើសរើសយក ២ភូមិ និងឃុំសង្កាត់ ខ្លះទៀតជ្រើសរើសយក ៣ភូមិ ដែលជាកន្លែងចុះឈ្មោះបោះឆ្នោតសាកល្បងតាមប្រព័ន្ធកុំព្យូទ័រ។ លោក ហង្ស ពុទ្ធា បន្តថា គោលបំណងនៃការផ្សព្វផ្សាយនៅពេលនេះ គឺលោកចង់ឲ្យមានការចូលរួមរបស់អ្នកសង្កេតការណ៍ ហើយការចុះឈ្មោះសាកល្បងនេះ គឺដើម្បីសាកល្បងនូវបច្ចេកវិទ្យាថ្មី រកពីចំណុចសកម្ម និងអសកម្ម។ ទន្ទឹមនឹងគ្នានេះ ក៏នឹងត្រូវដឹងថា តើការសាកល្បងតាមបែបបច្ចេកវិទ្យាថ្មីជាមួយអាជ្ញាធរ ប្រព្រឹត្តទៅយ៉ាងណា? រីឯឥរិយាបថ និងការទំនាក់ទំនងរបស់ប្រជាពលរដ្ឋ ជួបបញ្ហាអ្វីខ្លះ?
លោក ហង្ស ពុទ្ធា៖ «បន្ទាប់ពីការធ្វើសាកល្បងនេះហើយ គ.ជ.ប កែសម្រួល ហើយយកទៅចែងក្នុងនីតិវិធីនៃការចុះឈ្មោះ ដើម្បីរៀបចំបញ្ជីបោះឆ្នោតថ្មី។ ពីមុនមក យើងឮសូរតែធ្វើនីតិវិធីអត់ទាន់ស្ថាពរទេ យើងដាក់ជូនភាគីជប៉ុន និងសហគមន៍អឺរ៉ុប ផ្ដល់អនុសាសន៍ដាក់ជូនស្ថាប័នពាក់ព័ន្ធ អង្គការ សមាគម គណបក្សនយោបាយ មានក្រសួងមហាផ្ទៃ ជាដើម លោកបានផ្ដល់អនុសាសន៍ហើយ។ គ.ជ.ប រង់ចាំការធ្វើសាកល្បងនេះ ដើម្បីបំពេញបន្ថែមទៅលើនីតិវិធី»។
ការចុះឈ្មោះបោះឆ្នោតជាផ្លូវការ នឹងប្រព្រឹត្តទៅនៅថ្ងៃទី១ ខែមីនា ឆ្នាំ២០១៦។ រយៈពេលចុះឈ្មោះមានចំនួន ៣ខែ ហើយ ២ខែសម្រាប់រក្សាទុកពេលវេលាប្ដឹងផ្ដល់ និងដោះស្រាយបណ្ដឹង។ គ.ជ.ប បានប៉ាន់ប្រមាណថា មានពលរដ្ឋជិត ១០លាននាក់ដែលគ្រប់អាយុ និងមានសិទ្ធិចុះឈ្មោះបោះឆ្នោត។ ការបោះឆ្នោតជ្រើសរើសឃុំសង្កាត់ នឹងប្រព្រឹត្តទៅនៅឆ្នាំ២០១៧ ហើយការបោះឆ្នោតជាតិអាណត្តិទី៦ នៅឆ្នាំ២០១៨ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សាលាឧទ្ធរណ៍នឹងបើកសវនាការលើការសុំនៅក្រៅឃុំរបស់លោក ហុង សុខហួរ នៅថ្ងៃទី២កញ្ញា
- មន្ត្រីរដ្ឋាភិបាលនិងបក្សប្រឆាំងជំរុញឲ្យស៊ើបអង្កេតការគំរាមសម្លាប់លោក សុខ ទូច
- នាយករដ្ឋមន្ត្រីចាត់ឲ្យរដ្ឋមន្ត្រីក្រសួងដែនដីឆ្លើយបំភ្លឺនៅសភាតាមសំណើបក្សប្រឆាំង
- រដ្ឋាភិបាលអនុម័តសេចក្ដីព្រាងឯកសារយុទ្ធសាស្ត្រស្ដីពីការគ្រប់គ្រងបំណុលសាធារណៈ
- លោក វ៉ា គឹមហុង ប្រតិកម្មនឹងលោក អ៊ុំ សំអាន បកស្រាយរឿងផែនទីនៅសភាអាមេរិក
- លោក សុខ ទូច ស្នើសុំផែនទីពីលោក អ៊ុំ សំអាន មកផ្ទៀងផ្ទាត់
- តំណាងរាស្ត្របក្សប្រឆាំងអះអាងថារកឃើញផែនទីបោនខ្នាត១/១០០.០០០នៅអាមេរិក
- ខុមហ្វ្រែល៖ ក្នុងឆមាសទី២នៃនីតិកាលទី៥តំណាងរាស្ត្រចុះមូលដ្ឋានច្រើនជាងឆ្នាំមុន
- គ.ជ.ប នឹងរៀបចំការចុះឈ្មោះបោះឆ្នោតសាកល្បងនៅដើមខែវិច្ឆិកា