Wed, 6 January 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: ជាមួយការលួងចិត្តពីសង្សារសំណព្វចិត្តនូវចំណងដៃឆ្នាំថ្មីមហាកាដូពុំធ្លាប់មានលើប្រវត្តិវិថីសិល្បៈ ជាខុនដូដ៏ប្រណីតថ្លៃរាប់ម៉ឺនដុល្លារ ស្រីស្រស់ ម្ចាស់ម៉ាកទឹកអប់ល្បីនាំចូលពីអេស្ប៉ាញ កញ្ញា គង់ ច័ន្ទស្រីមុំ ក៏ព្រលយពាក្យថា ជំនូនលួងចិត្ដ និងការយល់ចិត្តថ្លើមពីសង្សារសំណព្វចិត្តរាប់ឆ្នាំមកនេះ ល្មមឲ្យនាងគិតគូររឿងមង្គលការបានហើយ។
ពន្លកស្នេហ៍តារាសម្តែងប្រុសសង្ហា លោក គឹម សីហា និងស្រីស្អាតសាច់សម៉ដ្ឋរលោង កញ្ញា គង់ ច័ន្ទស្រីមុំ បានបោះទងលើទ្រើងសិល្បៈជិត ១០ ឆ្នាំមកហើយ ជាមួយការបង្ហាញភាពផ្អែមល្ហែម និងភាពសិចស៊ី ស្រឡាញ់ថ្នាក់ថ្នមគ្នានៅទីទេសចរណ៍សាធារណៈ ធ្វើឲ្យនាងរំភើបដល់ថ្នាក់ទប់ទឹកភ្នែកមិនបានក៏មាន។
ដូចគ្នានោះ នៅឱកាសបុណ្យឆ្លងឆ្នាំ លោក គឹម សីហា បានធ្វើឲ្យ គង់ ច័ន្ទស្រីមុំ រំភើបចិត្តស្ទើរទប់ទឹកភ្នែកមិនជាប់ ព្រោះតែរំភើបចិត្តក្រោយពីសង្សារទិញកាដូខុនដូដ៏ស្រស់ស្អាត មានការតុបតែងសម្ភារទំនើបៗស៊ីវិល័យ តម្លៃ ៧ ម៉ឺនដុល្លារ ដើម្បីរឹតចំណងស្នេហាឲ្យកាន់តែផ្អែមល្ហែមថែមទៀត។
បង្ហាញពីអារម្មណ៍រំភើបសាទរកាដូពីសង្សារ នាងបានលាន់មាត់ថា៖ «ខ្ញុំពិតជាអរគុណណាស់នូវកាដូខុនដូរថ្លៃ ៧ ម៉ឺនដុល្លារដ៏ស្រស់ស្អាត ដែលបង សីហា ទិញជាកាដូសម្រាប់ខ្ញុំក្នុងឱកាសឆ្លងឆ្នាំចាស់ ផ្លាស់ឆ្នាំថ្មី!»។
កញ្ញា គង់ ច័ន្ទស្រីមុំ ក៏ព្រលយពាក្យថា៖ «ថាមិនត្រូវនៅក្នុងឆ្នាំនេះ ឬដើមឆ្នាំក្រោយ ខ្ញុំ និងបង សីហា អាចដឹកដៃគ្នាចូលរោងការថែមទៀតផង»។
តារាសម្តែង និងម្ចាស់មុខជំនួញហាងទឹកអប់ រូបនេះបញ្ជាក់ថា៖ «ខ្ញុំពិតជាមានអារម្មណ៍ថា រំភើបក្តុកក្តួលក្នុងចិត្តរកអ្វីមកប្រៀបមិនបានទេ»។
ជាមួយបំណងប៉ងជាយូរមកហើយចំពោះខុនដូនេះ តារាស្រីសាច់ស្អាតកូនកាត់ចិនល្បីខាងជំនួញរូបនេះ បានប្រាប់ថា៖ «ខុនដូដែលជាកាដូឆ្នាំថ្មីសម្រាប់ខ្ញុំនេះ គឺមានទីតាំងនៅទល់មុខស្ថានទូតម៉ាឡេស៊ី ឈ្មោះថា «ព្រីនសេស ផ្លាហ្សា» ជាប្រភេទខុនដូសម្រាប់លក្ខណៈគ្រួសារឃ្យូតៗ គួរឲ្យស្រឡាញ់។ ខ្ញុំពិតជាស្រឡាញ់វាណាស់ ហើយក៏អរគុណទៅដល់គាត់ (សីហា) យ៉ាងខ្លាំងដែលគាត់ទិញវាឲ្យខ្ញុំ»។
ឆ្លើយតបនឹងសំណួរមហាជនក៏ចង់ដឹងថា តើថ្ងៃណាទើបតារារូបនេះ មានដំណឹងល្អសម្រេចចិត្តបញ្ចប់ភាពនៅលីវ។ ស្រីមុំ ទទួលស្គាល់ថា៖ «ខ្ញុំពិតធ្លាប់បានប្រកាសថា គម្រោងរៀបការគឺរង់ចាំដល់មុខជំនួញជោគជ័យ ទើបគិតរឿងនេះ។ តែមកដល់ពេលនេះ ខ្ញុំគិតថា វាដល់ពេលហើយដែលខ្ញុំត្រូវគិតរឿងរៀបការ»។
ប៉ុន្តែនាងនៅមិនទាន់បញ្ចប់ចម្ងល់មហាជនពីវេលាជាក់លាក់ឡើយដោយគ្រាន់តែបញ្ជាក់ថា៖ «អាចនៅក្នុងឆ្នាំនេះ ឬក៏ដើមឆ្នាំក្រោយយ៉ាងយូរ ព្រោះថាខ្ញុំទាំងពីរនាក់មិនចង់អូសបន្លាយពេលវេលាតទៅទៀតទេ»៕