ដោយ ហ៊ុំ ចំរើន
2015-09-17
RFA
ស្ដាប់ ឬ ទាញយកសំឡេង
ប្រជាពលរដ្ឋប្រមាណ ៦០នាក់ដែលមានទំនាស់ដីធ្លីនៅឃុំបឹងប្រាំ ស្រុកបវេល ខេត្តបាត់ដំបង ធ្វើដំណើរតាមផ្លូវជាតិលេខ៥ ចាប់ពីព្រំប្រទល់ស្រុកថ្មគោល ឆ្ពោះទៅតវ៉ានៅមុខសាលាខេត្តបាត់ដំបង នៅថ្ងៃទី១៧ ខែកញ្ញា ឆ្នាំ២០១៥។ RFA/Hum Chamroeun
ប្រជាពលរដ្ឋប្រមាណ ៦០នាក់ដែលមានទំនាស់ដីធ្លីនៅឃុំបឹងប្រាំ ស្រុកបវេល ខេត្តបាត់ដំបង នៅព្រឹកថ្ងៃទី១៧ កញ្ញា នាំគ្នាធ្វើដំណើរដោយថ្មើរជើងក្រោមតំណក់ទឹកភ្លៀងតាមផ្លូវជាតិលេខ៥ ចាប់ពីព្រំប្រទល់ស្រុកថ្មគោល ឆ្ពោះទៅសាលាខេត្តបាត់ដំបង ដើម្បីតវ៉ាទាមទារឲ្យអាជ្ញាធរខេត្ត ដោះស្រាយ និងបញ្ឈប់កោះហៅពួកគាត់ឡើងតុលាការបន្តទៀត។
«សំឡេងប៉ះទង្គិចគ្នាពេលតវ៉ា»
ប្រជាពលរដ្ឋអ្នកតវ៉ានៅឃុំបឹងប្រាំ បានប៉ះទង្គិចគ្នាមួយប្រាវជាមួយសមត្ថកិច្ច ខណៈក្រុមអ្នកតវ៉ាដើរតាមដងផ្លូវ នៅចំណុចមុខប្រៃសណីយ៍ រហូតដល់សាលាខេត្តបាត់ដំបង។ ការប៉ះទង្គិចគ្នានេះ សមត្ថកិច្ចបានរារាំងមិនឲ្យប្រជាពលរដ្ឋធ្វើដំណើរទៅតវ៉ានៅមុខសាលាខេត្តនោះទេ។ ប៉ុន្តែក្រុមអ្នកតវ៉ាប្រឆាំងនឹងការរារាំងនេះ ហើយនាំគ្នាធ្វើដំណើររហូតទៅដល់មុខសាលាខេត្តបាត់ដំបង។
ក្រុមប្រជាពលរដ្ឋថ្លែងថា មូលហេតុដែលពួកគេនាំគ្នាតវ៉ាក្រោមតំណក់ទឹកភ្លៀងនេះ ដើម្បីទាមទារឲ្យអាជ្ញាធរខេត្តបាត់ដំបង ដោះស្រាយបញ្ហាទំនាស់ដីធ្លីឲ្យបានឆាប់ និងឲ្យបញ្ឈប់ការប្រើប្រាស់ប្រពន្ធតុលាការ កោះហៅប្រជាពលរដ្ឋដែលមានទំនាស់ដីធ្លីទៅសាកសួរនៅសាលាដំបូងខេត្តបន្តទៀត៖ «ខ្ញុំមកនេះដើម្បីចង់ជួបលោកអភិបាលខេត្តជាលើកចុងក្រោយ ពីព្រោះយើងមានឯកសារពាក់ព័ន្ធនឹងអំពើពុករលួយដាក់ជូនលោកអភិបាលខេត្តដោះស្រាយរួចហើយ។ តែមិនការដោះស្រាយនោះ គឺមានតែតុលាការកោះហៅប្រជាពលរដ្ឋអ្នកក្រីក្រមកសួរនាំទៅវិញ ជាពិសេសអាជ្ញាធរភូមិ-ឃុំតែម្ដង សុំកុំឲ្យពួកគាត់ប្ដឹងប្រជាពលរដ្ឋទៅតុលាការទៀត»។
ការតវ៉ានេះ ប្រជាពលរដ្ឋបានធ្វើដំណើរដោយថ្មើរជើងទាំងភ្លៀងរលឹម ដោយខ្លះមានកូនតូចជាប់នឹងដៃ និងខ្លះទៀតពាក់អាវភ្លៀងដើរពីព្រំប្រទល់ស្រុកថ្មគោល រហូតដល់សាលាខេត្តបាត់ដំបង ដែលមានចម្ងាយប្រមាណ ៨គីឡូម៉ែត្រ។
ឆ្លើយតបនឹងបញ្ហានេះ នាយរងរដ្ឋបាលនៃសាលាខេត្តបាត់ដំបង លោក ឆាយ ម៉ាទីណាល់ មានប្រសាសន៍ថា បញ្ហានេះជារឿងរបស់តុលាការ ខាងសាលាខេត្តពុំមានអំណាចដោះស្រាយតាមការស្នើសុំរបស់ប្រជាពលរដ្ឋនោះទេ៖ «ខ្ញុំសួរនាំប្រជាពលរដ្ឋក្នុងនាមជាអាជ្ញាធរខេត្តទេ តែការសួរប្រជាពលរដ្ឋនេះ អាជ្ញាធរមិនបានសន្យាអ្វីដល់ប្រជាពលរដ្ឋនោះដែរ ព្រោះរឿងនេះខាងតុលាការកោះហៅប្រជាពលរដ្ឋ មិនពាក់ព័ន្ធនឹងសាលាខេត្តឡើយ»។
ទោះជាយ៉ាងនេះក្ដី បន្ទាប់ពីការតវ៉ាប្រមាណកន្លះម៉ោង មន្ត្រីសាលាខេត្តបានអនុញ្ញាតឲ្យតំណាងប្រជាពលរដ្ឋចំនួន ៣នាក់ ជួបពិភាក្សារកដំណោះស្រាយនៅមុខសាលាខេត្តរយៈពេលប្រមាណ ១ម៉ោង។ ប្រជាពលរដ្ឋអះអាងថា មន្ត្រីសាលាខេត្តបាត់ដំបង ប្រាប់ពួកគាត់ថា នឹងនាំរឿងនេះទៅជម្រាបលោកអភិបាលខេត្ត ដោះស្រាយតាមការស្នើសុំរបស់ប្រជាពលរដ្ឋ។
ទាក់ទងនឹងបញ្ហានេះដែរ មន្ត្រីស៊ើបអង្កេតនៃអង្គការលីកាដូ (LICADHO) ខេត្តបាត់ដំបង លោក ហេង សាយហុង មានប្រសាសន៍ថា ប្រជាពលរដ្ឋធ្វើការតវ៉ានេះ ដោយសារពួកគាត់ជួបការលំបាកគ្មានដីដាំដុះ ដើម្បីដោះស្រាយជីវភាពគ្រួសារ។ លោកបញ្ជាក់ថា ការទាមទាររបស់ប្រជាពលរដ្ឋ គឺជារឿងត្រឹមត្រូវ ពីព្រោះពួកគាត់បានតវ៉ាឲ្យអាជ្ញាធរដោះស្រាយជាច្រើនលើកច្រើនសាមកហើយ តែពុំទទួលបានលទ្ធផលនោះទេ៖ «រឿងទំនាស់នេះកាលណាប៉ះពាល់អ្នកមានលុយជាង គេប្ដឹងប្រជាពលរដ្ឋឡើងតុលាការ។ បញ្ហានេះហើយឲ្យប្រជាពលរដ្ឋមានការព្រួយបារម្ភខ្លាចតុលាការចាប់ពួកគាត់ដាក់ពន្ធនាគារ ពីព្រោះអាជ្ញាធរមិនទាន់ដោះស្រាយបញ្ចប់ជម្លោះដីធ្លីរបស់ពួកគាត់នៅឡើយ»។
ដីធ្លីដែលប្រជាពលរដ្ឋមានទំនាស់នៅឃុំបឹងប្រាំ ស្រុកបវេល ខេត្តបាត់ដំបង មានទំហំចំនួនជាង ១ពាន់ហិកតារ (១.០៨០ហិកតារ)។ ផ្ទៃដីទាំងនេះ កាលពីឆ្នាំ១៩៩៧ ជាដីសមាហរណកម្មរបស់រដ្ឋាភិបាល សម្រាប់បែងចែកឲ្យមន្ត្រីយោធិនកាត់រំសាយរបស់ប្រជាពលរដ្ឋចំនួន ២២៣គ្រួសារ មានទំនាស់គ្នា ដោយសារភាពមិនច្បាស់ទៅលើប្លង់កម្មសិទ្ធិរវាងប្រជាពលរដ្ឋ និងប្រជាពលរដ្ឋដែលភាគីម្ខាងមានអាជ្ញាធរមូលដ្ឋាននៅពីក្រោយខ្នង ដែលធ្វើឲ្យជម្លោះនេះអូសបន្លាយមិនអាចដោះស្រាយបានតាំងពីឆ្នាំ២០០៥ រហូតមក។ ក្រុមអ្នកតវ៉ាព្រមានថា ប្រសិនបើអាជ្ញាធរខេត្តបាត់ដំបង ដោះស្រាយមិនចេញទៀត នោះពួកគេនឹងធ្វើដំណើរទៅតវ៉ានៅរាជធានីភ្នំពេញក្នុងពេលឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ពលរដ្ឋរងផលប៉ះពាល់គម្រោងសង់វារីអគ្គិសនីចោទអាជ្ញាធរថាដោះស្រាយសំណងលម្អៀង
- តុលាការខេត្តស្វាយរៀងជម្រះក្តីរឿងរដ្ឋបាលព្រៃឈើប្ដឹងប្រធានសហគមន៍និងសកម្មជនដីធ្លី
- ពលរដ្ឋប្រមាណ២០នាក់នាំគ្នាឃាត់គ្រឿងចក្ររបស់អាជ្ញាធរឈូសឆាយលើដីពួកគាត់
- អ្នកឃ្លាំមើលបញ្ហាដីធ្លីអះអាងថាករណីទំនាស់ដីធ្លីនៅកម្ពុជាបន្តកើនឡើង
- គណៈកម្មការទី១នៃរដ្ឋសភានឹងពិនិត្យមើលជម្លោះដីធ្លីនៅស្រុករមាសហែកឡើងវិញ
- ពលរដ្ឋនៅឃុំតេជោអភិវឌ្ឍន៍ថាអាជ្ញាធរខេត្តកំពតមិនទាន់វាស់ដីជូនតាមការសន្យា
- អាជ្ញាធរខេត្តកំពតចុះវាស់វែងដីជូនពលរដ្ឋនៅភូមិតេជោអភិវឌ្ឍន៍នៅថ្ងៃស្អែក
- រដ្ឋសភាជំរុញឲ្យអាជ្ញាធរខេត្តស្វាយរៀងនិងក្រចេះដោះស្រាយជម្លោះដីធ្លីជូនពលរដ្ឋ
- ពលរដ្ឋខេត្តពោធិ៍សាត់រិះគន់មន្ត្រីជំនាញរដ្ឋបាលព្រៃឈើរឿងគ្រប់គ្រងដីព្រៃ