ដោយ៖ ស៊ុន ណារិន | ថ្ងៃសុក្រ ទី25 ធ្នូ 2015, 05:43 PM
http://vodhotnews.com
អាជ្ញាធរពាក់ព័ន្ធខេត្តពោធិ៍សាត់បានអះអាងថាប្រជាពលរដ្ឋប្រមាណ៤៥នាក់ក្នុងនោះមានក្មេងនិងទារកផងនោះចាប់ផ្តើមឈឺជាបន្តបន្ទាប់ ដោយសង្ស័យថាពុលចំណីអាហារឬទឹកក្រូចដែលពួកគេបានពិសារពេលចូលរួមពិធីការតាមរបៀបសែនព្រេនមួយកាលពីថ្ងៃទី២១ ខែធ្នូ។
មេភូមិតាំងគោក ក្នុងឃុំតាលោក ស្រុកបាកាន ខេត្តពោធិ៍សាត់ លោក ហាក់ ផល មានប្រសាសន៍ថារបាយការណ៍ដែលលោកទទួលបាន មនុស្ស៤៥នាក់នៅតំបន់បឹងគូបានឈឺនិងក្នុងនោះ៨នាក់ឈឺធ្ងន់ហើយត្រូវបានបញ្ជូនមកភ្នំពេញ ដើម្បីសម្រាកព្យាបាល។ លោកបន្តថាប្រជាពលរដ្ឋដែលឈឺនោះពិតជាបានទៅហូបការហើយពួកគេចាប់ផ្តើមឈឺកាលពីព្រឹកថ្ងៃទី២២រហូតដល់ថ្ងៃទី២៤ ខែធ្នូ។ លោកបន្តថា៖ “មិនទាន់ដឹងថាមកពីពុលទឹកក្រូចឬម្ហូបទេ តែដឹងថាអ្នកឈឺនោះគាត់ទៅហូបការ។ មានខ្លះក្មេងអាយុ៦ខែ ២ឆ្នាំ ក៏ពុលដែរ ប្រហែលជាបៅដោះម្តាយហើយ”។ លោកបញ្ជាក់ថា៖ “អ្នកខ្លះហើមពោះ ហល់ពោះ ចុកដៃជើង ឈឺក្បាល ទឹកនោម ក្រហម ក្រហមខ្មៅ ហើយពេទ្យថាខ្វះឈាម ពេលទៅពិនិត្យ”។
មេឃុំតាលោ លោក យ៉ាំ យ៉េន មានប្រសាសន៍ថាអ្នកឈឺខ្លះបានរាករួស ក្អួតនិងនោមមកចេញឈាម។ លោកបន្តថាអ្នកដែលឈឺទាំងនោះបានទៅចូលរួមពិធីសែនព្រេនមួយ ហើយពិសារទឹកក្រូចនិងម្ហូប។ លោកបញ្ជាក់ថា៖ “ផឹកទឹកក្រូចដបកូកាកូឡា ចំណុះ១,២៥(លីត្រ) អាដបជ័រហ្នឹង និងអាទឹកក្រូចតូចៗ រសជាតិស្រ្តបឺរីអីគេនោះ”។ លោកបន្ថែមថា៖ “គេផឹកតាំងពីថ្ងៃទី២១ តែទើបព្រឹកថ្ងៃទី២២ វាចាប់ផ្តើមឈឺ។ បងប្អូនខ្លះគេយកអាទឹកក្រូចសល់ៗ មកហូបតនៅផ្ទះទៀត”។ ខ្ញុំមិនទាន់ដឹងថាមូលហេតុអីទេ។ គេកំពុងស្រាវជ្រាវថាមកពីហូបអីផ្សេងឬហូបទឹកក្រចហ្នឹង”។
មេប៉ុស្តិ៍តាឃុំតាលោ លោក រ៉ង សុវណ្ណារឿន មានប្រសាសន៍ថាបើតាមរបាយការណ៍របស់លោក ក្នុងចំណោមមនុស្ស៤៥នាក់នោះ មានតែ៣៦នាក់ប៉ុណ្ណោះដែលឈឺដោយសង្ស័យថាពុលទឹកក្រូចឬម្ហូប។ លោកលើកឡើងបែបនេះតាមការបញ្ជាក់របស់ពេទ្យ។ លោកបន្តថាក្មេងឈឺក្រោមអាយុ១៣ឆ្នាំ មាន១៧នាក់ ដែលមានទាំងក្មេងអាយុ៤ខែនិង៦ខែទៀតផង។ លោកបញ្ជាក់បន្ថែមថាពេទ្យនៅស្រុកបញ្ជាក់ថាអាចមកពីពុលម្ហូបដែលពួកគេពិសារនៅពេលចូលរួមពិធីមង្គលការ។
លោកមានប្រសាសន៍ថា៖ “មិនទាន់ហ៊ានសន្និដ្ឋានយ៉ាងម៉េចទេ។ តែគ្រាន់ថាពេទ្យស្រុកគេសង្ស័យថាមកពីពុលម្ហូប តែមិនច្បាស់ទេថាពុលម្ហូបឬទឹកក្រូចម៉ាកដបជ័រកូកាកូឡានិងទឹកក្រូចដបជររសជាតិស្ត្ររបឺរី”។ លោកបញ្ជាក់ថារហូតមកដល់ពេលនេះ មន្ទីរសុខាភិបាលខេត្តកំពុងតែពិនិត្យរកមូលហេតុ។
វីអូឌីមិនទាន់អាចសុំការបញ្ជាក់ពីអ្នកនាំពាក្យក្រសួងសុខាភិបាល លោក លី សូវ៉ាន់ បាននៅឡើយទេ។
គួរបញ្ជាក់ថាថ្មីៗនេះ ប្រជាពលរដ្ឋនៅខេត្តក្រចេះ១៣នាក់បានស្លាប់ ដោយសារការទទួលទានស្រាស ហើយក្រសួងសុខាភិបាលបញ្ជាក់ថាស្រាសនោះមានជាតិមេតាណុលក្នុងស្រាកម្រិតខ្ពស់ពី១០%ទៅ ១២%។ ភ្លាមៗនោះ លោកនាយករដ្ឋមន្រ្តី ហ៊ុន សែន បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្ននឹងការបរិភោគចំណីអាហារ។ លោកបន្តថាអាជ្ញាធរមានការទទួលខុសត្រូវក្នុងការត្រួតពិនិត្យសុវត្ថិភាពចំណីអាហារនៅលើទីផ្សារ ប៉ុន្តែមិនអាចតាមដានប្រជាពលរដ្ឋម្នាក់ៗនោះទេ។ លោកមានប្រសាសន៍ថា៖ “សូមប្រជាពលរដ្ឋ មានការប្រុងប្រយ័ត្នចំពោះម្ហូបអាហារ។ ម្ហូបអាហារលក់តាមទីផ្សារត្រូវបានកាំកុងត្រូលធ្វើការត្រួតពិនិត្យជាប្រចាំ។ ម្ហូបអាហារណាដែលវាហួសកាលកំណត់។…មានតែប្រជាពលរដ្ឋខ្លួនឯងតែប៉ុណ្ណោះដែលអាចការពារអាយុជីវិតខ្លួនឯងបាន”។ លោកបន្ថែមថា៖ “អាជ្ញាធរអាចធ្វើបានត្រឹមកម្រិតណាតែប៉ុណ្ណោះ។ក៏ប៉ុន្តែអ្នកទទួលទាននិងអ្នកផឹកពិតប្រាកដគឺប្រជាពលរដ្ឋ។ ពិតហើយអាជ្ញាធរត្រូវមានការទទួលខុសត្រូវទៅលើសុវត្ថិភាពនៃចំណីអាហារ។ ក៏ប៉ុន្តែបើសិនជាប្រជាពលរដ្ឋម្នាក់ៗ គឺអត់ទាំងទទួលខុសត្រូវខ្លួនឯង លើចំណុចខ្លួនឯងផង ហើយមកបន្ទោសតែរាជរដ្ឋាភិបាលដឹកនាំមិនកើត ក៏វាអត់ត្រូវ”៕
សរសេរមកកាន់លោក ស៊ុន ណារិន តាមរយៈ sun_narin@vodhotnews.com