ក្រុមគ្រួសារជនជាតិអាល្លឺម៉ង់លោក Lehmann Tobias និងភរិយា Carolin ព្រមទាំងកូនប្រុស Max។ ហុង មិនា
Wed, 8 June 2016
Vandy Muong
ភ្នំពេញប៉ុស្តិ៍
កំពត: សែនចម្លែកភ្នែកជាមួយនឹងការតុបតែងបិទស្មៅជុំវិញ ប្រជាជន និងអាជ្ញាធរក្នុងតំបន់ចាប់អារម្មណ៍យ៉ាងខ្លាំងជាមួយវត្តមានរថយន្តមួយគ្រឿងដែលបានចតនៅហាងកាហ្វេទឹកដីខេត្តកំពតនាសប្តាហ៍មុន។
រថយន្តដែលមានលក្ខណៈមិនច្រឡំជាមួយរថយន្តក្នុងប្រទេសនេះ គឺជាយានជំនិះក្នុងដំណើរផ្សងព្រេងកាត់ប្រទេសឆ្លងទ្វីប របស់ក្រុមគ្រួសារមួយមានសមាជិកបីនាក់គឺឪពុក ម្តាយ និងកូនប្រុសអាយុពីរខួប។
លោក Lehmann Tobias និងភរិយា Carolin ព្រមទាំងកូនប្រុសសំណព្វ Max បានរៀបរាប់ពីនិយមន័យ នៃការផ្សងព្រេងរបស់ពួកគេថា៖ «ដំណើរផ្សងព្រេងគឺមានអត្ថន័យផ្សេងៗទៅតាមបទពិសោធ សម្រាប់ពួកយើង អ្វីដែល ពួកយើងមិនធ្លាប់ឃើញ មិនដែលបានទៅដល់ មិនដែលគិតនឹងមានអ្វីកើតឡើងនៅថ្ងៃស្អែក និងអនាគត និងការបើកចិត្តឲ្យទូលាយទទួលយកអ្វីដែលថ្មីៗ សុទ្ធសឹងតែជាការផ្សងព្រេង»។
គ្រួសារអាល្លឺម៉ង់ទាំងបីនាក់នេះ បានធ្វើដំណើររួមគ្នាមកដល់ប្រទេសកម្ពុជា បន្ទាប់ពីដំណើរផ្សងព្រេងនៅប្រទេសម៉ាឡេស៊ី និងអូស្ត្រាលីតាមយន្តហោះ កប៉ាល់ និងឡានរបស់ពួកគាត់។ អ្នកទាំងពីរបានធ្វើដំណើរឆ្លងកាត់ប្រទេសអីរ៉ុប និងប្រទេសនៅអាស៊ី ដូចជា រុស្ស៊ី អូស្ត្រាលី នេប៉ាល់ ឥណ្ឌា ម៉ុងហ្គោលី ចិន និងប្រទេសជាច្រើនទៀត។
ពួកគេបានសម្រេចចិត្តចាប់ផ្តើមដំណើរកម្សាន្តផ្សងព្រេងជាមួយគ្នាអស់រយៈពេល ៥ ឆ្នាំមកហើយ ដោយបោះបង់ចោលនូវការងារក្នងការិយាល័យជាស្ថាបត្យករ និងបុគ្គលិកក្នុងមន្ទីរពេទ្យដើម្បីស្រង់នូវអ្វីដែលជាទិដ្ឋភាពជាក់ស្តែងដែលមាននៅក្នុងពិភពលោក។
ប្ដីប្រពន្ធអាល្លឺម៉ង់ដែលផ្ដល់កំណើតកូនប្រុសនៅទឹកដីអូស្ត្រាលីកាលពីឆ្នាំ ២០១៤ នោះ បានរៀបរាប់ទៀតថា៖ «ថ្មីៗនេះពួកយើងបានធ្វើដំណើរពីប្រទេសអូស្ត្រាលីមកម៉ាឡេស៊ី ហើយយើងបានបន្តមកប្រទេសកម្ពុជាបន្ទាប់ពីបានបងើ្កតនូវប្រេងធម្មជាតិមួយចំនួនដូចជា ប្រេងលាបខ្លួន សាប៊ូដុសខ្លួន ដែលផ្សំឡើងពីផ្តាក្រូចឆ្មារ សឹ្លកគ្រៃ និងអាវយឺតពួកយើងធ្វើការច្នៃប្រឌិតហើយនឹងបន្តទៅប្រទេសឡាវបន្ទាប់ពីដំណើរផ្សងព្រេងក្នុងប្រទេសកម្ពុជា»។
ពួកគាត់បានបង្កើតឈ្មោះ និងស្លាកសញ្ញាដោយខ្លួនឯងផ្ទាល់ពីប្រទេសមួយទៅប្រទេសមួយ ដោយនៅប្រទេសកម្ពុជា ពួកគាត់បានផលិតជាខោចែវដែលជារបស់ធ្វើដោយដៃ។ការច្នៃប្រឌិតបង្កើតផលិផលទាំងនោះគឺដើម្បីផ្គត់ផ្គង់ដំណើរផ្សងព្រេងរបស់ពួកគាត់មួយចំនួន និងមួយចំនួនទៀត (៥០ភាគរយ) គឺធ្វើការបរិច្ចាគជួយទៅប្រទេសនេប៉ាល់។
លោកលោក Lehmann Tobias និងភរិយា Carolin បានរំឭកថា៖ «មុនពេលដែលពូកយើងមកដល់កម្ពុជា មិត្តភក្តិមួយចំនួនបានប្រាប់ពូកយើងថា ប្រទេសកម្ពុជាជាប្រទេសក្រីក្រ និងគ្មានសុវត្ថិភាព តែនៅពេលដែលពួកយើងបានបន្តរថយន្តតាមកប៉ាល់ពីប្រទេសម៉ាឡេស៊ីមកក្រុងកែបប្រទេសកម្ពុជា ពួកយើងសង្កេតឃើញថាវាពិតជាខុសទៅនឹងអ្វីដែលពួកគេបានប្រាប់ពួកយើង»។
ជាក់ស្តែង ពួកគាត់បានភ្ញាក់ផ្អើលទៅវិញ ដោយឃើញពីការរាក់ទាក់ ការរស់នៅ ធម្មជាតិ ប្រពៃណី និងវប្បធម៌ខ្មែរ។អំឡុងពេលស្នាក់នៅកំពតរយៈពេល ២ ខែកន្លះ កូនប្រុសពួកគាត់បានស្គាល់នូវការរស់នៅជាមួយក្មេងនៅសាលាមត្តេយ្យ និងរីករាយជាមួយក្រុមគ្រួសារខ្មែរ។
អ្នកទាំងពីរបន្ថែមថា៖ «ពួកយើងនឹងបន្តដំណើរផ្សងព្រេងនេះទៅកាន់រាជធានីភ្នំពេញ និងខេត្តមួយចំនួនដូចជាសៀមរាប និងបាត់ដំបងដោយមិនមានពេលកំណត់ជាក់លាក់មួយសម្រាប់ការស្នាក់នៅ»។
ផលិតផលពួកគេមានដាក់លក់ក្នុងប្រព័ន្ធអ៊ីនធឺណិតតាមរយៈវេបសាយ (thegrassvan.com)៕