ដោយ៖ ស៊ុន ណារិន | ថ្ងៃចន្ទ ទី2 វិច្ឆិកា 2015
http://vodhotnews.com
លោក ហ៊ុន ម៉ានី និងលោក ហោ ណាំហុង ក្នុងពិធីប្រគល់លិខិតបញ្ជាក់ (រូបថតពីហ្វេសប៊ុករបស់លោក ហ៊ុន ម៉ានី)
សហភាពសហព័ន្ធយុវជនកម្ពុជា(ស.ស.យ.ក)ដែលដឹកនាំដោយកូនប្រុសរបស់នាយករដ្ឋមន្រ្តី ត្រូវបានក្រសួងការបរទេសជ្រើសរើសជាតំណាងប្រទេសកម្ពុជា ក្នុងការទទួលពានរង្វាន់ប្រជាជនអាស៊ាន(ASEAN people’s Award) ដែលនឹងត្រូវធ្វើឡើងនៅទីក្រុងកូឡាឡាំពួរនៃប្រទេសម៉ាឡេស៊ី។
បើតាមលិខិតបញ្ជាក់ដែលចេញដោយក្រសួងការបរទេសកម្ពុជា គណៈកម្មាធិការជ្រើសរើសរង្វាន់ប្រជាជនអាស៊ាននៃក្រសួងការបរទេស បានសម្រេចជ្រើសរើសសហភាពសហព័ន្ធយុវជនកម្ពុជា ដោយផ្អែកលើលក្ខខណ្ឌមួយចំនួនកំណត់ដោយប្រទេសម៉ាឡេស៊ី។ លិខិតបន្តថាសហព័ន្ធមាន”ស្នាដៃលេចធ្លោរក្នុងការចូលរួមចំណែកយ៉ាងសកម្មក្នុងការអភិវឌ្ឍសង្គមនិងយុវជន ព្រមទាំងបានលើកកម្ពស់ទំនាក់ទំនងជាមិត្តភាពនិងសហប្រតិបត្តិការជាមួយប្រទេសសមាជិកអាស៊ាននិងសហគមន៍អន្តរជាតិ”។ សហព័ន្ធត្រូវបានជ្រើសរើសជាជ័យលាភីជាតិ ដើម្បីទទួលរង្វាន់ប្រជាជនអាស៊ាន ដែលនឹងប្រព្រឹត្តទៅនៅថ្ងៃទី២១ខែវិច្ឆិកា។
រដ្ឋមន្រ្តីក្រសួងការបរទេសកម្ពុជា លោក ហោ ណាំហុង បានថ្លែងនៅពេលប្រគល់លិខិតបញ្ជាក់ទៅសហភាពសហព័ន្ធយុវជនកម្ពុជានៅព្រឹកថ្ងៃចន្ទនេះថាក្រសួងបានប្រកាសយ៉ាងទូលំទូលាយឲ្យមានការដាក់ពាក្យចូលរួមប្រកួតប្រជែង ដោយថាមានអង្គការសង្គមស៊ីវិលនិងបុគ្គល”ច្រើនដែរ”ចូលរួម។ លោកបន្តថាគណៈកម្មការបាន”ពិនិត្យពិច័យបេក្ខជនយ៉ាងយកចិត្តទុកដាក់” ហើយបានសម្រេចយកសហភាពសហព័ន្ធយុវជនមួយនេះ ដោយយល់ថាសហភាពបានចូលរួមចំណែកក្នុងការរក្សាវប្បធម៌ ជួយសង្គម យុវជន និងការចូលរួមចំណែកដល់សហគមន៍អាស៊ាន។ លោកចាត់ទុកការជ្រើសរើសសហភាពសហព័ន្ធយុវជនកម្ពុជា”ជាជាការសមស្របបំផុតដែលស.ស.យ.ក បានទទួលជ័យលាភីនេះ”។
បើតាមលោក ហោ ណាំហុង ការជ្រើសរើសផ្អែកលើការចូលរួមចំណែកជួយដល់សង្គម វប្បធម៌ ការចូលរួមចំណែកក្នុងការងារអាស៊ាននិងសហគមន៍អាស៊ានតែមួយនិងការចូលរួមចំណែកអភិវឌ្ឍប្រទេស។
កូនប្រុសរបស់លោក ហ៊ុន សែន និងជាប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី មានប្រសាសន៍ថានេះជាមោទនភាពមួយសម្រាប់សហភាពនិងប្រជាជាតិកម្ពុជា។ លោកបន្តថាលោកអរគុណដែលក្រសួងការបរទេសផ្តល់ជំនឿទុកចិត្តលើអ្វីដែលសហភាពបានធ្វើ។ លោកបន្ថែមថាសហភាពបានរៀបចំជាព្រឹត្តិការណ៍មួយហៅថាមហាស្របវប្បធម៌ យុវជនអន្តរជាតិ ដែលលោកថានេះជាការចូលរួមចំណែកមួយរបស់សហព័ន្ធក្នុងការងារយុវជនអាស៊ាន។
បើតាមសេចក្តីប្រកាសព័ត៌មានរបស់ក្រសួងការបរទេស រង្វាន់ប្រជាជនអាស៊ាននេះមានតម្លៃជាទឹកប្រាក់១ម៉ឺនដុល្លារ៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com