រូបថតស្លៀកឈុតហែលទឹកពណ៌ក្រហមយ៉ាងសិចស៊ី ខណៈពិធីការិនី អេនជី ទៅលេងនៅតំបន់ឆ្នេរសមុទ្រ។ ហ្វេសប៊ុក
Thu, 7 January 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: បន្ទាប់ពីស្វាមីសុំផ្អាកការងារនៅសហរដ្ឋអាមេរិកហោះហើរមកដើរកៀកកិត មានឱកាសថ្នាក់ថ្នមប្រលោមស្នេហ៍ឲ្យបានច្រើននោះ ពិធីការិនី អេនជី ក៏រំលេចភាពសិចស៊ីកប់ៗបង្ហោះក្នុងហ្វេសប៊ុកបន្ថែមពីលើការប្រកាសដ៏គួរឲ្យភ្ញាក់ផ្អើលថា នាង និងស្វាមីបានចាប់ដៃគ្នាធ្វើជាពិធីករក្នុងកម្មវិធីជាការបើកទំព័រអាជីពសិល្បៈជាលលកញីឈ្មោលតែម្ដង។
កាន់តែពញ្ញាក់អារម្មណ៍អ្នកគាំទ្រក្នុងបណ្តាញសង្គម ជាមួយរូបភាពបង្ហាញពីវត្តមានស្វាមីក៏ក្លាយខ្លួនជាពិធីករផងដែរ ពិធីការិនី អេនជី បានសរសេរថា៖ «លើកទីមួយដែលយើងខ្ញុំទាំងពីរនាក់ចាប់ដៃគ្នា ធ្វើពិធីករនិងពិធីការិនីរួមគ្នា ដោយនាងខ្ញុំសម្របសម្រួលខាងភាសាជាតិ ស្វាមីនាងខ្ញុំភាសាអន្តរជាតិ ដូច្នេះសង្ឃឹមថា ការបើកទំព័រលើវិស័យសិល្បៈជាគូរបស់យើងខ្ញុំទាំងពីរនាក់នឹងមានការគាំទ្រពីបងប្អូនកាន់តែច្រើន»។
អ្នកនាង លី ច័ន្ទដាលីស ហៅ អេនជី ដែលបានបញ្ចប់ភាពនៅលីវឆ្នាំ ២០១៣ ដោយចូលរោងការជាមួយបុរសអាណិកជនខ្មែរនៅអាមេរិកឈ្មោះ ភីធើរ សុធារ៉ាហេង ថ្មីៗនេះក៏បានបង្ហោះរូបភាពសិចស៊ីមួយសន្លឹក ក្នុងកាយវិការអង្គុយសណ្តូកជើងបន្ទន់ដងខ្លួនទៅក្រោយ បង្ហាញនូវរាងកាយស្រលូនសិចស៊ីនាំឲ្យបុរសៗឃើញភ្លាមទ្រាំក្នាញ់មិនបាន។
ជាមួយសម្ដីបែបអៀនប្រៀននឹងការបែកធ្លាយរូបភាពសិចស៊ីនេះ អេនជី ប្រកែកថា៖ «គ្មានសិចស៊ីឯណា! រូប-ភាពនោះ ខ្ញុំថតលេងទេបង ពេលដើរលេងកម្សាន្តនៅមាត់សមុទ្រ។ បើប្រៀបទៅនឹងរូបភាពសិចស៊ីរបស់តារាគេផ្សេង មិនសិចស៊ីពេកទេ»។
បន្លឺនូវសំឡេងដដែលថា៖«វាមិនសិចស៊ីពេកដល់ថ្នាក់ត្រូវគេរិះគន់ ហើយខ្ញុំក៏មិនចង់ឮពាក្យមហាជនរិះគន់ដោយភាពសិចស៊ីនោះដែរ» ពិធីការិនី អេនជី បានប្រាប់ឲ្យដឹងថា៖ «ក្នុងចិត្តខ្ញុំ ខ្ញុំមិនដែលនឹកចង់សិចស៊ី ហើយសម្លៀកបំពាក់ដូចនេះក៏មិនដែលនៅក្នុងចិត្តដែរ ព្រោះមិនហ៊ានស្លៀកពាក់ តែសម្រាប់ម៉ូដសិចស៊ីនោះ ចាំបាច់ខ្ញុំត្រូវតែពាក់វា ហើយពាក់នៅពេលដើរកម្សាន្តនោះ»។
ពិធីការិនីដែលកំពុងបណ្តុះអាជីពខ្លួនទៅឲ្យស្វាមីអ្នកនាង អេនជី បញ្ជាក់ថា៖ «ប៊ីគីនី សិចស៊ីមួយឈុតពណ៌ក្រហមនោះ ជាអំណោយស្វាមីទិញមកឲ្យ ហើយនៅក្នុងដំណើរកម្សាន្តនៅសមុទ្រនោះ គាត់ក៏ទៅជាមួយហើយចាំបាច់ណាស់ខ្ញុំត្រូវតែស្លៀកវា។ ស្លៀកឲ្យគាត់បានឃើញ ឲ្យគាត់សប្បាយចិត្ត»។
នាងបន្ថែមថា៖ «ការស្លៀកពាក់សិចស៊ីនោះ ក៏មិនចង់ឲ្យមានការភ្ញាក់ផ្អើលទាញយកប្រជាប្រិយភាពនោះដែរ»។
ពិធីការិនី អេនជី បានអះអាងថា ភាពសិចស៊ីនេះនាងទុកបង្ហាញតែឲ្យស្វាមីវិស្វករឃើញ ទេ។ ប៉ុន្តែគេសង្កេតឃើញនៅក្នុងហ្វេសប៊ុកនាងក៏បានយករូបភាពនេះមកបង្ហាញពីការផ្សព្វផ្សាយឡេការពារកម្ដៅដែលនាងនាំយកមកលក់ដែរ។
ឆ្លើយតបនឹងការលើកឡើងនេះ អេនជី បានប្រាប់ថា៖ «បើបានជាថតហើយ ហើយក៏មានផលិតផលត្រូវប្លង់ផ្សព្វផ្សាយ ក៏យកវាមកផ្សព្វផ្សាយប្រូម៉ូតវាតែម្តងទៅ។ ប៉ុន្តែថ្ងៃក្រោយខ្ញុំទំនងនឹងមិនឲ្យមានរូបភាពបែបនេះបែកធ្លាយទៀតទេ»៕