ដោយ៖​ ស៊ុន ណារិន​ | ថ្ងៃពុធ ទី6 មករា 2016, 07:48 AM
http://vodhotnews.com

ប្រធានគណបក្ស​សង្រ្គោះជាតិ លោក សម រង្ស៊ី កាលពីកន្លងទៅ

---

តុលាការ​រាជធានីភ្នំពេញ​បាន​ចេញ​ដីកា​មួយ​បង្គាប់​ឲ្យ​កងកម្លាំង​សាធារណៈ​ស្រាវជ្រាវ​រកចាប់ខ្លួន​ប្រធានគណបក្ស​សង្រ្គោះជាតិ លោក សម រង្ស៊ី ដែលកំពុង​និរទេសខ្លួននៅក្រៅប្រទេស ពាក់ព័ន្ធ​នឹងការចោទប្រកាន់សមគំនិត​​ក្លែង​បន្លំ​ឯកសារ ក្នុង​សំណុំរឿង​របស់​អតីតសមាជិកព្រឹទ្ធសភាមកពីគណបក្ស​សម រង្ស៊ី​ លោក ហុង សុខហួរ។​​

ដីកាបង្គាប់​ឲ្យ​ចាប់ខ្លួន ចុះថ្ងៃ​ទី​៩ខែធ្នូ ឆ្នាំ​២០១៥ ​ចេញដោយ​លោក កោ វណ្ឌី​ ចៅក្រម​ស៊ើប​សួរ​សាលាដំបូង​​​រាជធានីភ្នំពេញឲ្យ​ដឹង​ថា​លោក សម រង្ស៊ី ត្រូវ​ចោទ​ពី​បទ​សមគំនិត​ក្នុងអំពើ​ក្លែង​បន្លំឯក​សារ​សាធារណៈ​ ប្រើប្រាស់​ឯក​សារ​សាធារណៈ​ក្លែងនិង​ញុះញង់​បង្ក​ឲ្យ​មាន​ភាព​វឹក​វរ​ធ្ងន់ធ្ងរ​ដល់​សន្តិសុខ​សង្គម។ ដីកា​​ប​ន្ត​ថា​លោក សម រង្ស៊ី ត្រូ​វបានបង្គាប់​ឲ្យ​ចូល​ខ្លួន​នៅថ្ងៃ​​ទី​៤ខែធ្នូ ឆ្នាំ​២០១៥ តែ​លោក​មិន​បាន​បង្ហាញខ្លួន​។ បើតាមដីកានោះ តុលាការ​បង្គាប់ឲ្យ​ចាប់ខ្លួន​លោក សម រង្ស៊ី មក​ឃុំខ្លួននៅពន្ធនាគារ។​

លោក ហុង សុខហួរ ត្រូវបានសមត្ថកិច្ចចាប់ខ្លួនកាលពីខែ​សីហា ឆ្នាំ​២០១៥​ ពីរថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន បានចេញ​បញ្ជាឲ្យចាប់ខ្លួន ដោយ​ចោទថាក្លែងឯកសារសន្ធិសញ្ញាកម្ពុជានិងវៀតណាមនៅឆ្នាំ១៩៧៩។ ប៉ុន្តែគណបក្សសង្គ្រោះជាតិបានចាត់ទុកករណីនេះជា​រឿងនយោបាយ មិនមែនជាបទល្មើសជាក់ស្តែងនិងជាការ​សម្តែងមតិរបស់សមាជិកព្រឹទ្ធសភា។ លោក សម រង្ស៊ី ត្រូវ​បាន​ចោទប្រកាន់ថា​បានផ្តល់​ទំព័រហ្វេសប៊ុក​របស់​លោក​សម្រាប់ចែកចាយឯកសារ​ទាំងនោះ។​

ពីទីក្រុងប៉ារីសប្រទេស​បារាំង កាលពីថ្ងៃទី​២៥ ខែតុលា ឆ្នាំ​២០១៥​ លោកនាយករដ្ឋមន្រ្តី ហ៊ុន សែន បាន​ព្រមានថា​លោក​ សម រង្ស៊ី​ អាចនឹង​​ជាប់ពន្ធនាគារ ដោយ​លោក​ថាប្រធានគណបក្ស​ប្រឆាំងរូបនេះ​បានឲ្យ​ទំព័រហ្វេសប៊ុក​របស់លោក​​ក្នុង​ការ​បង្ហោះ​ឯក​សារ​របស់លោក ហុង សុខហួរ។​​ លោក ហ៊ុន សែន បាន​ថ្លែង​ធ្ងន់ៗ​ករណី​ លោក ហុង សុខហួរ ថា​បានប្រព្រឹត្ត​បទល្មើសជាក់ស្តែង ដោយ​សារ​តែ​​​លោក​បាន​ធ្វើអ​ត្ថាធិប្បា​យភ្ជា​​ប់ជាមួ​យ​​ឯកសារ​លើ​ប្រ​ព័ន្ធសង្គមហ្វេសប៊ុក។

លោក​មានប្រសាសន៍ថា៖ “ហើយ​អាម្ចាស់Page(ទំព័រ)ជានរណា ជា​រង្ស៊ីហ្មង(សម រង្ស៊ី) អញ្ចឹង​ទេអាចដល់ អាចដល់ម្នាក់ហ្នឹង ហើយបើដល់ម្នាក់​ហ្នឹង​ ម្តងនេះខ្ញុំឈប់​លើកលែងទោសឲ្យ​ហើយ ខ្ញុំលើក​លែងទោស​ឲ្យម្នា​ក់នេះពីរដង រួចមកហើយ​ លើកនេះអត់ទេ លើកនេះអត់ទេ ព្រៃស អត់មានទទួលស្គាល់អ្នកណាថាស្អីនេះទេ"​។

គួរបញ្ជាក់ថា​លោក សម រង្ស៊ី កំពុងជាប់ពាក់ព័ន្ធនឹង​រឿងបរិហាកេរ្តិ៍ តាម​ពាក្យ​បណ្តឹង​របស់​លោក គី តិច មេធាវី​លោក ហេង សំរិន​ ករណីបង្ហោះឯកសារតាមហ្វេសប៊ុក។ លោក​ក៏​ត្រូវបានតុលាការចេញដីកាបង្គាប់ឲ្យសមត្ថកិច្ចចាប់ខ្លួនដាក់ពន្ធនាគារ២ឆ្នាំ ពីបទបរិហាកេរ្តិ៍ជាសាធារណៈនិងញុះញង់ឲ្យមានការរើសអើង ដែលប្តឹងដោយ លោក ហោ ណាំហុង បន្ទាប់ពីលោក សម រង្ស៊ី ថ្លែងនៅសារមន្ទីរជើងឯកកាលពីឆ្នាំ២០០៨ថាលោក ហោ ណាំហុង ជាអតីតមេគុកបឹងត្របែកសម័យខ្មែរក្រហម។ គណបក្សសង្រ្គោះជាតិចាត់ទុកថានេះជាដីកានយោបាយ៕

សរសេរមកកាន់លោក ស៊ុន ណារិន តាមរយៈsun_narin@vodhotnews.com