ព្រះសង្ឈខ្មែរ ១១ អង្គ (ជួរមុខ) នាពេលបួស ២ សប្តាហ៍នៅវត្តព្រះធម្មកាយប្រទេសថៃ។ រូប សហការី
Fri, 8 January 2016
ប៉ាន់ រិទ្ធា
ភ្នំពេញប៉ុស្តិ៍
ភ្នំពេញៈ នេះជាលើកដំបូងហើយ ដែលមានកុលបុត្រខ្មែរមួយក្រុមមានចំនួន ១១ រូបតាមរយៈកម្មវិធី IDOP Cambodia បានចំណាយពេលពីរសប្តាហ៍ទៅចូលរួមក្នុងពិធីសាងផ្នួសដើម្បីបំពេញកាតព្វកិច្ចតបស្នងសងគុណមាតាបិតា តាមគន្លងទំនៀមទម្លាប់់ព្រះពុទ្ធសាសនា នៅឯវត្តព្រះធម្មកាយ ឬ Wat Phra Dhammakaya ដែលជាមណ្ឌលវិបស្សនា និងសមាធិធំជាងគេបែបពុទ្ធសាសនានៅក្នុងប្រទេសថៃ និងល្បីល្បាញលើសកលលោក។
កម្មវិធី IDOP Cambodia នេះត្រូវបានដឹកនាំដោយលោក ទឹម សុវណ្ណារ៉ា ដែលជានាយកប្រតិបត្តិនៃក្រុមហ៊ុននូទ្រីលេតម៉ាស្ទ័រ អិលអឹម ខូអិលធីឌី ដែលបាននាំចូលនូវផលិតផលម្សៅទឹកដោះគោមានម៉ាក Nutrilatt ពីប្រទេសសិង្ហបុរី និងម៉ាក Bibere Gold ពីប្រទេសនូវែលសេឡង់ ដើម្បីទៅចូលរួមពិធីសាងផ្នូសចំនួនពីរសប្តាហ៍ចាប់តាំងពីថ្ងៃទី ២២ ខែធ្នូ ឆ្នាំ ២០១៥ ដល់ថ្ងៃទី ៤ ខែមករា ឆ្នាំ ២០១៦ កន្លងមក។
លោក ទឹម សុវណ្ណារ៉ា បញ្ជាក់ថា៖ «កម្មវិធីនេះគឺមានគោលបំណងធំចង់បង្ហាញពីការលះបង់របស់កុលបុត្រខ្មែរនៅក្នុងពិធីបំបួស ឬសាងផ្នួសដើម្បីជាការសងគុណឪពុកម្តាយ ក្នុងនាមយើងជាពុទ្ធសាសនិក និងជាពិធីមានតាមគន្លងទំនៀមទម្លាប់នៃព្រះពុទ្ធសាសនា បើទោះបីជាការបំបួសនៅក្នុងរយៈពេលខ្លី ឬវែងដូចជាមួយ ឬពីរសប្តាហ៍ មួយខែ ឬក៏មួយវស្សាក៏ដោយគឺសុទ្ធតែកើតចេញពីចិត្តចង់លះបង់ដើម្បីហាត់ពត់លត់ដំ អប់រំផ្លូវចិត្ត និងរៀនសូត្រនូវព្រះធម៌វិន័យមួយចំនួន»។
ព្រះសង្ឈកោរសក់អ្នកបួសនៅក្នុងពិធីសាងផ្នួស ។ រូប សហការី
លោកបង្ហើបឲ្យដឹងថា៖ «នៅក្នុងចំណោមនាគបួសទាំង ១១ រូប នៃកម្មវិធី IDOP Cambodia ក៏មានបុគ្គលិកនៃក្រុមហ៊ុននូទ្រីលេតម៉ាស្ទ័រ អិលអឹម ខូអិលធីឌី ចំនួនពីររូបដែរគឺលោក លាង នរិន្ទ និងលោក តាន់ ស៊ីវុទ្ធី។ ចំពោះការចូលរួមនៅកម្មវិធីនេះគឺចាំបាច់ត្រូវមានឯកសារមួយចំនួនដែររួមមាន ដូចជាលិខិតជីវប្រវត្តិ លិខិតបញ្ជាក់ការសិក្សា និងបុគ្គលិកលក្ខណៈមួយចំនួនទៀតទើបអាចចុះឈ្មោះបាន»។
គួរបញ្ជាក់ថា ទីអារាមវត្តព្រះធម្មកាយ មានទីតាំងស្ថិតនៅក្នុងស្រុកខ្លងលួង ខេត្តផាធុម ថានី នៅក្នុងទីក្រុងបាងកក ដែលមានចម្ងាយប្រមាណ ៦ គីឡូម៉ែត្រពីព្រលានយន្ដហោះ ដន មឿង ខណៈជាទីអារាមសម្រាប់ធ្វើនូវពិធិវិបស្សនា ឬសមាធិធំជាងគេនៅប្រទេសថៃ។
បើតាមគេហទំព័រ dhammakayapost.org បានឲ្យដឹងថា សម្រាប់កម្មវិធីបំបួស ឬសាងផ្នួសមានលក្ខណៈអធិកអធមមានឈ្មោះថា Mass Ordination Program នៅឆ្នាំ ២០១៥ ដែលបានប្រារព្ធធ្វើប្រចាំឆ្នាំលើកទី ៦ នេះ ដោយមានព្រះសង្ឈចំនួន ១០ ម៉ឺន អង្គមកពីទូទាំងប្រទេសថៃបានចូលរួម និងជាលើកទី ១១ នៃកម្មវិធីសាងផ្នួសជាអន្ដរជាតិឈ្មោះថា Summer Mass Ordination Program កាលពីថ្ងៃទី ១៤ ខែមីនា ឆ្នាំ ២០១៥ ដោយមានអ្នកបួសចំនួន ១០ ម៉ឺន នាក់មកពីប្រទេសជាច្រើននៅលើពិភពលោក បានចូលរួមនៅក្នុងកម្មវិធីដ៏ធំនៅឯវត្តព្រះធម្មកាយនេះដែរ៕