ដោយ ហ៊ុំ ចំរើន
2016-06-09
RFA
ស្ដាប់ ឬ ទាញយកសំឡេង
វេទិកាសាធារណៈស្វែងយល់អំពីការចុះឈ្មោះបោះឆ្នោតបែបថ្មី នៅសាលប្រជុំសាកលវិទ្យាល័យព្រះសីហនុរាជ ក្នុងវត្តដំរីស ក្រុងបាត់ដំបង ខេត្តបាត់ដំបង កាលពីពីថ្ងៃទី៨ ខែមិថុនា ឆ្នាំ២០១៦។ RFA/Hum Chamroeun
ព្រះសង្ឃប្រមាណ ១០អង្គ និងយុវជនជាង ៥០នាក់ នៅព្រឹកថ្ងៃទី៨ ខែមិថុនា ចូលរួមវេទិកាសាធារណៈស្វែងយល់អំពីការបោះឆ្នោតតាមរបៀបប្រជាធិបតេយ្យ ដែលរៀបចំឡើងដោយមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ហៅកាត់ថា ភី.ឌី.ភី (PDP) នៅសាលប្រជុំសាកលវិទ្យាល័យព្រះសីហនុរាជ ក្នុងវត្តដំរីស ក្រុងបាត់ដំបង។ កម្មវិធីនេះ ធ្វើឡើងក្នុងគោលបំណងផ្ដល់ឱកាសឲ្យយុវជនយល់ដឹងអំពីការចុះឈ្មោះបោះឆ្នោតបែបថ្មី និងលើឡើងកង្វល់នានា ដែលទាក់ទងការបោះឆ្នោតនៅពេលកន្លងទៅ។
តំណាងយុវជនម្នាក់មកពីឃុំកំពង់ព្រះ ស្រុកសង្កែ ខេត្តបាត់ដំបង ដែលបានចូលរួមក្នុងវេទិកា លោក ម៉ើល ម៉ៃ ប្រាប់វិទ្យុអាស៊ីសេរី នៅខាងមុខសាលប្រជុំថា វេទិកានេះមានសារសំខាន់ដល់ប្រជាពលរដ្ឋ ជាពិសេស គឺរូបគេជាយុវជនតែម្ដង បានយល់ដឹងពីរបៀបចុះឈ្មោះបោះឆ្នោតបែបថ្មី ដើម្បីងាយស្រួលដល់ការត្រៀមឯកសារយកទៅចុះឈ្មោះបានឆាប់រហ័ស៖ «ហើយការបោះឆ្នោតនេះដែលវាជាកាតព្វកិច្ច ព្រោះថា សន្លឹកឆ្នោតមួយសន្លឹកជាអនាគតរបស់ប្រទេសយើង អ៊ីចឹងយើងត្រូវទៅចូលរួមដើម្បីកែប្រែប្រទេសយើងទាំងគ្នា»។
ស្រដៀងគ្នានេះដែរ យុវតីមកពីក្រុងបាត់ដំបង ម្នាក់ទៀត គឺកញ្ញា ស៊ន សុជាផាវី ថ្លែងថា កញ្ញាទន្ទឹងរង់ចាំសិក្សាស្វែងយល់ពីការចុះឈ្មោះបោះឆ្នោតបែបថ្មីនេះជាយូរមកហើយ ដើម្បីយល់ដឹងកាន់តែច្បាស់ និងពន្យល់បន្តទៅដល់ពលរដ្ឋនៅក្នុងសហគមន៍របស់កញ្ញា។
កញ្ញាសំណូមពរឲ្យយុវជនគ្រប់រួបដែលមានអាយុចាប់ពី ១៨ឆ្នាំឡើងទៅ ត្រូវទៅចូលរួមចុះឈ្មោះបោះឆ្នោតនៅតាមឃុំសង្កាត់ របស់ខ្លួនឲ្យបានគ្រប់គ្នា ដើម្បីឲ្យការការបោះឆ្នោតនៅឆ្នាំ២០១៧ ប្រកបដោយ ភាពសុក្រឹតនិងយុត្តិធម៌៖ «ការចុះឈ្មោះឆ្នោតនេះ ទីមួយបង្ហាញឲ្យយើងដឹងថា យើងគឺពេញវ័យហើយ យើងមានតួនាទីរបស់យើងហើយដែលយើងត្រូវបំពេញ ហើយអាចឈរដោយខ្លួនឯងបាន។ អ៊ីចឹងយើងបានបំពេញតួនាទីជាយុវជនម្នាក់នៅក្នុងសហគមន៍ ហើយយើងបានជ្រើសរើសមេដឹកនាំដែលយើងពេញចិត្ត»។
ឯកសារសំខាន់ដែលប្រជាពលរដ្ឋអាចយកទៅចុះឈ្មោះបោះឆ្នោតបែបថ្មីនេះបាន គឺអត្តសញ្ញាណប័ណ្ណ។
ប្រធានលេខាធិការគណៈកម្មការរៀបចំការបោះឆ្នោតខេត្តបាត់ដំបង ដែលបានចូលរួមធ្វើជាវាគ្មិន មានប្រសាសន៍ថា ករណីពលរដ្ឋដែលគ្មានអត្តសញ្ញាណប័ណ្ណ គឺជំហានដំបូងពួកគាត់ត្រូវទៅជួបនគរបាលរដ្ឋបាលប៉ុស្តិ៍ដែលខ្លួនរស់នៅធ្វើអត្តសញ្ញាណប័ណ្ណ។ លោកបញ្ជាក់ថា ពេលនោះនគរបាលនឹងចេញលិខិតបញ្ជាក់មួយឲ្យទៅពលរដ្ឋ ហើយនាំលិខិតនោះ ដោយមានសាក្សី ២នាក់ជាប់ទៅមួយផង ដើម្បីឲ្យអាជ្ញាធរឃុំសង្កាត់ចេញលិខិតបញ្ជាក់អត្តសញ្ញាណប្រជាពលរដ្ឋទើបអាចទៅចុះឈ្មោះបាន៖ «រីឯកាលបរិច្ឆេទមិនទាន់ច្បាប់លាស់ទេ។ យើងខ្ញុំនឹងព្យាយាមផ្សព្វផ្សាយការចុះឈ្មោះបោះឆ្នោតនៅក្រោយនៅពេលដែលយើងបានទទួលដំណឹង។ ម្យ៉ាងទៀតសូមបងប្អូនកុំបារម្ភទៅចុះឈ្មោះបោះឆ្នោត ត្រូវមានឯកសារអីច្រើនគឺអត់មានទេ គឺមានដូចខ្ញុំបានលើកឡើងខាងដើម»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក សេង ឫទ្ធី មានប្រសាសន៍ថា យុវជនប្រមាណ ១០ខេត្តដែលលោកចុះអប់រំកន្លងមក ភាគច្រើនពួកគេមានការចាប់អារម្មណ៍ខ្លាំងនឹងការចុះឈ្មោះបោះឆ្នោតបែបថ្មីនេះ ពីព្រោះជាការចុះឈ្មោះតាមបែបទំនើបតាមប្រពន្ធកុំព្យូទ័រ៖ «យើងចង់ឲ្យក្រុមអ្នកចុះឈ្មោះបោះឆ្នោតធ្វើយ៉ាងណាគោរពទៅតាមនីតិវិធីបញ្ជា ជាពិសេសគឺតម្រូវឲ្យយុវជនទៅចុះឈ្មោះដោយផ្ទាល់ ហើយជៀសវាងការផ្ញើឯកសារតាមអាជ្ញាធរ ឬបងប្អូន ដែលពីមុនមកយើងឃើញមានបញ្ហានេះកើតឡើងដែរ»។
ទោះយ៉ាងនេះក្ដី លោក សេង ឫទ្ធី ព្រួយបារម្ភខ្លាចក្រែងយុវជនមួយចំនួនមិនអាចទៅឈ្មោះបោះឆ្នោតបាននៅពេលខាងមុន ដោយសារពួកគេគ្មានអត្តសញ្ញាណប័ណ្ណ និងលិខិតបញ្ជាក់អត្តសញ្ញាចុះឈ្មោះបោះឆ្នោតឲ្យបានទាន់ពេលវេលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- មន្ត្រី គ.ជ.ប បដិសេធពាក្យបណ្ដឹងទាក់ទងនឹងអំពើពុករលួយ
- លោក សម រង្ស៊ី ថាការប្រកាសកំណត់ថ្ងៃបោះឆ្នោតនៅពុំទាន់គ្រប់គ្រាន់នៅឡើយទេ
- លោក ហ៊ុន សែន ជំរុញឲ្យអាជ្ញាធរពន្លឿនការធ្វើអត្តសញ្ញាណប័ណ្ណជូនពលរដ្ឋ
- ក្រសួងមហាផ្ទៃធានាថាដំណើរការបោះឆ្នោតនឹងប្រព្រឹត្តទៅដោយសេរីនិងយុត្តិធម៌
- សង្គមស៊ីវិលរៀបចំវេទិកាអប់រំពលរដ្ឋខេត្តកំពង់ចាមពីរបៀបចុះឈ្មោះបោះឆ្នោត
- តំណាងមូលនិធិនឹងប្រមូលព័ត៌មានទាក់ទងការបោះឆ្នោតនៅកម្ពុជាជូនលោក ខូហ្វី អាណាន់
- មន្ត្រីជាន់ខ្ពស់គ.ជ.បរំពឹងថាការចុះបញ្ជីឈ្មោះបោះឆ្នោតអាចទាន់ពេលបោះឆ្នោតឃុំ-សង្កាត់
- តំណាងមូលនិធិខូហ្វីអាណាន់ចែករំលែកបទពិសោធន៍ការបោះឆ្នោតដល់គ.ជ.ប
- រដ្ឋាភិបាលសម្រេចកំណត់ថ្ងៃបោះឆ្នោតឃុំ-សង្កាត់នៅថ្ងៃទី៤ មិថុនា ២០១៧
- គ.ជ.ប ឆ្លើយតបនឹងក្ដីបារម្ភរបស់លោក សម រង្ស៊ី ចំពោះទំនុកចិត្តលើ គ.ជ.ប