ដោយ សាន សែល
2016-06-09
RFA
កងកម្លាំងរក្សាសន្តិភាពកម្ពុជា ដែលត្រឡប់មកពីបំពេញបេសកកម្មនៅទ្វីបអាហ្វ្រិក ជួបជុំក្រុមគ្រួសារនាអាកាសយានដ្ឋានអន្តរជាតិភ្នំពេញ នៅព្រឹកថ្ងៃទី៩ មិថុនា ឆ្នាំ២០១៦។ RFA/Uon Chhin
កងកម្លាំងរក្សាសន្តិភាពកម្ពុជា ចំនួន ៣៩០នាក់ បានវិលត្រឡប់មកដល់កម្ពុជាវិញហើយ បន្ទាប់ពីចូលរួមបំពេញបេសកកម្មរបស់អង្គការសហប្រជាជាតិនៅទ្វីបអាហ្វ្រិក។ តំណាងអង្គការសហប្រជាជាតិអរគុណកងទ័ពកម្ពុជា ដែលជួយប្រទេសកំពុងត្រូវការជំនួយបន្ទាន់។ ភាគីកម្ពុជា ក៏បង្ហាញប្ដេជ្ញាចិត្ត ជួយរក្សាសន្តិភាពពិភពលោកបន្តទៀត។
កងកម្លាំងចំនួន ៣កង ពីកងវិស្វកម្មព្រលានយន្តហោះលេខ ៩១៨ និងកងកម្ទេចគ្រាប់មិនទាន់ផ្ទុះលេខ៣១២ ទៅបំពេញបេសកកម្មនៅសាធារណរដ្ឋម៉ាលី (Mali) និងកងអាវុធហត្ថលេខ១៦៨ ទៅបំពេញបេសកកម្មនៅសាធារណរដ្ឋស៊ូដង់ខាងត្បូង (South Sudan) មកដល់កម្ពុជាវិញហើយ នៅថ្ងៃទី ៩ ខែមិថុនា។
នេះជាឆ្នាំទី១០ហើយដែលកម្ពុជា បានបញ្ជូនកងរក្សាសន្តិភាពទៅបរទេសដើម្បីបុព្វហេតុសន្តិភាព និងមនុស្សធម៌លើពិភពលោក។
រដ្ឋមន្ត្រីក្រសួងការពារជាតិ លោក ទៀ បាញ់ បញ្ជាក់នៅក្នុងពិធីទទួលការវិលត្រឡប់នៃកងរក្សាសន្តិភាពកម្ពុជា នៅមូលដ្ឋានទ័ពអាកាសពោធិចិនតុង ថា រដ្ឋាភិបាលកម្ពុជា ប្ដេជ្ញាចិត្តយ៉ាងមុតមាំក្នុងការរក្សាសន្តិភាពសម្រាប់ពិភពលោក។ លោកបន្ថែមថា កងយោធពលខេមរភូមិន្ទ នឹងបង្កើនសហប្រតិបត្តិការជាមួយអង្គការសហប្រជាជាតិឲ្យកាន់តែសកម្ម ដោយពង្រឹងធនធានមនុស្ស សមត្ថភាពគ្រឿងប្រដាប់អាវុធ និងបច្ចេកវិទ្យាសម្រាប់បេសកកម្មអន្តរជាតិនេះ៖ «ជារួមទទួលបានការបំពេញបេសកកម្មមនុស្សធម៌ប្រកបដោយជោគជ័យ គឺជាស្នាដៃមានតម្លៃមិនអាចកាត់ថ្លៃបាន ប្រកបដោយកិត្តិយសជូនជាតិមាតុភូមិនៃយើង ព្រមទាំងទទួលបានបទពិសោធន៍ដ៏ល្អ ដែលបញ្ជាក់ពីការយកចិត្តទុកដាក់ គោរពលក្ខន្តិកៈយ៉ាងម៉ឺងម៉ាត់របស់កងយោធពលខេមរភូមិន្ទ…»។
ថ្មីៗនេះ ក្រុមភេរវជនបានវាយប្រហារកងរក្សាសន្តិភាពរបស់អង្គការសហប្រជាជាតិ នៅប្រទេសម៉ាលី បណ្ដាលឲ្យកងទ័ពស្លាប់ ៥នាក់។
អ្នកសម្របសម្រួលអង្គការសហប្រជាជាតិប្រចាំកម្ពុជា អ្នកស្រី ឃ្លែរ វ៉ាន់ ដឺ វ៉ារែន (Claire Van Der Varaen) កោតសរសើរចំពោះភាពក្លាហានរបស់ទាហានកម្ពុជា ដែលស្ម័គ្រចិត្តជួយសង្គ្រោះជីវិតប្រជាជនស៊ីវិលរាប់ពាន់នាក់ ដែលកំពុងរស់នៅដោយការភ័យខ្លាច៖ «សូមឆ្លៀតយកឱកាសនេះគោរពដល់កងកម្លាំងរក្សាសន្តិភាពដែលមានភាព ក្លាហាន គោរពវិន័យ និងបានបរិច្ចាគក្នុងតំបន់ផ្នែកវិស្វកម្មព្រលានយន្តហោះ បោសសំអាតមីន រក្សាសណ្ដាប់ធ្នាប់ និងសេវាកម្មសុខភាព ហើយការបំពេញភារកិច្ចនេះត្រូវបានទទួលការកោតសរសើរយ៉ាង ខ្លាំងក្លា»។
អ្នកស្រីក៏សង្កេតឃើញវត្តមានទ័ពជាស្ត្រីបានចូលរួមថែរក្សាសន្តិភាពនៅអាហ្វ្រិកផងដែរ។ ការនេះធ្វើឲ្យអ្នកស្រីមើលឃើញពីសមភាពយេនឌ័រក្នុងស្ថាប័នយោធា។
នៅឆ្នាំ២០១៦ កងកម្លាំងរក្សាសន្តិភាពរបស់កម្ពុជា ចំនួន ៨៨៨នាក់ បំពេញបេសកកម្មនៅក្នុងប្រទេសស៊ូដង់ (Sudan) ស៊ូដង់ខាងត្បូង (South Sudan) លីបង់ (Lebanon) ម៉ាលី (Mali) និង សាធារណរដ្ឋអាហ្វ្រិកកណ្តាល (Central African Republic)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
កងកម្លាំងរក្សាសន្តិភាពកម្ពុជា ដែលត្រឡប់មកពីបំពេញបេសកកម្មនៅទ្វីបអាហ្វ្រិក នាអាកាសយានដ្ឋានអន្តរជាតិភ្នំពេញ។
កងកម្លាំងរក្សាសន្តិភាពកម្ពុជា ដែលត្រឡប់មកពីបំពេញបេសកកម្មនៅទ្វីបអាហ្វ្រិក នាអាកាសយានដ្ឋានអន្តរជាតិភ្នំពេញ។
កងកម្លាំងរក្សាសន្តិភាពកម្ពុជា ដែលត្រឡប់មកពីបំពេញបេសកកម្មនៅទ្វីបអាហ្វ្រិក នាអាកាសយានដ្ឋានអន្តរជាតិភ្នំពេញ។
កងកម្លាំងរក្សាសន្តិភាពកម្ពុជា ដែលត្រឡប់មកពីបំពេញបេសកកម្មនៅទ្វីបអាហ្វ្រិក នាអាកាសយានដ្ឋានអន្តរជាតិភ្នំពេញ។
រដ្ឋមន្ត្រីក្រសួងការពារជាតិ លោក ទៀ បាញ់ និងអ្នកសម្របសម្រួលអង្គការសហប្រជាជាតិប្រចាំកម្ពុជា អ្នកស្រី ឃ្លែរ វ៉ាន់ ដឺ វ៉ារែន (Claire Van Der Varaen) ស្វាគមន៍ការមកដល់របស់កងកម្លាំងរក្សាសន្តិភាព។
រដ្ឋមន្ត្រីក្រសួងការពារជាតិ លោក ទៀ បាញ់ និងអ្នកសម្របសម្រួលអង្គការសហប្រជាជាតិប្រចាំកម្ពុជា អ្នកស្រី ឃ្លែរ វ៉ាន់ ដឺ វ៉ារែន (Claire Van Der Varaen) ស្វាគមន៍ការមកដល់របស់កងកម្លាំងរក្សាសន្តិភាព។
កងកម្លាំងរក្សាសន្តិភាពកម្ពុជា ដែលត្រឡប់មកពីបំពេញបេសកកម្មនៅទ្វីបអាហ្វ្រិក ជួបជុំក្រុមគ្រួសារនាអាកាសយានដ្ឋានអន្តរជាតិភ្នំពេញ។
អ្នកសម្របសម្រួលអង្គការសហប្រជាជាតិប្រចាំកម្ពុជា អ្នកស្រី ឃ្លែរ វ៉ាន់ ដឺ វ៉ារែន (Claire Van Der Varaen) ថ្លែងស្វាគមន៍ការមកដល់របស់កងកម្លាំងរក្សាសន្តិភាព។
អត្ថបទដែលទាក់ទង
- មន្ត្រីស៊ីម៉ាក់ប្រមាណ១០០នាក់នឹងបញ្ចប់គម្រោងរាវរកយុទ្ធភណ្ឌតាមបណ្ដោយផ្លូវជាតិលេខ៥
- អ្នកបើកឡានដឹកខ្សាច់ថាទាហានយកឡានអង្គភាពមកបម្រើប្រយោជន៍បុគ្គល
- ពលរដ្ឋនៅពោធិ៍សាត់ខ្លះមិនពេញនឹងការអភិវឌ្ឍស្ពានកសាងក្នុងរបបប៉ុលពត
- អាជ្ញាធរខេត្តកំពង់ចាមជំរុញឱ្យពលរដ្ឋធ្វើអត្តសញ្ញាណប័ណ្ណក្នុងពេលចូលឆ្នាំ
- អាជ្ញាធរនៅពោធិ៍សាត់គ្រោងរៀបចំកន្លែងសម្រាប់អាជីវករលក់ដូរដែលគ្មានសណ្ដាប់ធ្នាប់
- ក្រសួងការបរទេសមិនទាន់ទទួលបានព័ត៌មានដែលផ្សាយថាកូរ៉េខាងជើងឲ្យជម្លៀសពលរដ្ឋខ្មែរ
- អាជីវករផ្សារឆ្នាំងបារម្ភខ្លាចអាជ្ញាធរដេញចេញពីផ្សារឲ្យទៅលក់នៅកន្លែងថ្មី
- “ការផ្ដល់សេវាមិនបានល្អធ្វើឱ្យពលរដ្ឋខ្លះសម្រេចចិត្តមិនធ្វើអត្តសញ្ញាណប័ណ្ណ”
- សង្គមស៊ីវិលជំរុញឲ្យអាជ្ញាធរខេត្តកំពង់ធំពង្រឹងយន្តការដោះស្រាយបញ្ហាជូនពលរដ្ឋ
- លោក ហ៊ុន សែន បន្តបញ្ជាឲ្យមានវិធានការលើករណីឡានដឹកអង្ករលើសចំណុះ