ដោយ៖​ ស៊ុន ណារិន​ | ថ្ងៃចន្ទ ទី4 មករា 2016, 05:38 PM
http://vodhotnews.com

---

សាលារាជធានីភ្នំពេញ​ប្រកាសបិទផ្លូវនៅម្តុំស្ពាន​អាកាសតិចណូមួយព្រឹក​នៅថ្ងៃអង្គារស្អែកនេះ ដោយ​សារ​ការ​រៀបចំសម្ពោធ​ដាក់​ឲ្យ​ប្រើប្រាស់​ស្ពាន​នេះ​ជា​ផ្លូវការ។​

សេចក្តីជូនដំណឹងរបស់សាលារាជធានីភ្នំពេញចេញផ្សាយនៅថ្ងៃចន្ទនេះ​ឲ្យ​ដឹង​ថា​សាលារាជធានីសហការ​​ជាមួយ​គណៈ​កម្មការធិការជាតិ​រៀបចំ​បុណ្យ​ជាតិ​និងអន្តរជាតិ​នឹង​រៀបចំ​ពិធីសម្ពោធ​ដាក់​ឲ្យ​ដំណើរ​ការ​ស្ពាន​អា​កាស​និងផ្លូវក្រោម​ដីតិចណូ​នៅថ្ងៃ​អង្គារស្អែកនេះ ដោយមានការ​ចូលរួម​ពី​នាយករដ្ឋមន្រ្តី​និង​ភរិយា​របស់​លោក​។​

សេចក្តីជូនដំណឹង​បន្ត​ថា​ដើម្បីរក្សា​សន្តិសុខ សុវត្ថិភាព​និង​សណ្តាប់ធ្នាប់​ សាលារាជធានី​សម្រេច​បិទ​ចរាចរ​​ណ៍​កំណាត់ផ្លូវ​មហាវិថី គីម អ៊ីលស៊ុង​ ចាប់ពីរង្វង់មូល​ទួលគោក​រហូត​ដល់​ស្ពាន​អាកាស​និង​ផ្លូវក្រោមដី ហើយ​និង​កំណាត់​មហាវិថី​សហព័ន្ធរុស្ស៊ី ចាប់ពីផ្លូវ​លេខ២២១​ដល់ផ្លូវ​លេខ​២៥៣។​

បើតាមសេចក្តីជូនដំណឹង ចរាចរណ៍នៅ​តាមបណ្តោយ​មហាវិថីសហព័ន្ធរុស្ស៊ី ពីកើត​ទៅ​លិច ​ត្រូវបង្វែរ​តាមផ្លូវ​នេរុហ៍​ ពីលិច​ទៅ​កើតត្រូវ​បង្វែរតាមផ្លូវ​លេខ​២៥៧​ មហាវិថីម៉ៅសេទុងពីត្បូងទៅជើង​ ត្រូវ​បង្វែរទៅមហា​វិថីកម្ពុជាក្រោមនិងមហាវិថី គីម អ៊ីលស៊ុង ពីជើង​ទៅ​ត្បូង ត្រូវ​បង្វែរ​ទៅ​ផ្លូវ​លេខ​៦០៨។​

គួរ​បញ្ជាក់​ថា​ស្ពានអាកាសតិចណូ​ត្រូវ​បាន​ដាក់​ឲ្យ​ប្រើប្រាស់បណ្តោះអាសន្នកា​ពីថ្ងៃទី​២​៤ខែវិច្ឆិកា ឆ្នាំ​២០​១៥​។ ស្ពាន​អាកាស​តិចណូ​​ជា​ស្ពាន​អាកាស​ទី៤ ដែល​មាន​ប្រវែង៣៨២ ​ម៉ែត្រ ទទឹង១៥ម៉ែត្រ កម្ពស់​៥,២ ម៉ែត្រ ត្រូវ​សាងសង់​តាម​បណ្តោយ​មហាវិថី​សហព័ន្ធ​រុស្ស៊ី។ ជាមួយស្ពានអាកាសនេះ ​ផ្លូវ​​ក្រោម​ដី​មួយ​ខ្សែ​ប្រវែង​៣៤៦​ម៉ែត្រ ទទឹង​ពី៦ទៅ៨ម៉ែត្រ សង់​ក្រោម​មហាវិថី​សហព័ន្ធ​រុស្ស៊ី​កាត់​ពី​មហាវិថី​ម៉ៅសេទុង​ភ្ជាប់​ទៅ​​មហាវិថី​គីម​អ៊ីលស៊ុង​ក៏​ត្រូវ​បាន​ដាក់​ឲ្យ​ប្រើ​​ប្រាស់ផង​ដែរ​។ ការស្ថាបនាស្ពានអាកាសនិងផ្លូវក្រោមដីនេះ ​ត្រូវចំណាយ​​ថវិកា​ជាង​១៤លាន​ដុល្លា​​រ​៕​

សរសេរមកកាន់លោក ស៊ុន ណារិន តាមរយៈsun_narin@vodhotnews.com