ដោយ ឡេង ម៉ាលី
2016-01-04
RFA
ស្ដាប់ ឬ ទាញយកសំឡេង
គណៈកម្មការចំពោះកិច្ចចម្រុះគណបក្សប្រជាជនកម្ពុជា និងគណបក្សសង្គ្រោះជាតិ បើកកិច្ចប្រជុំពិភាក្សាគ្នាអំពីសេចក្ដីព្រាងច្បាប់ស្ដីពីសហជីពដ៏ចម្រូងចម្រាស នៅរសៀលថ្ងៃទី៤ មករា។ មន្ត្រីតំណាងគណបក្សទាំងពីរបញ្ជាក់ថា កិច្ចប្រជុំប្រព្រឹត្តទៅល្អ បើទោះជាមិនបានសម្រេចអ្វីច្រើនក្ដី។
តំណាងគណៈកម្មការចំពោះកិច្ចគណបក្សទាំងពីរ ថ្លែងបន្ទាប់ពីប្រជុំនៅរសៀលថ្ងៃទី៤ មករា ថា គណៈកម្មការចំពោះកិច្ចបានពិនិត្យ ពិភាក្សា និងបានឯកភាពគ្នាលើខ្លឹមសារក្នុងមាត្រាចំនួន២ នៃសេចក្ដីព្រាងច្បាប់ស្ដីពីសហជីពដ៏ចម្រូងចម្រាសមួយនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ជាលទ្ធផល គឺគណៈកម្មការផ្ដល់យោបល់លើមាត្រា៣ និងមាត្រា៤ ដែលនិយាយពីវិសាលភាពកម្មករអាចចូលជាសមាជិកសហជីពបាន និងកម្មករមានគ្នាប៉ុន្មាននាក់ ទើបអាចបង្កើតសហជីពបាន៖ «(មាត្រា៣) និយាយពីវិសាលភាពនៃការដាក់បញ្ចូលអ្វីទៅដែលជាសមាជិកភាពនៃអង្គការសហជីព ហើយទី៤ និយាយពីរចនាសម្ព័ន្ធរបស់សហជីពដែលមានចែងនៅក្នុងច្បាប់ហើយ គឺថាយ៉ាងតិច ១០នាក់ បានបង្កើតសហជីពមូលដ្ឋានមួយបាន ហើយបន្ទាប់មកយើងបង្កើតសហព័ន្ធសហជីព គឺថាពីមុនមាន ៩ យើងអាចសម្រួលដាក់ត្រឹម ៧ ហើយនិងសហភាពសហព័ន្ធសហជីព គឺចុះមកនៅត្រឹម ៥។ អានេះជាការផ្ដល់យោបល់ទេ មិនមែនគណៈកម្មការចំពោះកិច្ចហ្នឹងសម្រេចទេ គ្រាន់តែថាឯកភាពគ្នាលើចំណុចប៉ុណ្ណឹង ដើម្បីដាក់ជូនយោបល់ទៅសភាពេញអង្គទាំងមូល»។
សេចក្ដីព្រាងច្បាប់ស្ដីពីសហជីព ដែលមាន ១៧ជំពូក និង ១០០មាត្រា មានភាពចម្រូងចម្រាសខ្លាំង នៅពេលដែលរដ្ឋាភិបាលបញ្ជូនសេចក្ដីព្រាងច្បាប់នេះមករដ្ឋសភាក្នុងពេលថ្មីៗកន្លងទៅនេះ ជាពិសេសក្រុមអង្គការសហជីពកម្មករ និងអង្គការសង្គមស៊ីវិល មានប្រតិកម្មខ្លាំង ដោយសារតែគេយល់ថា ច្បាប់នេះមានលក្ខណៈរឹតត្បិតលើសេរីភាពសមាគមកម្មករ គឺការបង្កើតសហជីព។ បន្ថែមលើនេះទៀត ក្រុមសហជីពចំនួន១០ បានរួមគ្នាស្នើសុំទៅគណៈកម្មការរដ្ឋសភា ឲ្យពិនិត្យកែលំអសេចក្ដីព្រាងច្បាប់ស្ដីពីសហជីពចំនួន ២១ចំណុច។ ចំណុចចាប់ផ្ដើមសំខាន់ គឺការកំណត់ចំនួនសមាជិក ដើម្បីបង្កើតសហជីព។
ប្រធានពីតំណាងគណៈកម្មការចំពោះកិច្ចគណបក្សសង្គ្រោះជាតិ លោក សុន ឆ័យ បញ្ជាក់បន្ថែមថា មាត្រា៣ ស្ដីពីវិសាលភាពច្បាប់នេះដែលនិយាយផ្ដោតតែលើកម្មកររោងចក្រនោះ គឺខាងសហជីពកម្មករសុំឲ្យដាក់បញ្ចូលកម្មករសេដ្ឋកិច្ចក្រៅប្រព័ន្ធផង ជាពិសេសកម្មករបម្រើការងារតាមផ្ទះ។ លោកបន្តថា គណៈកម្មការយល់ស្របគ្នាលើចំណុចសំខាន់ថា គួរតែមានច្បាប់មួយទៀតសម្រាប់ការពារកម្មករតាមផ្ទះ ព្រោះច្បាប់សហជីពនេះផ្ដោតតែលើកម្មករប្រមូលផ្ដុំ៖ «ហើយយើងថា ជំរុញរៀបចំឲ្យមានច្បាប់យ៉ាងណា អានោះគឺជាចំណុចដែលយើងធ្វើបន្ត ក៏ប៉ុន្តែព្រមព្រៀងថា កម្មករសេដ្ឋកិច្ចក្រៅប្រព័ន្ធ គឺមានសិទ្ធិចូលជាសមាជិកបាន។ អាហ្នឹងខ្ញុំថា យើងនឹងរកមាត្រាដទៃទៀត ដើម្បីយើងបន្ថែមនៅក្នុងចំណុចនេះ ព្រោះចំណុចនេះសំខាន់ណាស់ ព្រោះខាងសហជីពទាមទារថា យ៉ាងហោចណាស់ឲ្យគ្នាមានសិទ្ធិចូលសហជីពដែរ ដើម្បីឲ្យមានអង្គការមួយជួយការពារគ្នា។ ឧទាហរណ៍ គ្នានៅរប៉ាត់រប៉ាយ ហើយគេធ្វើបាបមិនទៅពឹងនរណា យ៉ាងហោចណាស់គាត់សមាជិកទៅ គឺសហជីពអាចជួយគាត់បាន។ នេះជាចំណុចនៃមាត្រា៣»។
លោកឲ្យដឹងទៀតថា ចំពោះលក្ខខណ្ឌចុះបញ្ជីសហជីពដែលពីមុនតម្រូវឲ្យមានអាសយដ្ឋានសៀវភៅធនាគារនោះ គឺឥឡូវ គណៈកម្មការចំពោះកិច្ចនេះព្រមព្រៀងគ្នាផ្ដល់យោបល់ថា យកត្រឹមតែអាសយដ្ឋានទីតាំងសហជីពទេ ប៉ុន្តែលោកថា ចំណុចនេះត្រូវកែពាក្យឲ្យច្បាស់។ ទាក់ទងនឹងតម្រូវឲ្យបញ្ជូនបញ្ជីហិរញ្ញវត្ថុសហជីពទៅក្រសួងនៅក្នុងរយៈពេល ៣០ថ្ងៃនោះ បានកែទៅជា ៤៥ថ្ងៃ។ ចំណុចនេះ គឺគណៈកម្មការនឹងត្រូវរង់ចាំការឆ្លើយតបពីក្រុមសហជីពទៀត។
លោក សុន ឆ័យ ឲ្យដឹងថា ចំណុចសំខាន់មួយទៀតដែលនៅមិនទាន់មានឯកភាពគ្នា គឺមាត្រា១៣។ មាត្រានេះ គឺនិយាយអំពីការសម្រេចធ្វើកូដកម្មរបស់កម្មករ តម្រូវឲ្យសហជីពទទួលសំឡេងពីសមាជិកចូលរួមប្រជុំយ៉ាងតិចចំនួន ៥០% បូក ១ ទើបធ្វើបាន។ សមាជិកគណៈកម្មការពីគណបក្សសង្គ្រោះជាតិ យល់ថា ការកំណត់បែបនេះជាការពិបាកអនុវត្តសម្រាប់សហជីព ដែលមានសមាជិករាប់ម៉ឺននាក់។
ចំពោះចំណុចស្នើសុំរបស់សហជីពលើសេចក្ដីព្រាងច្បាប់សហជីពដែលនៅសេសសល់ គណៈកម្មការចំពោះកិច្ចនឹងប្រជុំពិភាក្សាគ្នាទៀតនៅថ្ងៃទី១៣ មករា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សមត្ថកិច្ចខេត្តកំពង់ឆ្នាំងឃាត់យានយន្ត១៥២គ្រឿងក្នុងរយៈពេល២ថ្ងៃនៃការអនុវត្តច្បាប់
- អគ្គស្នងការនគរបាលជាតិប្រកាសពន្យារពេលផាកពិន័យឡាននិងម៉ូតូដែលគ្មានប័ណ្ណបើកបរ
- ពលរដ្ឋជិត១០០នាក់តវ៉ាមុខតុលាការខេត្តសៀមរាបទាមទារឲ្យដោះលែងចៅសង្កាត់អំពិល
- ច្បាប់សំខាន់ៗដែលកើតឡើងក្នុងឆ្នាំ២០១៥និងច្បាប់ដែលគ្រោងបង្កើតឆ្នាំ២០១៦
- គណបក្សទាំងពីរនឹងជួបគ្នាពិគ្រោះយោបល់សេចក្តីព្រាងច្បាប់សហជីពនៅថ្ងៃទី៣១ធ្នូ
- តុលាការខេត្តសៀមរាបឃុំខ្លួនចៅសង្កាត់មកពីគណបក្ស សម រង្ស៊ី ទាក់ទងរឿងដីធ្លី
- ក្រុមសហជីពបង្ហាញកង្វល់មុនសេចក្ដីព្រាងច្បាប់ស្ដីពីសហជីពត្រូវបានរដ្ឋសភាអនុម័ត
- សង្គមស៊ីវិលព្រមានថានឹងមានផលវិបាកធ្ងន់ធ្ងរបើមិនមានច្បាប់គ្រប់គ្រងគ្រឿងស្រវឹង
- តុលាការខេត្តបន្ទាយមានជ័យកោះហៅកម្មករអូសរទេះ២នាក់បំភ្លឺរឿងបាតុកម្ម