ដោយ៖​ ស៊ុន​ ណារិន​ | ថ្ងៃព្រហស្បតិ៍ ទី17 កញ្ញា 2015, 02:51 PM​
http://vodhotnews.com

ពិធី​ដង្ហែ​សព​លោក ជា ស៊ីម​ កាលពី​ពេល​កន្លងមក

អដ្ឋិធាតុរបស់​អតីតប្រធាន​ព្រឹទ្ធសភា​ លោក ជា ស៊ីម នឹង​ត្រូវ​ដង្ហែយក​ទៅ​តម្កល់នៅខេត្ត​ព្រៃវែងដែល​ជា​ស្រុកកំណើ​ត​របស់លោក។​

​ថ្ងៃព្រហស្បតិ៍នេះជា​បុណ្យខួបគម្រប់១០០ថ្ងៃ ដើម្បីឧទ្ទិសកុសលជូនដល់ដួងវិញ្ញាណក្ខន្ធ​របស់​លោក ជា ស៊ីម​ អតីតប្រធានគណបក្ស​ប្រជាជនកម្ពុជា។​

សេចក្តីជូនដំណឹង​របស់​សាលារាជធានីភ្នំពេញ​ឲ្យ​ដឹង​ថា​នៅថ្ងៃ​ទី​១៨ខែកញ្ញា ឆ្នាំ​២០១៥​ នឹង​មាន​ការ​ដង្ហែ​អដ្ឋិធាតុ​រប​ស់​លោក ជា ស៊ីម ​ពី​ភូមិគ្រឹះនៅចំការមនចាប់ពីម៉ោង​៧ព្រឹក ឆ្ពោះទៅ​ស្រុកកំណើត​របស់លោកក្នុង​​ភូមិ​កន្លែង​ជ្រៅ ឃុំក្របៅ​ ស្រុកកំចាយ​មារ ខេត្ត​ព្រៃ​វែង។ សេចក្តីប្រកាស​បន្ត​ថា​កំណាត់​ផ្លូវ​នរោត្តម​ចាប់​ពីស្តុបក្រសួង​មហាផ្ទៃ​រហូត​ដល់​ស្តុប​ព្រះអង្គ​ឌួង ផ្លូវ​ក្រមួន​សរ កំណាត់មហាវិថី​ព្រះមុនីវង្ស​ចាប់ពីស្តុប​BKC​រហូត​ដល់​មុខ​ស្ថាន​ទូត​បារាំង ឆ្លងកាត់ស្ពា​នជ្រោយ​ចង្វារ​និង​ផ្លូវ​ជាតិ​លេខ​៦អា រួច​បទស្តាំ​ឆ្លង​កាត់ស្ពាន​ព្រែក​តាមាក់។

​គួរបញ្ជាក់​ថា ប្រធាន​គណបក្ស​ប្រជាជន​កម្ពុជា និង​ជា​ប្រធានព្រឹទ្ធសភា​លោក ជា ស៊ីម បាន​ទទួលមរណភាព​កាលពី​ម៉ោង​៣ និង​៤៥​នាទី រសៀល​ថ្ងៃ​ទី​៨ ខែមិថុនា ក្នុង​ជន្មាយុ​៨៣​ឆ្នាំ ដោយ​រោគាពាធ៕

សរសេរមកកាន់លោក ស៊ុន ណារិន តាមរយៈsun_narin@vodhotnews.com