ដោយ៖ ញឹម សុខន | ថ្ងៃព្រហស្បតិ៍ ទី8 តុលា 2015, 04:36 PM
http://vodhotnews.com
ស្តាប់សំឡេង៖ |
ចម្លងទុក |
លោក អ៊ិត សូធឿត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ
ទីបំផុត ប្រាក់ឈ្នួលគោលរបស់កម្មករក្នុងវិស័យកាត់ដេរសម្រាប់ឆ្នាំ២០១៦ត្រូវប្រកាសជាផ្លូវការនៅថ្ងៃព្រហស្បតិ៍នេះ ដោយដំឡើងជាង១០ដុល្លារបន្ថែម ដែលសរុបកើនដល់១៤០ដុល្លារ ខណៈកម្មករទាមទារ១៦០ដុល្លារទើបអាចទ្រទ្រង់ជីវភាពពួកគេឲ្យរស់នៅសមរម្យបាន។
ក្រោយបោះឆ្នោតសម្ងាត់នៅក្រសួងការងារ នាព្រឹកថ្ងៃទី៨ ខែតុលានេះ គណៈកម្មការប្រឹក្សាការងារប្រកាសថា ២៤សំឡេងគាំទ្រឲ្យដំឡើងប្រាក់ឈ្នួល១៣៥ដុល្លារ ២សំឡេងគាំទ្រឲ្យដំឡើងដល់១៦០ដុល្លារ និង២សំឡេងអនុបវាទ។
បើតាមអ្នករៀបចំកម្មវិធី គណៈកម្មការប្រឹក្សាការងារនេះមាន២៨រូបចូលរួមបោះឆ្នោតនេះ ក្នុងនោះមកពីសហជីព៧រូប មកពីតំណាងនិយោជក៧រូប និង១៤រូបតំណាងរដ្ឋាភិបាល។
ភ្លាមៗនោះ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង ប្រកាសថាលោកនាយករដ្ឋមន្ត្រី ហ៊ុន សែន បានបន្ថែម៥ដុល្លារពីលើ១៣៥ដុល្លារ ធ្វើឲ្យប្រាក់ខែគោលកើនដល់១៤០ដុល្លារ។ លោកថាប្រាក់ឈ្នួលនេះ នឹងចាប់អនុវត្តពីថ្ងៃ១ ខែមករា ឆ្នាំ២០១៦តទៅ។ លោកថ្លែងថា៖ “បន្ថែមពីលើ១៣៥ដុល្លារសហរដ្ឋអាមេរិកនេះ គឺសម្តេចតេជោនាយករដ្ឋមន្ត្រីនៃព្រះរាជាណាចក្រកម្ពុជារបស់យើង លោកបានផ្តល់បន្ថែម៥ដុល្លារបន្ថែមទៀត។ ដូច្នេះប្រាក់ខែគោលអប្បបរិមាប្រចាំឆ្នាំ២០១៦ គឺ១៤០ដុល្លារសហរដ្ឋអាមេរិក”។
ប្រធានសភាពការងារកម្ពុជា លោក អត់ ធន់ ដែលបានចូលរួមបោះឆ្នោតដែរអះអាងថាបើទោះបីលោកបានបោះឆ្នោតគាំទ្រឲ្យដំឡើងប្រាក់ឈ្នួលនេះបានដល់១៦០ដុល្លារក៏ដោយ ប៉ុន្តែលោកថាសមាសភាពនៃគណៈកម្មការប្រឹក្សាការងារនេះ ភាគច្រើនគាំទ្រខាងនិយោជក រួមទាំងសហជីពមួយចំនួនដែលមានសិទ្ធិបោះឆ្នោតនេះផងដែរ។
លោក អាត់ ធន់ យល់ថាកម្រិតប្រាក់ឈ្នួលអប្បរមាមានត្រឹម១៤០ដុល្លារនេះ នៅតែមិនអាចដោះស្រាយជីវភាពកម្មករឲ្យប្រសើរនៅឡើយ៖ “យើងមើលតាមវិទ្យាស្ថានជាតិស្ថិតិ គឺកម្មកររស់បាននៅក្នុងរាជធានីគឺ១៤២ដុល្លារនៅឆ្នាំ២០១៣ ហើយមកដល់ឆ្នាំហ្នឹង វាកើនដល់១៥៨ដុល្លារយ៉ាងតិច។ ហើយតាមការស្រាវជ្រាវរបស់អ្នកសេដ្ឋកិច្ចឆ្នាំហ្នឹងរកឃើញថា ២០៧,៥ដុល្លារ ប៉ុន្តែយើងបានបញ្ចុះមកដល់ត្រឹម១៦០ដុល្លារ។ ប៉ុន្តែទោះបីយ៉ាងណាក៏ដោយ មកដល់ពេលនេះលេខ១៦០របស់យើង មិនបានជោគជ័យនៅក្នុងការបោះឆ្នោតទេ ដោយសារតែនៅក្នុងគណៈកម្មការ យើងដឹងថាមានមនុស្សភាគច្រើនគឺនិន្នាការនយោបាយខាងរដ្ឋាភិបាល និងនិន្នាការខាងក្រុមហ៊ុន”។
កិច្ចប្រជុំនៅក្រសួងការងារស្តីពីប្រាក់ខែគោលកម្មករ កាលពីព្រឹកមិញ
គណបក្សប្រឆាំងនិងសហជីពមួយចំនួន កន្លងមកបានដឹកនាំកម្មករធ្វើបាតុកម្មទាមទារប្រាក់ឈ្នួល១៦០ដុល្លារ ប៉ុន្តែត្រូវបានបាញ់បង្ក្រាបដោយកម្លាំងរដ្ឋាភិបាល។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ អះអាងថាបើទោះជាពេលនេះ ប្រាក់ឈ្នួលកម្មករត្រូវលោក ហ៊ុន សែន អន្តរាគមន៍បន្ថែម៥ដុល្លារឲ្យបានដំឡើងដល់១៤០ដុល្លារ តែលោកថាមិនទាន់ឆ្លើយតបនឹងតម្រូវការចាំបាច់របស់កម្មករនោះទេ៖ “តាមលក្ខណៈវិទ្យាសាស្ត្រ ស្ថានភាពថ្លៃទំនិញ តម្លៃរស់នៅសេវាសាធារណៈដែលអាចធ្វើឲ្យកម្មកររស់នៅបានដោយសមរម្យនោះ គឺ១៦៨ដុល្លារយ៉ាងតិច។ ប៉ុន្តែប្រសិនជាក្រោម(១៦៨ដុល្លារ)នោះ គាត់នៅមានការខ្វះខាត”។
យ៉ាងណាក៏ដោយ រដ្ឋមន្ត្រីក្រសួងការងារ លោក អ៊ិត សំហេង អះអាងថាប្រាក់ឈ្នួលត្រឹម១៤០ដុល្លារនេះ មិនទាន់បំពេញតម្រូវការទាំងស្រុងរបស់កម្មករទេ ប៉ុន្តែលោកថាកម្រិតប្រាក់ឈ្នួលដែលបានដំឡើងសម្រាប់ឆ្នាំ២០១៦នេះ នឹងអាចជួយសម្រួលបន្ទុកកម្មករបានមួយកម្រិតទៀត។ លោកថាការដំឡើងបានត្រឹមនេះ ដើម្បីធានាលទ្ធភាពឲ្យនិយោជកក្នុងការប្រកួតប្រជែងទីផ្សារជាមួយបណ្តាប្រទេសនានា៕
សូមសរសេរមកលោក ញឹម សុខន តាមរយៈ sokhorn@vodhotnews.com