ដោយ ហង្ស សាវយុត
2016-01-04
RFA
ក្រុមសហគមន៍ជនជាតិភាគតិចកួយ មកពី ៣ភូមិ ក្នុងឃុំប្រមេរ ស្រុកត្បែងមានជ័យ ខេត្តព្រះវិហារ លើកគ្នាមករារាំងក្រុមហ៊ុនចិន ឈ្មោះ ឡានហ្វេង មិនឱ្យឈូសឆាយពង្រីកដីសម្បទានប៉ះលើដីស្រែចម្ការរបស់ពួកគេ កាលពីថ្ងៃទី៣០ ធ្នូ ២០១៤។ Provided Photo
អាជ្ញាធរខេត្តព្រះវិហារ សុខចិត្តជួបប្រជុំជាមួយតំណាងសហគមន៍ជនជាតិដើមភាគតិចកួយ នៅឃុំប្រមេរ ស្រុកត្បែងមានជ័យ កាលពីព្រឹកថ្ងៃច័ន្ទ ទី៤ ខែមករា ដើម្បីបញ្ចប់ការដេកតវ៉ារបស់ក្រុមជនជាតិដើមភាគតិចនៅមុខសាលាខេត្តព្រះវិហារ រយៈពេល ៨ថ្ងៃមកហើយនោះ។
ការជួបចរចាជាច្រើនម៉ោង គឺអាជ្ញាធរខេត្តព្រះវិហារ បានសន្យារកដំណោះស្រាយជូនប្រជាពលរដ្ឋចំនួន ៥ចំណុច ដូចជា ចុះទៅពិនិត្យព្រំប្រទល់ដីស្រុកឆែប និងស្រុកត្បែងមានជ័យ ឲ្យច្បាស់លាស់ ចាប់ផ្ដើមធ្វើផែនទីបឋមមួយ ដើម្បីឈានទៅរកការចុះបញ្ជីដីធ្លីជាសមូហភាពជូនជនជាតិដើមភាគតិច ជាដើម។ បន្ទាប់ពីការជួបចរចាមក គឺស្ថានការណ៍តឹងតែងបានកើតមានជាថ្មី ដោយសារតែសមត្ថកិច្ចបានចាប់ខ្លួនតំណាងសហគមន៍ដីធ្លីម្នាក់មកពីស្រុករវៀង។
សហគមន៍ទំនាស់ដីធ្លីដែលមកពីច្រើនស្រុក បានប្រើគោយន្តចំនួន ៦គ្រឿង ដាក់ពាំងបិទផ្លូវនៅមុខសាលាខេត្តព្រះវិហារ មិនឲ្យមន្ត្រីចេញចូលជាច្រើនម៉ោង ចាប់តាំងតែពីវេលាម៉ោងប្រមាណ ១០ព្រឹក រហូតដល់ម៉ោងជាង ២រសៀល ថ្ងៃច័ន្ទ ទី៤ ខែមករា។
ស្ថានការណ៍តវ៉ាដ៏តឹងតែងនេះ បន្ទាប់ពីសមត្ថកិច្ចបានចាប់ខ្លួនតំណាងសហគមន៍ទំនាស់ដីធ្លីម្នាក់មកពីស្រុករវៀង នៅក្នុងពេលតំណាងសហគមន៍ជនជាតិដើមភាគតិចកួយ នៅឃុំប្រមេរ ស្រុកត្បែងមានជ័យ កំពុងជួបចរចាជាមួយមន្ត្រីសាលាខេត្ត។
តំណាងសហគមន៍ទំនាស់ដីធ្លីម្នាក់មកពីស្រុកឆែប គឺលោក ដារី។ លោកមានប្រសាសន៍ថា កាលពីវេលាម៉ោងជាង ៩ព្រឹកថ្ងៃច័ន្ទ សមត្ថកិច្ចបានឆ្មក់ទៅចាប់ខ្លួនតំណាងសហគមន៍ទំនាស់ដីធ្លីម្នាក់ឈ្មោះ វង្ស សុខេងលី មកពីស្រុករវៀង។ ប៉ូលិសបានចាប់ខ្លួនតំណាងសហគមន៍នោះ នៅពេលដែលគាត់ដើរចេញពីហ្វូងអ្នកតវ៉ានៅមុខសាលាខេត្ត ហើយទៅផ្សារដើម្បីរកទិញអាហារពេលព្រឹក។ ក្រុមសហគមន៍ បានផ្ទុះកំហឹងប្រឆាំងនឹងអាជ្ញាធរខេត្តព្រះវិហារ ជាថ្មីជុំវិញរឿងចាប់ខ្លួននេះ ហើយបានយកគោយន្តជាច្រើនគ្រឿងដាក់ពាំងផ្លូវមិនឲ្យមន្ត្រីចេញពីសាលាខេត្តបានទេ៖ «គេចាប់បាត់ហើយ គាត់អ្នកចេញមុខប្រឆាំងជាមួយអាជ្ញាធរ។ ពួកខ្ញុំមិនសុខចិត្តទេនេះ កំពុងតែបិទមិនឲ្យមន្ត្រីចេញពីសាលាខេត្តទេ»។
អភិបាលរងខេត្តព្រះវិហារ លោក ស៊ូ សេរី បដិសេធថា សមត្ថកិច្ចមិនបានចាប់ខ្លួនតំណាងសហគមន៍ណាម្នាក់ដែលកំពុងតវ៉ារឿងដីធ្លី នៅមុខសាលាខេត្តនោះទេ។ លោក ស៊ូ សេរី បញ្ជាក់ថា ពេញមួយព្រឹកថ្ងៃច័ន្ទ អាជ្ញាធរខេត្តព្រះវិហារ បានដោះស្រាយបញ្ហាដែលសហគមន៍ជនជាតិដើមភាគតិចកួយ មកដេកតវ៉ារយៈពេល ៨ថ្ងៃនោះរួចរាល់អស់ហើយ គឺមិនមានការចាប់ខ្លួនទេ៖ «រឿងហ្នឹងតាមឮអត់មានចាប់តំណាងសហគមន៍ទេ ព្រោះសហគមន៍ជនជាតិដើមភាគតិចបានជជែកត្រូវគ្នាជាមួយអភិបាលខេត្តអស់ហើយ»។
ទោះយ៉ាងណា អ្នកសម្របសម្រួលនៃសមាគមការពារសិទ្ធិមនុស្សអាដហុក (ADHOC) លោក ឡោ ចាន់ អះអាងថា ពិតជាមានការចាប់ខ្លួនតំណាងសហគមន៍ទំនាស់ដីធ្លីម្នាក់មកពីភូមិឈ្នួន ឃុំរួសរាន់ ស្រុករវៀង នោះមែន។ លោក ឡោ ចាន់ ប្រតិកម្មថា ការចាប់ខ្លួននេះ គឺមិនស្របទៅនឹងចំណុចដែលអភិបាលខេត្តព្រះវិហារ បានសន្យាក្នុងជំនួបជាមួយតំណាងសហគមន៍ជនជាតិដើមភាគតិច កាលពីព្រឹកថ្ងៃច័ន្ទ ទី៤ មករា នេះឡើយ៖ «ក្នុង ៥ចំណុចដែលខេត្តគាត់មានផ្ដិតមេដៃ រួមជាមួយក្រុមប្រឹក្សាខេត្ត ហើយតំណាងប្រជាពលរដ្ឋ គឺអត់មានការចាប់ខ្លួនទេ»។
ប្រភពព័ត៌មានចុងក្រោយឲ្យដឹងថា កាលពីម៉ោងជាង ២រសៀល សមត្ថកិច្ចខេត្តព្រះវិហារ បានសម្រេចដោះលែងតំណាងសហគមន៍ដីធ្លីនោះវិញហើយ បន្ទាប់ពីនាំខ្លួនទៅសាកសួរជាច្រើនម៉ោង ហើយប្រជាពលរដ្ឋមានប្រតិកម្មតវ៉ាយ៉ាងតឹងតែងមក។ បន្ទាប់ពីដោះលែងតំណាងសហគមន៍រួចមក ទើបក្រុមអ្នកតវ៉ាបើកផ្លូវឲ្យមន្ត្រីអាចចេញចូលទៅក្នុងសាលាខេត្តដូចធម្មតាឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ពលរដ្ឋប្រមាណ១០០នាក់បន្តតវ៉ាមុខតុលាការខេត្តសៀមរាបទាមទារដោះលែងចៅសង្កាត់
- សហគមន៍ជនជាតិដើមភាគតិចកួយឃុំប្រមេរបន្តដេកតវ៉ានៅមុខសាលាខេត្តព្រះវិហារ
- ពលរដ្ឋសហគមន៍បុរីកីឡាធ្វើពិធីរំឭកខួបលើកទី៤នៃការបណ្ដេញចេញដោយបង្ខំ
- ភ្ញៀវទេសចរស្នើលោក ហ៊ុន សែន ជួយដកហូតឆ្នេរសមុទ្រពីក្រុមហ៊ុនឲ្យពលរដ្ឋដើរឆ្លងកាត់
- តុលាការខេត្តសៀមរាបឃុំខ្លួនចៅសង្កាត់មកពីគណបក្ស សម រង្ស៊ី ទាក់ទងរឿងដីធ្លី
- ប្រធានបក្សយុត្តិធម៌ជាតិខ្មែរស្នើព្រះមហាក្សត្រលុបចោលដីសម្បទាននៅតាមព្រំដែន
- ជនជាតិដើមភាគតិចកួយនៅព្រះវិហារលើកគ្នាទៅដេកតវ៉ានៅមុខសាលាខេត្ត
- ពលរដ្ឋនៅខណ្ឌសែនសុខតវ៉ាទាមទារឲ្យឈ្មួញបើកផ្លូវសាធារណៈឡើងវិញ
- ពលរដ្ឋមានជម្លោះដី២១គ្រួសារនៅស្ទឹងត្រែងអំពាវនាវឲ្យពន្លឿនការដោះស្រាយ