សានសាណា និងគូស្នេហ៍បណ្ដើរគ្នាទៅ ២ កម្មវិធីជាប់ៗគ្នា។ ហ្វេសប៊ុក វុទ្ធី
Tue, 3 November 2015
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: ទាំងមហាជនក៏សង្កេតឃើញថា ទំនាក់ទំនងរវាងពិធីការិនីកូនពីរអ្នកនាង ខៀវ សានសាណា និងលោក Seraj Sutton អ្នកគ្រប់គ្រងជាន់ខ្ពស់របស់ក្រុមហ៊ុន Herbalife Cambodia ក៏កាន់តែមានភាពស្និទ្ធស្នាល បណ្តើរគ្នាស្និទ្ធស្អិតកៀកកិតមិនឃ្លាតគ្នាមួយជំហានបែបនោះក្តី ប៉ុន្តែនាង ខៀវ សានសាណា បុប្ផាខ្មែររាងរៅតូចច្រឡឹងឆ្វាក់ស្នេហ៍កន្លង់អឺរ៉ុបរូបនេះ តែងពោលយ៉ាងទទូចសុំមិនបរិយាយទេ ពីជុំវិញរឿងស្នេហានេះ។
ស្នេហាទីពីរជាមួយបុរសពោះម៉ាយជនជាតិអូស្រ្តាលី វ័យ ៦០ ឆ្នាំ លោក Seraj Sutton អ្នកគ្រប់គ្រងជាន់ខ្ពស់របស់ក្រុមហ៊ុនអាហារបំប៉ន Herbalife Cambodia ជាមួយពិធីការិនីកូនពីរមាឌល្អិតសម្ដីស្រួយស្រែសនាង ខៀវ សានសាណា បានផ្ទុះឡើងជិត ២ ឆ្នាំ ហើយ ហើយក៏ធ្លាប់ល្បីថា បុរសស្បែកសបរទេសរូបនេះ មានគម្រោងដឹកដៃសិល្បការិនីខ្មែរមាឌល្អិតនាង ខៀវ សានសាណា ចូលរោងការផងដែរកាលពីអំឡុងពាក់កណ្តាលឆ្នាំ ២០១៤។
ប៉ុន្តែ យ៉ាងណាដំណឹងដ៏រំជើបរំជួលនេះ ប្រែស្ងប់រលត់ជាមួយព័ត៌មានចចេកចចូចក៏សាយភាយឡើងថា ចំណងស្នេហ៍រវាងអ្នកនាងខៀវ សានសាណា និងលោក Seraj Sutton អ្នកគ្រប់គ្រងជាន់ខ្ពស់ប្រចាំក្រុមហ៊ុននេះ មានគម្រោងរៀបការបើកចំហកាលពីអំឡុងចុងឆ្នាំ ២០១៤។ ប៉ុន្តែរហូតមកទល់ពេលនេះ មានដំណឹងថានាង ខៀវ សានសាណា និងអតីតស្វាមីឪពុកកូនទាំងពីរនោះ មិនមានលិខិតលែងលះឡើយ ទើបធ្វើឲ្យលោក Seraj Sutton បាត់បង់ទំនុកចិត្ត។
ពិធីការិនី ខៀវ សានសាណា។ ភ្នំពេញ ប៉ុសិ៍្ត
បើទោះជាយ៉ាងណា ពីមួយថ្ងៃទៅមួយថ្ងៃ ពិសេសពេលមានកម្មវិធីសិល្បៈអ្នកនាង ខៀវ សានសាណា និង បុរសជនជាតិអូស្រ្តាលី លោក Seraj Sutton ហាក់បានបង្ហាញពីស្និទ្ធស្នាលនឹងគ្នាកាន់តែខ្លាំងជាងមុន។
ជាមួយគ្នានោះ ពិធីការិនីកូនពីររាងតូចច្រឡឹង មានកំណើតពីទឹកដីជនបទខេត្តព្រៃវែង អ្នកនាង ខៀវ សានសាណា ពេលខ្លះក៏ធ្លោយមាត់ ហៅ លោក Seraj Sutton ថាជាប្តីពេញៗមាត់ហើយដែរ។
ជាក់ស្តែងនៅកាលពីរាត្រីថ្ងៃទី ២៩ ខែតុលា គូស្នេហ៍ខុសសញ្ជាតិអ្នកនាង ខៀវ សានសាណា និង លោក Seraj Sutton ជនជាតិអូស្រ្តាលី ក្រោយពីបណ្តើរគ្នាក្នុងទឹកមុខញញឹមពព្រាយទៅចូលរួមពិធីកាត់ចំណងដៃតារាសម្តែង សុវណ្ណ មករា និង តារាចម្រៀង ឈិន ចាន់សុធារី នៅសណ្ឋាគារកាំបូឌីយ៉ាណានោះ គូស្នេហ៍ទាំងពីរនេះក៏បានបណ្តើរគ្នាបន្តទៅចូលរួមពិធីបុណ្យហាឡូវីនបែបបស្ចិមប្រទេស និងបានឱបថើបគ្នាស្និទ្ធស្នាលដូចគូស្នេហ៍រួមរស់តាមគន្លងប្រពៃណីរួចហើយ។
បើទោះជារូបភាព និងសកម្មភាពបានបង្ហាញថា គូស្នេហ៍នេះកាន់តែមានភាពស្និទ្ធស្នាលផ្អែមល្ហែមនឹងគ្នាយ៉ាងដូច្នេះក្តី ប៉ុន្តែតារាស្រីល្បីឆ្វាក់ស្នេហ៍បុរសបរទេស អ្នកនាង ខៀវ សានសាណា សុំមិនបរិយាយឡើយពីចំណងស្នេហានេះ ដោយនាងបញ្ជាក់ប្រាប់ភ្នំពេញ ប៉ុស្តិ៍ ដោយសម្ដីម៉ាត់ៗថា៖ «សូមទោសបង បើសួររឿងការងារសិល្បៈឬក៏របររកស៊ីអីខ្ញុំអាចនិយាយបាន។ ប៉ុន្តែបើសួរនាំរឿងស្នេហាមួយហ្នឹងខ្ញុំសូមមិននិយាយទាំងអស់»។
បន្ថែមលើសម្ដីលើកឡើងនេះ ដែលស្នើសុំមិនបើកកកាយពីអាថ៌កំបាំងស្នេហ៍ ទាំងស្នេហ៍អតីតកាល និងបច្ចុប្បន្នកំពុងបង្អួតភ្នែកមហាជននោះ នាង ខៀវ សានសាណា ប្រាប់ថា៖ «មែន! បងសុំមិនចង់និយាយទេពីជីវិតស្នេហ៍ បើទោះជាថាម៉េចក៏ថាទៅ សូមមិននិយាយទេ ទុកជារឿងអាថ៌កំបាំងមួយក៏ថាទៅ»។
គួររំឭកថា ក្រោយបែកស្វាមីជាជនជាតិកាណាដាជាង ២ ឆ្នាំ ដោយបន្សល់ទុកនូវចំណងនិស្ស័យកូនប្រុសស្រីពីរនាក់នោះ ពិធីការិនីនាង ខៀវ សានសាណា តែងព្យាយាមមិនបរិយាយរឿងចំណងស្នេហ៍ថ្មីឡើយ បើទោះជាមានការបណ្ដើរគ្នាយ៉ាងបើកចំហ រហូតនាងធ្លោយមាត់ហៅបុរសនោះថា ប្ដីៗពេញមាត់ក្ដី៕