ដោយ៖​ ឈុន វួ​ចលាង​ | ថ្ងៃអង្គារ ទី1 កញ្ញា 2015, 05:25 PM​
http://vodhotnews.com

ប្រជាពលរដ្ឋ​ដែលបាន​តវ៉ា​នៅ​មុខសាលាដំបូង​ខេត្ត​កោះកុង ដើម្បី​ឲ្យ​ដោះលែង​សកម្មជន​មាតា​ធម្មជាតិ កាលពីពេល​ថ្មីៗនេះ (រូបថត៖ អ៊ិត សូធឿត)

​សាលាដំបូង​ខេត្តកោះកុងបដិសេដ​ចំពោះ​ការស្នើឲ្យ​ដោះលែង​យុវជន​ចលនា​មាតាធ​ម្ម​ជាតិ ​ទាំង​៣​នាក់ ឲ្យនៅ​ក្រៅ​ឃុំ​បណ្តោះអាសន្ន ដោយ​តុលាការ​លើ​កហេតុផល​ថា ដើម្បី​រក្សា​ជន​ត្រូវ​ចោទ​ទុក​ជូន​តុលាការ​ចាត់ការ​តាម​នីតិវិធី និង​ដើម្បី​បញ្ចប់​បទល្មើស ឬ​បង្ការ​បទល្មើស​កុំឲ្យ​កើតមាន​ជាថ្មី​។​

យោងតាម​ដីកា​សម្រេច​របស់​សាលាដំបូង​ខេត្តកោះកុង កាលពី​ថ្ងៃ​ទី​៣១ ខែសីហាម្សិលមិញបានឲ្យដឹងថា ការ​ស៊ើបសួរ​មិនទាន់​បាន​គ្រប់គ្រាន់​ដែល​ជា​ហេតុមិ​អាច​អនុញ្ញាតិឲ្យ​ជន​ត្រូវ​ចោទ​នៅ​ក្រៅ​ឃុំ​បានឡើយ។ 

​អ្នកសម្របសម្រួល​អង្គ​ការ​សិទ្ធិមនុស្ស​លីកាដូ ​ប្រចាំ​ខេត្ត​កោះកុង លោក អ៊ិន គង់​ជិត ប្រាប់​វី​អូ​ឌី​ថា ហេតុផល​ដែល​តុលាការ​លើក​ឡើង​ថា ដើម្បី​បង្ការ​កុំឲ្យ​មាន​បទល្មើស​ជា​ថ្មី និង​បន្ត​នីតិវិធី​ច្បាប់​នោះ លោក​យល់ថា មិន​សម​ហេតុផល​ទេ​។ លោក​ថា​យុវជន​ទាំង​នោះ​ប្រហែលជា​មិន​អាច​ប្រព្រឹត្តម្តង​ទៀត​ទេ ហើយ​ពួកគេ​ត្រូវតែ​មាន​ការដោះលែង​ និង​?ទម្លាក់​ការចោទប្រកាន់​ ដោយសារ​ពួក​គាត់​មាន​ទី​នៅ​ច្បាស់លាស់់ ​និង​មានឈ្មោះ​ក្នុង​អង្គការ​ដែល​បាន​ចុះបញ្ជី​ត្រឹមត្រូវ​។​

លោក​បន្តថា៖ "​តុលារ​មិន​ព្រម​អនុវត្ត​នីតិ​វិធី តុលាការ​គួរតែ​ហៅ​អ្នក​ទាំង​ពីរ​នាក់​ទៀត​(​ទ្រី សុ​វី​គា ​និង សាន់ ម៉ា​ឡា​)​មក​យក​ចម្លើយ​ដែល​កន្លងមក​តុលាការ​មិន​ទាន់​បាន​យក​ចម្លើយ ចឹង​ត្រូវតែ​បន្ត​និតិវិធី​យក​ចម្លើយ​ពួកគាត់​ឲ្យបាន​រហ័ស​"។​

​អ្នកស្រី ឯក សុផល ពលរដ្ឋ​ម្នាក់​ដែល​ចូលរួម​ការតវ៉ា​ជាង​១០​ថ្ងៃ ទាមទារ​ឲ្យ​ដោះលែង​យុវជន​ទាំងនោះបានឲ្យដឹងថា ដំបូង​ឡើយ​ពួក​យើង​មាន​គម្រោង​នឹង​រំសាយ​ការតវ៉ា​ក្នុង​រយៈពេល​ពីរ​ថ្ងៃ​ទៀត​ដើម្បី​រក​វិធីសាស្ត្រ​ថ្មី​ទៀត ប៉ុន្តែ​អ្នកស្រី​ថា ពួកគាត់​ទើបតែ​ទទួល​បាន​លិខិត​ព្រមាន​ថ្មី​មួយទៀត​ពី​អាជ្ញាធរ​ដែល​តំរូវ​ឲ្យ​អ្នក​តវ៉ា រំសាយ​ឲ្យបាន​មុន​ម៉ោង​៥​ល្ងាច​ថ្ងៃ​ទី​០២ ខែកញ្ញាស្អែក​នេះ​។​

​សមត្ថកិច្ច​ខេត្ត​កោះកុង​បាន​ចាប់ខ្លួន​យុវជន​អង្គការ​ការពារ​ធម្មជាតិ​ទាំងនោះ បន្ទាប់ពី​ពួកគេ​តវ៉ា​ប្រឆាំង​នឹង​ក្រុមហ៊ុន​ខ្សាច់​របស់​វៀតណាម​៕​

សូមសរសេរមកកញ្ញា ឈុន វួ​ចលាង​ តាមរយៈ chhun.vouchleang@yahoo.com