តារាចម្រៀង ព្រាប សុវត្ថិ និងលោក ពុយ គា មន្រ្តីជាន់ខ្ពស់នៅសាកលវិទ្យាល័យអាមេរិកាំងភ្នំពេញ AUPP។ រូបថត ហ្វេសប៊ុក
Fri, 18 September 2015
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: នៅម៉ោងបីកន្លះរសៀលថ្ងៃនេះ តន្ត្រីចាប់ឆ្នោតផ្ដល់សំណាងលើកទឹកចិត្តសិស្សទើបនឹងប្រឡងជាប់បាក់ឌុបឆ្នាំ ២០១៥ ដែលជាតន្ត្រីដ៏កម្រ នឹងប្រគំឡើងយ៉ាងគ្រលួច គួចផ្តាំព្រះសូរិយា មុនយាងចូលទ្រនំ នៅក្នុងសាកលវិទ្យាល័យអាមេរិកាំងភ្នំពេញ (AUPP) ក្រោយវត្តមានជាពិសេសពីកំពូលតារាចម្រៀងឫកពាថ្លៃថ្នូរតែម្នាក់គត់ មកពីផលិតកម្មហង្សមាស លោក ព្រាប សុវត្ថិ ស្ម័គ្រ ផ្ដល់សំណាងផ្ទាល់។
វាពិតជាត្រេកអរណាស់សម្រាប់សិស្សានុសិស្ស ដែលទើបសម្រេចបានជយលាភី ក្រោយពីប្រើវេលាសិក្សាអស់រយៈពេល ១២ ឆ្នាំ ដែលកំពូលតារាចម្រៀងលោក ព្រាប សុវត្ថិ ក៏ស្ម័គ្រចូលខ្លួនមកជួយមួយផ្នែកទាំងផ្ដល់ការកម្សាន្ដអារម្មណ៍ និងផ្ដល់ឱកាសសិក្សា ក្រោមឈ្មោះអាហារូបករណ៍ផងនោះ។
បង្ហាញពីចំណាប់អារម្មណ៍ដែលលោកស្ម័គ្រចិត្តច្រៀងក្នុងកម្មវិធីប្រគំ តន្ត្រីចាប់ឆ្នោតផ្ដល់សំណាងលើកទឹកចិត្តសិស្សទើបនឹងប្រឡងជាប់បាក់ឌុបឆ្នាំ ២០១៥ តារាចម្រៀងចាស់វស្សាទីផ្សាររាងមាំលោក ព្រាប សុវត្ថិបានប្រាប់ថា៖ «ខ្ញុំជាអ្នកចម្រៀង គ្មានអ្វីដែលខ្ញុំអាចជួយបានផ្នែកអប់រំ ជំនាញខ្ញុំ(ច្រៀងរាំ) ហើយកាលដែលអាចជួយបានដល់ផ្នែកអប់រំពេលនេះក៏តាមរយៈជំនាញខ្ញុំដែរ»។
ជាមួយសម្ដីសារភាពដ៏មានអត្ថន័យនេះ កំពូលតារាចម្រៀងដែលទទួលបានប្រជាប្រិយភាព ក្នុងឋានៈជាគណៈកម្មការផ្តល់ពិន្ទុក្នុងកម្មវិធីប្រឡងចម្រៀងថ្នាក់អន្តរជាតិ នៅក្រោមដំបូលផលិតកម្មហង្សមាស លោក ព្រាប សុវត្ថិ បានថ្លែងបន្តថា៖ «មានការប្រគំតន្ត្រីនៅថ្ងៃនេះ ខ្ញុំស្ម័គ្រច្រៀងដោយមិនគិតថវិកាឡើយ ធ្វើឡើងសម្រាប់អបអរសិស្សជាប់បាក់ឌុបទាំងអស់។ ខ្ញុំជាអ្នកចាប់ឆ្នោតផ្សងសំណាង បើសិនប្អូនណាឈ្នះ គឺបានចូលរៀនដោយឥតបង់លុយរហូតចប់បរិញ្ញាបត្រនៅសាលាសាកលវិទ្យាល័យ AUPP»។
បន្តពីការបញ្ជាក់ថា សន្លឹកឆ្នោតនាំសំណាងដល់សិស្ស ដែលនឹងទទួលបានពីដៃរបស់លោកក្នុងការប្រគំតន្ត្រីថ្ងៃនេះ មានតែចំនួន ៨ សន្លឹក មិនអាចលើសបាននោះ កំពូលតារាចម្រៀងលោក ព្រាប សុវត្ថិ បានបង្ហើបពីជំហរបើកទូលាយក្នុងការស្ម័គ្រទទួលយកការប្រគំតន្ត្រីបែបនេះ ប្រសិនបើជាព្រឹត្តិការណ៍ជួយសង្គម ហើយពេលវេលាទំនេរពីការងារសិល្បៈដ៏មមាញឹករបស់លោកអំណោយផល។
លោក ព្រាប សុវត្ថិ លើកឡើងថា៖ «ការប្រគំតន្ត្រីបែបនេះ ជួយជំរុញទឹកចិត្តសិស្សក្រីក្របានច្រើនដល់ការរៀនសូត្រ ឬជួយក្មេងកំព្រា និងសិស្សជាប់និទ្ទេសល្អអីជាដើម។ ប្រសិនបើជាខាងសាលាផ្សេងៗគាត់មានកម្មវិធីប្លែកៗ លើកទឹកចិត្តសិស្សនោះ យើងអាចសិក្សា និងសហការគ្នាបាន។ ក្នុងន័យរៀបចំកម្មវិធីបែបហ្នឹង ចំពេលខ្ញុំទំនេរផងដែរ»។
នេះមិនមែនជាលើកទីមួយឡើយដែលកំពូលតារាចម្រៀង ព្រាប សុវត្ថិ ស្ម័គ្រចិត្តច្រៀងមិនគិតកម្រៃ ហើយកន្លងមកលោកក៏ធ្លាប់បានបរិច្ចាគប្រាក់ផ្ទាល់ខ្លួនខ្ទង់ពាន់ដុល្លារជួយដល់មន្ទីរពេទ្យគន្ធបុប្ផា និងកាកបាទក្រហមទៀតផង។
បង្ហាញពីទឹកចិត្តមនុស្សធម៌ដែលមិនបានផ្សព្វផ្សាយ លោករៀបរាប់ឲ្យដឹងថា៖ «ខ្ញុំធ្លាប់បានជួយកុមារកំព្រានានាជាច្រើន ដែលគាត់ខ្វះខាត គ្មានទីពឹងមិនអាចធ្វើឲ្យជីវិតរុងរឿងបាន។ ខ្ញុំបានយកគាត់ទៅដាក់តាមអង្គការនានា និងស្នើសុំឲ្យអង្គការជួយជាដើម»៕