អ្នកនាង សុខ ច័ន្ទធីតា និងស្វាមី ដែលកំពុងសម្រាកព្យាបាល។ ហ្វេសប៊ុក វុទ្ធី
Tue, 7 June 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: រូបថតជាច្រើនសន្លឹក បង្ហាញពីអាការប្តីតារាកំប្លែងសម្បូរវោហារស័ព្ទមិនចេះរីងស្ងួត អ្នកនាង សុខ ច័ន្ទធីតា ហៅ កាតុ តន្ត្រីករលេងពុកចង្កា លោក ខ្យង ដេកស្តូកស្តឹងកំពុងត្រូវបានគ្រូពេទ្យនៅប្រទេស វៀតណាមសង្គ្រោះ ជាមួយនឹងទឹកមុខអ្នកនាង កាតុ ក៏ស្លេកនោះ ក៏ត្រូវបានសាច់ញាតិដែលមិនបានរួមដំណើរទៅជាមួយបញ្ជាក់ថា៖ «អ្នកកំប្លែង កាតុ កំពុងជួបទុក្ខធំ ដែលប្តីជាតន្ត្រីករ ដាច់សរសៃឈាមក្នុងបេះដូង ក៏នាំទៅសង្គ្រោះនៅវៀតណាម កាលពីយប់ថ្ងៃទី ៤ ខែមិថុនា»។
ប្រភពពីសាច់ញាតិនៅរាធានីភ្នំពេញក៏បានបង្ហើបបន្ថែមទៀតថា៖ «តារាកំប្លែង កាតុ បានចំណាយអស់ប្រាក់ជាងមួយម៉ឺនដុល្លារ ក្នុងការព្យាបាល និងសង្គ្រោះស្វាមីនាងដែលមានជំងឺដាច់សរសៃឈាមបេះដូង។ ពេលនេះស្ថានភាពជំងឺប្តីរបស់នាងបានធូរស្រាលបន្តិចហើយ»។
ទន្ទឹមនឹងនោះក៏មានលាន់មាត់ផងដែរថា ដោយសារជំងឺធ្វើទុក្ខយ៉ាងទាន់ហន់ ដូចនេះអ្នកនាង កាតុ មិនខ្វល់នឹងការចំណាយប្រាក់អស់ប៉ុន្មានទេ សុំឲ្យតែប្តីរួចផុតពីគ្រោះថ្នាក់។ ប្រភពដដែលនោះបញ្ជាក់ទៀតថា៖ «បងស្រី កាតុ បានបញ្ជូនប្តីគាត់ទៅប្រទេសវៀតណាម ភ្លាមៗ កាលពីយប់ថ្ងៃទី ៤ ខែមិថុនា បន្ទាប់ពីជំងឺធ្វើទុក្ខខ្លាំង»។
តារាកំប្លែង អ្នកនាង សុខ ច័ន្ទធីតា ហៅ កាតុ។ វុទ្ធី
ក្រោយពីទទួលបានការសង្គ្រោះពីគ្រូពេទ្យនៃប្រទេសវៀតណាម ការវិវឌ្ឍនៃអាការជំងឺដាច់សរសៃឈាមក្នុងបេះដូងរបស់លោក គង់ សុទ្ធា ហៅ ខ្យង ជាតន្ត្រីករវាយស្គរ និងជាស្វាមី តារាកំប្លែងនាង កាតុ យ៉ាងណានៅមិនមានការបញ្ជាក់ថាយ៉ាងណាពីសាច់ញាតិនោះទេ រហូតមកដល់ពេលនេះ ខណៈ ភ្នំពេញប៉ុស្តិ៍ ដែលព្យាយាមទំនាក់ទំនងទៅអ្នកនាង កាតុ តាមបណ្តាញសង្គមតែមិនបានការឆ្លើយតប។មិត្តភក្ដិសិល្បៈជាច្រើនក៏សម្តែងការព្រួយបារម្ភយ៉ាងខ្លាំងពីស្ថានភាពជំងឺរបស់ប្តី អ្នកនាង កាតុ ដែលក្នុងនោះ ក៏មានពិធីការិនី ឌួង ហ្សូរីដា និងអ្នកនាង ចន ច័ន្ទលក្ខិណា ផងដែរ។
ព្រមជាមួយគ្នាអ្នកសិល្បៈដែលស្និទ្ធនឹងគ្រួសារតារាកំប្លែងអ្នកនាង កាតុនោះក៏បានបង្ហើបថា៖ «ប្តីអ្នកនាង កាតុ ជាតន្ត្រីករលោក ខ្យង នោះ ពុំធ្លាប់មានអាការជំងឺបែបនេះទេពីមុនពោលគឺសុខភាពគាត់ល្អធម្មតា។ នេះជាលើកទី ១ ហើយដែលស្វាមី របស់តារាកំប្លែង អ្នកនាង កាតុ បានធ្លាក់ខ្លួនឈឺ ដោយសារតែសម្ពាធឈាមឡើង ដាច់សរសៃឈាម បេះដូង មានអាការធ្វើទុក្ខខ្លាំង រហូតត្រូវបញ្ជូនទៅព្យាបាល នៅប្រទេសវៀតណាមទាំងយប់កាលពីថ្ងៃទី ៤ មិថុនា»។
ប៉ុន្តែជាមួយនឹងការផុសរូបជាមួយប្តី អមដោយទឹកមុខស្រពាប់ស្រពោន ក្នុងសម្លៀកបំពាក់ពេទ្យរៀបចំឲ្យនោះ អ្នកនាង កាតុ ក៏បានសរសេរប្រាប់អ្នកគាំទ្រ នាងថា៖ «ពេលនេះគាត់នៅបន្ទប់ ICU (សង្គ្រោះបន្ទាន់) នៅឡើយ តែខ្ញុំចង់ថ្លែងអំណរគុណដល់បងប្អូន និងមិត្តៗទាំងអស់ដែលបន់ស្រន់និងបួងសួងឲ្យគាត់ឆាប់ជាសះស្បើយពីជំងឺ ពេលនេះខ្ញុំគ្មានអ្វីក្រៅពីលើកម្រាមដៃដប់ថ្លែងអំណរគុណ និងជូនពរចំពោះបងប្អូន និងមិត្តៗទាំងអស់ជួបតែសេចក្តីសុខចម្រើនចៀសផុតពីជំងឺផងទាំងឡាយគ្រប់ៗក្រុមគ្រួសារ»។
គួររំឭកថា អ្នកនាង កាតុ បានរៀបការជាមួយលោកខ្យង ប្រមាណ ១០ ឆ្នាំមកហើយ ដោយមានកូនស្រីវ័យជាង ២ ខួបជាចំណងដៃ៕