ដោយ៖ ស៊ុន ណារិន | ថ្ងៃពុធ ទី10 កុម្ភៈ 2016, 10:59 AM
http://vodhotnews.com
សាក្សីជំនាញនិងជាអ្នកវិភាគទិន្នន័យរបស់សហចៅក្រមស៊ើបអង្កេតរបស់សាលាក្តីខ្មែរក្រហម លោក អ៊ីសា អូស្មាន បានអះអាងថាខ្មែរក្រហមចាត់ទុកខ្មែរឥស្លាមជាសត្រូវនិងព្យាយាមបោសសម្អាតពួកគេ ដោយប្រើឧបាយកលឲ្យខ្មែរឥស្លាមត្រឡប់ទៅតំបន់ខ្លួនរស់នៅវិញនិងសម្លាប់មិនរើសមុខ។
លោក អ៊ីសា អូស្មាន ជាអ្នកនិពន្ធសៀវភៅអូកូពះឬយុត្ដិធម៌ដែលបោះពុម្ពនៅឆ្នាំ២០០២និងសៀវភៅមួយក្បាលយទៀតឈ្មោះការបះបោររបស់ជនជាតិចាម បោះពុម្ពនៅឆ្នាំ២០០៦ ដោយមជ្ឈមណ្ឌលឯកសារកម្ពុជា។
ក្នុងសវនាការនៅព្រឹកថ្ងៃពុធនេះនេះ លោកបានថ្លែងថាក្នុងឆ្នាំ១៩៧៧និង១៩៧៨ ជនជាតិខ្មែរនិងខ្មែរឥស្លាមបានរស់នៅឡូកឡំគ្នា ដែលធ្វើឲ្យខ្មែរក្រហមពិបាកកំណត់អត្តសញ្ញាណ។ លោកបន្តថាខ្មែរក្រហមក៏បានប្រើ”ឧបាយកល”មួយដោយប្រកាសឲ្យខ្មែរឥស្លាមត្រឡប់ទៅរស់នៅតំបន់របស់ខ្លួនវិញ ហើយខ្មែរក្រហមក៏ចាប់ផ្តើមសម្លាប់មិនរើសមុខនៅពេលពួកគេត្រឡប់ទៅតំបន់ដែលគេរស់នៅ។ លោកបញ្ជាក់បន្ថែមថាខ្មែរក្រហមបានសម្លាប់ខ្មែរឥស្លាមទាំងអស់ដោយមិនរើសមុខ ដោយពុំមានស្រង់ឈ្មោះ។
លោកបញ្ជាក់ថា៖ “ខ្ញុំក៏នៅមានចម្ងល់ ចម្ងល់មិនចេះចប់ ពួកគេលែងប្រតិបត្តិសាសនា លែងតតាំងហើយ…ហេតុអ្វីនៅតែយកទៅសម្លាប់មិនរើសមុខបែបនេះ”។ លោកបន្តថាបើតាមការស្រាវជ្រាវរបស់លោក ខ្មែរឥស្លាមចន្លោះពី៤០ទៅ៥០ម៉ឺននាក់ត្រូវបានសម្លាប់នៅក្នុងសម័យខ្មែរក្រហម។ លោកបញ្ជាក់ថាក្រោយពីបញ្ចប់របបខ្មែរក្រហមនៅខែមករា ឆ្នាំ១៩៧៩ ខ្មែរឥស្លាមនៅសល់មានប្រមាណ២០ម៉ឺននាក់។
កាលពីម្សិលមិញ លោក អ៊ីសា អូស្មាន បានលើកឡើងថាខ្មែរឥស្លាមបានព្យាយាមបះបោរធំៗចំនួនពីរដងប្រឆាំងនឹងខ្មែរក្រហម ករណីទាមទារឲ្យខ្មែរឥស្លាមលុបបំបាត់ការប្រតិបត្តិសាសនារបស់ពួកគេ។ លោកបានលើកឡើងថានៅឆ្នាំ១៩៧៣ មានការបះបោរតូចមួយនៅភូមិទ្រា ក្នុងខេត្តកំពង់ចាម ហើយក្នុងឆ្នាំ១៩៧៥ មានការបះបោរធំៗពីរនៅក្នុងស្រុកក្រូចឆ្មារគឺក្នុងភូមិកោះផលនិងភូមិស្វាយឃ្លាំង។ លោកមិនអាចចាំកាលបរិច្ឆេតច្បាស់នោះទេ។ លោកបញ្ជាក់ថាខ្មែរឥស្លាមនៅភូមិស្វាយឃ្លាំងមិនសូវចេញមុខប្រឆាំងនឹងខ្មែរក្រហមនោះទេ។
លោកបានថ្លែងថា៖ “គេឲ្យបិទវិហារ ក៏នាំគ្នាបិទទៅ។ គេឲ្យកាត់សក់ខ្លី តាមសាសនាឥស្លាម នារីគេអត់ឲ្យកាត់សក់ខ្លី ក៏នាំគ្នាកាត់សក់ទៅ គេឲ្យបើកកុំឲ្យនារីគ្របក្បាល ក៏នាំគ្នាធ្វើតាមទៅ។ នៅតែមានការចាប់យកទៅសម្លាប់នៅមន្ទីរសន្តិសុខ ស្រុកក្រូចឆ្មារ”។ លោកបានឲ្យដឹងទៀតថាខ្មែរឥស្លាមនៅកោះផលមិនអាចទទួលយកបានទេចំពោះការទាមទារឲ្យលុបការប្រតិបត្តិសាសនា។ លោកបន្តថាខ្មែរក្រហមបានដាក់ផែនការ៥ខសម្រាប់ការអនុវត្ត ដូចជាឲ្យកាត់សក់ខ្លី ឈប់ទទូលក្បាល ប្រមូលគម្ពីរដុតចោល ឲ្យប្រជាជនខ្មែរឥស្លាមទាំងអស់នៅកោះផលត្រូវចិញ្ចឹមជ្រូក ហើយត្រូវតែហូបសាច់ជ្រូកនិង ឲ្យឈប់ថ្វាយបង្គុំព្រះ វិហារត្រូវតែបិទទ្វារ ហើយបុរសនិងស្រ្តីជនជាតិចាម ត្រូវតែរៀបការជាមួយជនជាតិដទៃទៀត កុំឲ្យរៀបការជាមួយគ្នា។ លោកបញ្ជាក់ថា៖ “ទាំង៥ខហ្នឹង អ្នកភូមិកោះផលមិនអាចទទួលយកខណាមួយបានទេ”។
លោកបន្តថាដោយសារខ្មែរឥស្លាមមិនព្រមអនុវត្តតាម ខ្មែរក្រហមសម្រេចប្រតិបត្តិការវាយកម្ទេចអ្នកនៅកោះផល។ លោកបញ្ជាក់ថា៖ “ហើយចុងក្រោយគេបញ្ជូនទាហាន ទាហាននេះមិនធម្មតាទេ គឺមានកាំភ្លើងយន្ត កាំភ្លើងធំគ្រប់ប្រភេទ ពីព្រោះកាំភ្លើងតូចមិនអាចបាញ់ទៅដល់កោះផលបានទេ ព្រោះត្រូវឆ្លងទន្លេ អញ្ចឹងគេដាក់នៅត្រើយម្ខាងទន្លេ ដើម្បីបាញ់សម្រុកទៅកោះផល។ សម្រុកហើយគេបញ្ជូនកងទ័ពរបស់គេតាមទូក តាមកាណូត ឆ្លងទៅដល់ទឹកដីកោះផល ប្រយុទ្ធទៅតាមថ្មើរជើង។ ហើយអ្នកភូមិគាត់អត់មានអីទេដូចនៅស្វាយឃ្លាំងដែរ គឺការពារខ្លួនគាត់ គាត់មានតែកាំបិត មានតែដាវ ដុំថ្ម។ ហើយការតតាំងប្រយុទ្ធគ្នាគឺនៅកោះផលនេះរងគ្រោះធ្ងន់ធ្ងរណាស់ ព្រោះគេបាញ់កាំភ្លើងធំ កាំភ្លើងតូចផង ធ្វើឲ្យអ្នកភូមិស្លាប់ៗ លែងរាប់ដឹងចំនួនពិតប្រាកដថាប៉ុន្មានហើយ”។ លោកបញ្ជាក់ថាមិនមានអ្នកភូមិណាប្រាប់ថាខ្មែរឥស្លាមបានសម្លាប់កងទ័ពរបស់ខ្មែរក្រហម ពេលតតាំងនឹងការបាញ់ផ្លោងរបស់ខ្មែរក្រហម។
លោកបញ្ជាក់ថាបើតាមសិក្សារបស់លោក ការបះបោររបស់ខ្មែរសឥស្លាមគឺដើម្បីទាមទារសិទ្ធិសេរីភាពក្នុងការប្រតិបត្តិសាសនា មិនមែនផ្តួលរំលំរដ្ឋាភិបាលកម្ពុជាប្រជាធិបតេយ្យនោះទេ។
គួរបញ្ជាក់ថាការសាកសួរពីជនជាតិខ្មែរឥស្លាមស្ថិតនៅក្នុងសំណុំរឿង០០២/០២ សំដៅលើការជំនុំជម្រះដំណាក់កាលទីពីរប្រឆាំងនឹង ខៀវ សំផន នឹង នួន ជា។ សំណុំរឿង០០២/០២ពាក់ព័ន្ធនឹងការប្រល័យពូជសាសន៍ប្រឆាំងនឹងជនជាតិចាមនិងជនជាតិវៀតណាម ការរៀបអាពាហ៍ពិពាហ៍ដោយបង្ខំ និងការរំលោភសេពសន្ថវៈ ការបោសសម្អាតផ្ទៃក្នុងនិងករណីមួយចំនួនទៀត៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com