ដោយ៖ បូ សាវី | ថ្ងៃអង្គារ ទី5 មករា 2016, 04:18 PM
http://vodhotnews.com
បុគ្គលិកសណ្ឋាគារប្រមាណ៦០នាក់នៅខេត្ដសៀមរាបតវ៉ាជាថ្មីទៀតនៅថ្ងៃអង្គារនេះឲ្យថៅកែដកអ្នកគ្រប់គ្រងពីរនាក់ចេញពីតួនាទីដោយអះអាងថាថ្នាក់ដឹកនាំទាំងនោះបណ្ដេញពួកគេចេញពីការងារដោយខុសច្បាប់។
ការតវ៉ានេះធ្វើឡើងបន្ទាប់ពីតំណាងសហជីពបរាជ័យក្នុងការស្វែងរកដំណោះស្រាយជាមួយអាជ្ញាធរខេត្ដសៀមរាបកាលពីថ្ងៃទី៤ខែមករាម្សិលមិញដែលពួកគេទាមទារឲ្យថៅកែជាជនជាតិបារាំងទទួលយកបុគ្គលិក១៧នាក់ចូលធ្វើការវិញ។
ក្រុមអ្នកតវ៉ាបានឈរផ្ដុំគ្នានៅផ្លូវចូលសណ្ឋាគារវិចតូរីយ៉ាអង្គរស្ថិតក្នុងសង្កាត់ស្វាយដង្គុំ ក្រុងសៀមរាប ខណៈដែលមានសមត្ថកិច្ចប្រមាណ១០នាក់នៅឃ្លាំមើលការតវ៉ានោះ។
ក្រុមកូដករបានស្រែកតាមឧបករណ៍បំពងសំឡេងនិងលើកបដាដែលសរសេរថាអ្នកគ្រប់គ្រងសណ្ឋាគារមិនត្រូវរើសអើងសហជីពនិងឲ្យម្ចាស់សណ្ឋាគារគោរពសេចក្តីរបស់ក្រុមប្រឹក្សាអាជ្ញាកណ្ដាលដែលបង្គាប់ឲ្យទទួលយកអតីតបុគ្គលិក១៧នាក់ចូលធ្វើការវិញ។
តំណាងសហជីពមូលដ្ឋាននិងជាបុគ្គលិកសណ្ឋាគារវិចតូរីយ៉ាអង្គរអ្នកស្រី ចាន់ សុជាតិ ថ្លែងថាការទាមទារឲ្យថៅកែសណ្ឋាគារដកអ្នកគ្រប់គ្រងជនបរទេសពីរនាក់នោះចេញដោយសារថ្នាក់ដឹកនាំទាំងនេះបានបញ្ឈប់បុគ្គលិកពីការងារដែលអ្នកស្រីថាខុសច្បាប់ការងារនៅកម្ពុជា។ អ្នកស្រីបន្ដថាអតីតបុគ្គលិក១៧នាក់ជាសមាជិកសហជីពនៅក្នុងសណ្ឋាគារតាំងពីមុនជនជាតិបារាំងពីររូបនោះចូលមកធ្វើការទៅទៀតអ្នកស្រីបន្ថែមបន្ទាប់ពីអ្នកគ្រប់គ្រងថ្មីចូលធ្វើការងារមកបុគ្គលិកមានបញ្ហាជាបន្ដបន្ទាប់។ អ្នកស្រីមានប្រសាសន៍ថា៖ “នៅពេលគាត់ចូលមកធ្វើការនេះភ្លាមគឺគាត់ចាប់ផ្ដើមដើរអុកឡុកបុគ្គលិកហើយនឹងបញ្ឈប់ថ្នាក់ដឹកនាំសហជីពទាំងអស់តែម្ដងគឺដោយសារតែគាត់ ពិតប្រាកដគឺអយុត្ដិធម៌ ពីព្រោះពួកខ្ញុំមិនបានធ្វើអីដែលខុសឬបំពានច្បាប់ទេពួកយើងធ្វើគ្រប់បែបយ៉ាងទៅតាមច្បាប់ការងារដែលបានចែងមកនៅស្រុកខ្មែរយើងនេះប៉ុន្ដែនិយោជកទេដែលគាត់មករកស៊ីនៅស្រុកខ្មែរយើងហើយគាត់បំពានច្បាប់ស្រុកខ្មែរយើងទៀតគាត់គិតថាឲ្យតែគាត់មានលុយគាត់ធ្វើម៉េចក៏បានដែរ”។
ឆ្លើយតបភ្លាមៗលើករណីនេះមេធាវីការពារឲ្យម្ចាស់សណ្ឋាគារវិចតូរីយ៉ាលោក កៅ ស៊ូផា មានប្រសាសន៍ការបញ្ឈប់បុគ្គលិកទាំងនោះម្ចាស់សណ្ឋាគារទទួលដោះស្រាយសំណងតាមច្បាប់ការងារ។ លោកបញ្ជាក់ថាចំណែកការទាមទារឲ្យដកអ្នកគ្រប់គ្រងពីរនាក់នោះក្រុមហ៊ុនមិនយល់ព្រមតាមបាតុករទេ។ លោកមានប្រសាសន៍ថា៖ ”ពីព្រោះថាអ្នកទាំងពីរនាក់នេះថៅកែជាអ្នកជួលមិនមែនបុគ្គលិកទាំងអស់អ្នកជួលទេ គឺថៅកែអ្នកជួលឲ្យមកមើលជាភ្នែកជាច្រមុះរបស់សណ្ឋាគារគេរកស៊ីខាតចំណេញលើពីរនាក់ហ្នឹងហើយជាអ្នកមកជួយមើលហើយបែរជាយើងមិនពេញចិត្ដអ្នកទាំងនោះ យើងប្ដឹងដកអញ្ចឹង អាជ្ញាកណ្ដាលយើងអត់ព្រមទេបញ្ហាហ្នឹងគេថាការប្ដឹងរបស់កម្មករអត់ត្រឹមត្រូវ"។
ទោះជាយ៉ាងណាប្រធានសហព័ន្ធសហជីពកម្មករនិយោជិតវិស័យទេសចរណ៍និងសេវាកម្មកម្ពុជា លោក ម៉ម រិទ្ធី ធ្លាប់មានប្រសាសន៍ថាការបញ្ឈប់បុគ្គលិកនេះជាការរើសអើងសហជីពដែលលោកថារំលោភលើច្បាប់ការងារនិងសេចក្ដីបង្គាប់របស់ក្រុមប្រឹក្សាអាជ្ញាកណ្ដាលដែលសម្រេចឲ្យម្ចាស់សណ្ឋាគារទទួលពួកគេចូលធ្វើការវិញ។ ប្រធានសហជីពរូបនោះអះអាងថាតាមច្បាប់ការងារក្រុមហ៊ុនត្រូវផ្ដល់ប្រាក់រំឭកដល់កម្មករចាប់ពីថ្ងៃបញ្ឈប់។
គួរបញ្ជាក់ថាការផ្ទុះបាតុកម្មតវ៉ានេះបានកើតឡើងតាំងពីថ្ងៃទី២៩ ខែធ្នូឆ្នាំ២០១៥ ដែលមកដល់ពេលនេះមានរយៈពេល៨ថ្ងៃមកហើយប៉ុន្ដែនៅតែគ្មានដំណោះស្រាយ៕
សូមសរសេរមកកាន់លោក បូ សាវី តាមរយៈ savy@vodhotnews.com