បណ្ឌិតមួយរូបដែលត្រូវបានចាត់តាំងឲ្យចុះសិក្សាស្រាវជ្រាវពីព្រំដែនកម្ពុជា-វៀតណាម បានចុះទៅពិនិត្យតំបន់ដែលជាចំណុចនៃភាពតានតឹងផ្នែកនយោបាយថ្មីបំផុត គឺភូមិ “ថ្មបីដុំ” នៅក្នុងខេត្តតាកែវកាលពីម្សិលមិញ ហើយបានកំណត់ថា ថ្មបីដុំនេះស្ថិតនៅក្រោមការគ្រប់គ្រងរបស់កម្ពុជានៅឡើយ។
ក្រៅពីជាកន្លែងថ្មដ៏ធំបីដុំ ដែលនីមួយៗមានកម្ពស់៤ម៉ែត្រ និងទំហំ២០ម៉ែត្រស្ថិតនៅនោះ ថ្មបីដុំនេះក៏ជាតំបន់ទេសចរណ៍សម្រាប់កាស៊ីណូថ្មបីដុំ និងជាកន្លែងសម្រាប់រូបសំណាកអ្នកតាថ្មបីដុំ ដែលជាអ្នកតាដ៏ស័ក្ដិសិទ្ធិ និងជាទីសក្ការបូជាដ៏មានប្រជាប្រិយភាពដែរ។
លោក សុខ ទូច ដែលរដ្ឋាភិបាលចាត់តាំងកាលពីឆ្នាំមុនឲ្យចុះសិក្សាស្រាវជ្រាវដើម្បីព្យាយាមធ្វើឲ្យជម្លោះដ៏ក្ដៅគគុកជុំវិញបញ្ហាព្រំដែនកម្ពុជា-វៀតណាមមិនក្លាយជារឿងនយោបាយនោះ បានចុះទៅតំបន់នេះបន្ទាប់ពីឥស្សរជននយោបាយដ៏លេចធ្លោមួយរូបអះអាងថា តំបន់នេះស្ថិតក្រោមការគ្រប់គ្រងរបស់វៀតណាម ក្រោយពេលចុះទៅតំបន់នេះកាលពីចុងឆ្នាំមុន។
លោកបានមានប្រសាសន៍ថា “យើងបានចុះទៅពិនិត្យតំបន់នោះ ហើយឃើញថា ថ្មពីរ ដុំស្ថិតនៅក្នុងទឹកដីខ្មែរ ប៉ុន្តែថ្មទី៣នៅលើបន្ទាត់ព្រំដែន”។ លោកបានបន្ថែមថា ភូមិដែលស្ថិតនៅក្នុងស្រុកបុរីជលសារនេះហាក់បីដូចជាស្ថិតនៅក្រោមការគ្រប់គ្រងរបស់កម្ពុជានៅឡើយ។
លោកបានលើកឡើងទៀតថា ”ថ្មបីដុំគឺស្ថិតក្នុងទឹកដីខ្មែរ ហើយវាត្រូវបានគ្រប់គ្រងដោយអាជ្ញាធរខ្មែរជាច្រើនជំនាន់មកហើយ ហើយវាស្ថិតក្រោមការគ្រប់គ្រងរបស់អាជ្ញាធរខ្មែរនៅឡើយ”។ លោកបានបន្ថែមថា កសិករខ្មែរកំពុងតែដាំដុះក្នុងតំបន់នោះនៅឡើយទេ។
លោក កែម ឡី ប្រធានក្រុមតស៊ូមតិនយោបាយ “ ខ្មែរដើម្បីខ្មែរ” បានចុះទៅតំបន់នោះជាមួយសកម្មជនដែលជាយុវជននៅក្នុងខែធ្នូ ហើយលើកឡើងថា អ្នកភូមិនៅទីនោះបានរាយការណ៍ថា បានឃើញកសិករវៀតណាមខិតចូលមកកាន់តែកៀកនឹងថ្មបីដុំនេះ រហូតដល់ទីបំផុតវាត្រូវបានអះអាងសិទ្ធិកាន់កាប់ដោយអាជ្ញាធរវៀតណាមនៅដើមខែនោះ។
មេឃុំកំពង់ក្រសាំងមកពីគណបក្សប្រជាជនកម្ពុជា ជាទីដែលថ្មបីដុំនេះស្ថិតនៅបានបញ្ជាក់អំពីលទ្ធផលនៃការរកឃើញរបស់លោក កែម ឡី អំឡុងកិច្ចសម្ភាសន៍មួយកាលពីខែមុន។ លោក កែម ឡី នៅតែប្រកាន់តាមការលើកឡើងរបស់ខ្លួនកាលពីម្សិលមិញ។
លោកបានមានប្រសាសន៍ថា ”ខ្ញុំគិតថា តំបន់នោះនៅក្នុងទឹកដីវៀតណាម ព្រោះអាជ្ញាធរវៀតណាមកំពុងតែឈរជើងនៅទីនោះ ហើយមិនអនុញ្ញាតឲ្យពលរដ្ឋខ្មែរចូលទៅទីនោះឡើយ”។
លោក ឡាយ វណ្ណៈ អភិបាលខេត្តតាកែវបានលើកឡើងថា លោកនឹងប្រើប្រាស់ដែនសមត្ថកិច្ចរបស់លោកតាមចាប់នរណាដែលហា៊នអះអាងថា ភូមិថ្មបីដុំស្ថិតនៅក្រោមការគ្រប់គ្រងរបស់វៀតណាម។
លោកបានមានប្រសាសន៍ថា ”ខ្ញុំនឹងចាប់វ៉ៃខ្នោះ ប្រសិនបើពួកគេមកតំបន់នេះ ហើយ អះអាងថា ថ្មបីដុំបាត់បង់ទៅទឹកដីវៀតណាម ព្រោះពួកគេប្រើប្រាស់ប្រជាភិថុតិនយោបាយដើម្បីបោកប្រាស់ប្រជាពលរដ្ឋ”៕ ស៊ុយឈាង