ដោយ ជិន ជេដ្ឋា
2016-04-01
RFA
ស្ដាប់ ឬ ទាញយកសំឡេង
សាលាដំបូងខេត្តពោធិ៍សាត់។ រូបថតថ្ងៃទី២៩ ខែកញ្ញា ឆ្នាំ២០១៥ (RFA/Chin Chetha)
ចៅក្រមសាលាដំបូងខេត្តពោធិ៍សាត់ កំពុងដំណើរការនីតិវិធីរឿងក្ដីព្រហ្មទណ្ឌទាក់ទងនឹងបុរសម្នាក់ដែលចាំដីឲ្យអង្គភាពក្រសួងការពារជាតិ ប្រើអាវុធបាញ់ពលរដ្ឋដឹកអុសឲ្យរបួសជើងខាងឆ្វេង។ ក្រុមគ្រួសារជនរងគ្រោះ និងមន្ត្រីការពារសិទ្ធិមនុស្សលីកាដូ (LICADHO) ខេត្តពោធិ៍សាត់ ស្នើឲ្យស្ថាប័នតុលាការចាត់ការរឿងក្ដីនេះឲ្យបានហ្មត់ចត់ ដើម្បីរកយុត្តិធម៌ឲ្យអ្នករបួស។
ប្រធានសាលាដំបូងខេត្តពោធិ៍សាត់ លោក ថោង អុល ឲ្យដឹងនៅថ្ងៃទី៣១ ខែមីនា ថា លោកកំពុងរៀបចំដីកាកោះហៅភាគីពាក់ព័ន្ធក្នុងសំណុំរឿងមកសាកសួរ បន្ទាប់ពីសម្រេចឃុំខ្លួនបណ្ដោះអាសន្នលើជនត្រូវចោទកាលពីថ្ងៃទី២៩ ខែមីនា ឆ្នាំ២០១៦។ លោកមិនទាន់អាចអត្ថាធិប្បាយអ្វីបានជុំវិញករណីនេះនៅឡើយទេ ព្រោះសំណុំរឿងកំពុងដំណើរការ។
ចំណែកនាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តពោធិ៍សាត់ លោក ម៉ូលី ដា ថ្លែងថា ជនបង្កហេតុឈ្មោះ ប៊ិន ខន អាយុ ៥០ឆ្នាំ មិនមែនជាមន្ត្រីយោធានោះទេ ប៉ុន្តែជននេះមានតួនាទីមើលការខុសត្រូវដីអភិវឌ្ឍក្រសួងការពារជាតិ នៅតំបន់អូរថ្មដំរី ឋិតនៅក្នុងឃុំឈើតុំ ស្រុកក្រគរ។
លោកថា បទចោទនៅក្នុងសំណុំរឿងនេះ គឺប្រើប្រាស់អាវុធដោយគ្មានការអនុញ្ញាត៖ «អាវុធគេដាក់នៅក្នុងអង្គភាពរបស់គេ (យោធា) ប៉ុន្ដែដល់ពេលមនុស្សហ្នឹងមកជួយមើលការខុសត្រូវ អ៊ីចឹងយកមកប្រើមក។ ស្ដាប់ការសួរចម្លើយទៅថា គេឲ្យគាត់ចូលធ្វើទាហាន ដោយសារអាយុគាត់លើសធ្វើអត់បាន ដល់ធ្វើអត់បានទៅគេឲ្យជួយមើលដី ដំណាំអីនៅត្រង់ហ្នឹង»។
ជនរងគ្រោះដែលត្រូវគ្រាប់កាំភ្លើងត្រង់មេជើងខាងឆ្វេង គឺលោក ញួន សាវុធ អាយុ ៣៨ រស់នៅភូមិកណ្ដាល ឃុំឈើតុំ ស្រុកក្រគរ ខេត្តពោធិ៍សាត់ រំលឹកហេតុការណ៍ដែលបានកើតឡើងថា នៅម៉ោង ១ និង ៣០នាទីរសៀលថ្ងៃទី២៦ ខែមីនា រូបលោកបានបើកគោយន្តដឹកអុសគ្រាក់ ជាមួយពលរដ្ឋដឹកអុសដោយគោយន្តពីរគ្រឿងផ្សេងទៀតចេញពីចំណុចអូរថ្មដំរី ឆ្ពោះទៅចំណុចអូសទូកឋិតនៅឃុំឈើតុំ។
នៅតាមផ្លូវមានរោងស្ទាក់ចាំយកលុយមួយកន្លែង។ ពេលនោះឈ្មោះ ប៊ិន ខន ចេញមកឃាត់ និងពន្លត់ម៉ាស៊ីនគោយន្តទាំងបីគ្រឿង ហើយដើរចូលទៅក្នុងរោងវិញដោយស្រែកគំរាមថា ពួកឯងត្រូវយករណាង៉ោងមកឲ្យអញ ហើយទម្លាក់អុសពីលើរទេះឲ្យអស់ រួចបររទេះទៅផ្ទះវិញទទេ។ លោកក៏បានដកលុយពីក្នុងហោប៉ៅ ចំនួនបីពាន់រៀលហុចឲ្យឈ្មោះ ប៊ិន ខន ហើយឲ្យរទេះពីរគ្រឿងបរទៅមុន។
ភ្លាមនោះឈ្មោះ ប៊ិន ខន មិនទទួលយកលុយទេ ដោយស្រែកបញ្ជាឲ្យកូនចៅស្ទាក់គោកយន្តកុំឲ្យទៅមុខទៀត ហើយកូនចៅរូបនោះបានបាញ់គំរាម ១គ្រាប់ឡើងលើ ទើបគោយន្តទាំងអស់ឈប់ហើយលោកបម្រុងនិយាយចរចាម្ដងទៀត ប៉ុន្តែស្រាប់តែឈ្មោះ ប៊ិន ខន ទាញកាំភ្លើងមកបាញ់តម្រង់ជើងលោកតែម្ដង។
រំពេចនោះលោកស្រែកឲ្យអ្នកដឹកអុសដូចគ្នាជួយគ្រាលោករត់គេចពីកន្លែងកើតហេតុ៖ «ជើងបាត់ពើត (ឈឺ) ហើយ តែនៅអួលៗ ត្រង់ឆ្អឹងបន្តិច! ត្រូវចំមេជើងដល់ឲ្យគេថតមើលឃើញប្រះឆ្អឹង។ ខ្ញុំចង់ឲ្យអ្នកបង្កហេតុបង់ជំងឺចិត្តឲ្យខ្ញុំ។ ដឹកអុសគ្រាក់រាប់ម៉ឺនគោយន្តខុសច្បាប់អីបង អុសគ្រាក់សល់ពីចំណីភ្លើង យើងកាត់ប្រវែងពីរៗចំអាម»។
មាត្រា ៤៩០ នៃក្រមព្រហ្មទណ្ឌកម្ពុជា ចែងថា បទល្មើសកាន់កាប់ ឬដឹកជញ្ជូនអាវុធដោយគ្មានការអនុញ្ញាត គឺគ្រប់បុគ្គលដែលនៅក្រៅលំនៅឋានរបស់ខ្លួនយកអាវុធតាមខ្លួន ឬដឹកជញ្ជូនអាវុធ គ្រឿងផ្ទុះ និងគ្រាប់រំសេវគ្រប់ប្រភេទដោយគ្មានការអនុញ្ញាតពីអាជ្ញាធរមានសមត្ថកិច្ច ត្រូវផ្ដន្ទាទោសដាក់ពន្ធនាគារពី ៦ខែ ទៅដល់ ៣ឆ្នាំ និងពិន័យជាប្រាក់ពី ១លានរៀល ទៅដល់ ៦លានរៀល។
មន្ត្រីអង្គការលីកាដូ ខេត្តពោធិ៍សាត់ លោក អេង ឈុនហាន ថាលោកនឹងចុះអង្កេតករណីនេះឲ្យបានច្បាស់នៅក្នុងសប្ដាហ៍ទី១ នៃខែមេសា ដើម្បីដាក់លិខិតសុំអន្តរាគមន៍ទៅតំណាងអយ្យកា ដើម្បីរកយុត្តិធម៌ជូនជនរងគ្រោះ។ លោករិះគន់ថា អាវុធជាតិផ្ទះត្រូវបានគ្រប់គ្រងយ៉ាងតឹងរ៉ឹង ប៉ុន្តែបុគ្គលមិនមែនជាយោធាបាញ់បោះតាមចិត្តនោះ គឺជាការទទួលខុសត្រូវរបស់អ្នកគ្រប់គ្រងនៅទីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ក្រសួងយុត្តិធម៌ណែនាំឲ្យតុលាការខេត្ត-ក្រុងថ្លឹងថ្លែងមុនសម្រេចឃុំពលរដ្ឋក្នុងរឿងដីធ្លី
- តុលាការខេត្តរតនគិរីចោទមេភូមិនិងមេឃុំកាប់រានព្រៃឈើខុសច្បាប់
- ក្រសួងយុត្តិធម៌កោះប្រជុំមន្ត្រីតុលាការរឿងឃុំខ្លួនបណ្ដោះអាសន្នក្នុងទំនាស់ដីធ្លី
- ស្ត្រីបឹងកក់ព្រមានគណបក្សប្រជាជនរឿងបញ្ហាដីធ្លី
- តុលាការខេត្តកំពង់ស្ពឺដោះលែងស្ត្រីមានជម្លោះដីធ្លីបន្ទាប់ពីលោក ហ៊ុន សែន អន្តរាគមន៍
- សាលាដំបូងខេត្តក្រចេះឃុំខ្លួនអ្នកមានជម្លោះដីធ្លីបីនាក់ចោទរារាំងប្រតិបត្តិការសមត្ថកិច្ច
- ជនជាតិដើមភាគតិចស្ទៀង៧នាក់ត្រូវតុលាការហៅសាកសួររឿងកាប់រានព្រៃ
- ទណ្ឌិតគំរាមសម្លាប់លោក សុខ ទូច ចេញពីពន្ធនាគារ
- តុលាការខេត្តកំពង់ស្ពឺសម្រេចឃុំខ្លួនស្ត្រីពីរនាក់ក្នុងរឿងជម្លោះដីធ្លី