លី អ៊ីវ៉ាធីណា
Mon, 14 March 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: ឈានដល់វ័យ ៣១ ឆ្នាំ តារាចម្រៀង លី អ៊ីវ៉ាធីណា ក៏បែកភាពភ្ញាក់ផ្អើល ពីពិធីធ្វើខួបកំណើតលើកដំបូងធំដុំ មានអញ្ជើញភ្ញៀវចូលរួម ក្រោមស្បៃរាត្រីថ្ងៃទី ១០ ខែមីនា នៅភោជនីយដ្ឋានវីហ្រ្វេន ខាងកើតផ្សារដេប៉ូ។
តារាចម្រៀងផលិតកម្មថោន ដែលល្បីបរាជ័យស្នេហ៍ រលាយគម្រោងមុនដឹកដៃគ្នាចូលរោងការបញ្ចប់ជីវិតនៅលីវ នាង លី អ៊ីវ៉ាធីណា ក៏បានសារភាពថា ស្នេហ៍ថ្មីបានដុះពន្លកឡើងពីដីអាមេរិកមកដែរ តែសម្រាប់គម្រោងក្រាបផ្ទឹមតាមប្រពៃណី អាចនឹងរំលងមួយជំហាន ដោយអាចនឹងរួមខ្នើយជាមុនដើម្បីសិក្សាគ្នាថានឹងអាចបន្តសម្ព័ន្ធស្នេហ៍នេះឬយ៉ាងណា?
ជាមួយរ៉ូបពណ៌មាសខ្លីលើជង្គង់ ឆែកសឹងដល់គល់ភ្លៅ មានក្បាច់ជីបបូនៅត្រង់ក្បាលពោះ បុរសៗឃើញគួរឲ្យក្នាញ់សាច់ដើមទ្រូងសម៉ដ្ឋរលាងដូចពងមាន់បក មើលទៅឃើញសរសៃឆ្លុះពីភ្លើងពណ៌រាត្រីនោះ តារាចម្រៀងមានឈាមជ័រចិន និងនិយមច្រៀងបទជាតិកំណើតខ្លួន (ចិន) ផងនោះ កញ្ញា លី អ៊ីវ៉ាធីណា បាននិយាយថា៖ «ការធ្វើខួបកំណើតដែលមានលក្ខណៈអញ្ជើញភ្ញៀវធ្វើនៅហាងអ៊ីចឹងៗ មិនមែនជាគំនិតខ្ញុំទេ»។
តារាចម្រៀងម្ចាស់បទ «ស្ដាយមិនបានសារភាពថាស្នេហ៍» កញ្ញា លី អ៊ីវ៉ាធីណា បានបញ្ជាក់ថា៖ «ខួបកំណើតខ្ញុំនៅយប់ថ្ងៃទី ១០ មីនា ដែលបានមកធ្វើដល់ហាងនេះ វាជាគំនិតប្អូនៗជំរុញឲ្យធ្វើ ដែលពួកគេក៏ចេះតែនិយាយថា យើងជាតារាចម្រៀងល្បីប៉ុណ្ណឹងដែរ ក៏ធ្វើតាមប្អូនៗទៅ វាបានសប្បាយជុំគ្នាមិត្តសិល្បៈផង»។
យ៉ាងណាមិញ តារាចម្រៀងស្រីកូនកាត់ចិន រាងតូចច្រឡឹង ដែលមុននេះក៏ល្បីរឿងខកចិត្ត ស្អិតទ្រូង រឿងបរាជ័យជីវិតស្នេហា គ្រារៀបគម្រោងដឹកដៃគ្នាចូលរោងការហើយនោះ នាង លី អ៊ីវ៉ាធីណា ក៏បានប្រាប់ដែរថា៖ «ការធ្វើខួបលើកទី ១ នៅវ័យ ៣១ ឆ្នាំនេះក៏មិនមានអញ្ជើញភ្ញៀវច្រើនណាស់ណាទេ អញ្ជើញតែមិត្តសិល្បៈជិតស្និទ្ធប្រមាណជាង ១០ នាក់ និងបងប្អូនមិត្តភក្ដិក្រៅសិល្បៈបន្តិចបន្តួចដែរហ្នឹងទេ»។
ក្នុងរាត្រីប្រារព្ធពិធីដ៏មានអត្ថន័យក្នុងជីវិត និងឱកាសផ្លុំទៀននៅវ័យ ៣១ ឆ្នាំ តារាចម្រៀងស្រីរូបនេះក៏បានបង្ហាញពន្លឺបេះដូងថា នាងបានស្វាគមន៍កន្លង់នៅប្រទេសមហាអំណាចដែលស្ម័គ្រសុំស្នេហ៍មើលថែនាងផងដែរ។ថ្លែងបង្ហើបពីម្ចាស់ស្នេហ៍ថ្មីដែលមកសុំស្អំ ព្យាបាលស្នាមរបួសស្នេហ៍នោះ តារាចម្រៀងលី អ៊ីវ៉ាធីណា បានបង្ហើបឲ្យដឹងទៀតថា៖ «ពេលនេះបេះដូងក៏មានឱកាសព្យាបាលរបួសមុននោះហើយដែរ ពីបុរសនៅអាមេរិក។ តែយ៉ាងណាវាក៏នៅត្រឹមដំណាក់កាលសិក្សាចិត្តថ្លើមគ្នាដែរ បើមើលទៅមិនអាចទៅអនាគតបាននោះ ក៏មិនបន្តយូរដែរ»។
ក្នុងសម្ដីលើកឡើងថា៖ «ជីវិតស្នេហានៅសម័យនេះងាយនឹងមានភាពផុយស្រួយនោះ តារាចម្រៀងសាច់សក្បុសជាប់សែស្រឡាយចិនរូបនេះ ក៏បានប្រាប់ទៀតថា៖ «ការបង្កើតស្នេហានេះ សម្រាប់ខ្ញុំពេលនេះ អ្វីដែលត្រូវគិត បើមានស្នេហានោះ រឿងរៀបការនោះ មិនទាន់គិតទេ បើមើលថា អាចរស់នៅជាមួយគ្នាបាន គឺចុះអេតាស៊ីវិលរស់នៅជាមួយគ្នាសិន ទើបបានទៅគិតរឿងរៀបការ»។
តារាចម្រៀង លី អ៊ីវ៉ាធីណា ក៏ពន្យល់ផងថា៖ «អារឿងបែកគ្នានោះ មិនថាអ្នកមិនទាន់បានរៀបការ ក្រាបក្បាលដល់កន្ទេលទេ ឃើញខ្លះការបានមួយខែ កន្លះខែបែកគ្នាក៏មាន»។ថ្លែងពីបំណងចុះអេតាស៊ីវិលរួមរស់មិនបាច់មានពិធីតាមប្រពៃណីនោះ កញ្ញា លី អ៊ីវ៉ាធីណា ថ្លែងថា៖ «អ៊ីចឹងបានជាខ្ញុំគិតថា ស្នេហាខ្ញុំពេលបន្ទាប់នេះ បើមើលទៅ អាចរស់នៅជាមួយគ្នាទៅថ្ងៃអនាគតបាន គិតមុនគេគឺចុះអេតាស៊ីវិល ហើយទើបបានគិតរឿងរៀបការ»៕