ដោយ សាន សែល
2016-06-21
RFA
សកម្មភាពរបស់សមត្ថកិច្ចឃាត់ខ្លួនសកម្មជនដីធ្លីនៃសហគមន៍ថ្មគោល ក្នុងខណ្ឌពោធិសែនជ័យ នៅថ្ងៃទី២០ ខែមិថុនា ឆ្នាំ២០១៦។ RFA/Phann Yasy
អាជ្ញាធរបានដោះលែងសកម្មជនដីធ្លីចំនួន ៤នាក់វិញហើយ កាលពីរាត្រីថ្ងៃទី២០ ខែមិថុនា។
លោកស្រី ច្រាយ នីម សកម្មជនដែលត្រូវបានគេដោះលែងម្នាក់ ប្រាប់ថា មុននឹងដោះលែង អាជ្ញាធរបានឲ្យសកម្មជនទាំង ៤រូប ផ្ដិតមេដៃសន្យាជាថ្នូរនឹងការដោះលែង។ លក្ខខណ្ឌទាំងនោះរួមមាន មុនពេលធ្វើការប្រមូលតវ៉ា ត្រូវសុំច្បាប់អនុញ្ញាតពីអាជ្ញាធរជាមុន មិនត្រូវស្រែកជេរអាជ្ញាធរពេលតវ៉ា និងមិនត្រូវចេញតវ៉ាជំនួសអ្នកដទៃ។
អ្នកដែលត្រូវគេចាប់ខ្លួនទាំង៤ យល់ព្រមផ្ដិតមេដៃទទួលយកខសន្យាទាំងបង្ខំ។ អាជ្ញាធរគំរាមថា ប្រសិនបើសកម្មជនដីធ្លី នៅតែបន្តចូលរួមយុទ្ធការថ្ងៃច័ន្ទពណ៌ខ្មៅទៀត អាជ្ញាធរនឹងមិនដោះស្រាយជម្លោះដីធ្លីឲ្យនោះទេ។
លោកស្រី ច្រាយ នីម ហៅទង្វើអាជ្ញាធរនេះថា ជាការរឹតត្បិតសិទ្ធិរបស់ពលរដ្ឋក្នុងការសម្ដែងមតិដែលការពារដោយរដ្ឋធម្មនុញ្ញ និងមានចែងក្នុងច្បាប់ស្ដីពី ការធ្វើបាតុកម្ម ដោយសន្ដិវិធី៖ «គេយកច្បាប់ព្រហ្មទណ្ឌ មាត្រា៥២១ យកមកគំរាមយើង ដែលចេញតវ៉ាលើការងាររបស់តុលការ»។
ទោះបីជាយ៉ាងណា លោកស្រី ច្រាយ នីម រក្សាជំហរនឹងចូលរួមយុទ្ធនាការថ្ងៃច័ន្ទពណ៌ខ្មៅដដែលនៅសប្តាហ៍ក្រោយទៀត។
សកម្មជនដីធ្លី ៤នាក់ មកពីសហគមន៍ថ្មគោល ត្រូវសមត្ថកិច្ចខណ្ឌពោធិ៍សែនជ័យ ចាប់លើកដាក់រថយន្តបញ្ជូនទៅសង្កាត់កាកាប កាលពីព្រឹកថ្ងៃទី២០ មិថុនា។ យុទ្ធនាការថ្ងៃច័ន្ទពណ៌ខ្មៅ ធ្វើឡើងដើម្បីទាមទារឲ្យដោះលែងមន្ត្រីសិទ្ធិមនុស្ស ៤រូប និងមន្ត្រី គ.ជ.ប ១រូប ដែលកំពុងជាប់ឃុំក្នុងពន្ធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ចៅក្រមស៊ើបសួរបញ្ចប់ការសាកសួរមន្ត្រីអាដហុក២រូបនិងបញ្ជូនទៅឃុំខ្លួននៅព្រៃសវិញ
- សកម្មជនដីធ្លី៤នាក់ត្រូវសមត្ថកិច្ចឃាត់ខ្លួនពេលពួកគេទាមទារឲ្យដោះលែងមន្ត្រីសិទ្ធិមនុស្ស
- មន្ត្រីអង្គការសង្គមស៊ីវិលរៀបចំកម្មវិធីអាហារសប្បុរសធម៌រៃអង្គាសថវិកាជួយគ្រួសារអ្នកជាប់ឃុំ៥រូប
- មន្ត្រីអាដហុកដែលរងការចោទប្រកាន់ពីសំណាក់ស្រីមុំមិនសង្ឃឹមទទួលបានយុត្តិធម៌
- លោក នី ចរិយា ស្នើចៅក្រមស៊ើបសួរលើកពេលសួរចម្លើយទៅពេលក្រោយ
- CCHR ចេញសេចក្ដីថ្លែងការណ៍ស្នើឲ្យរដ្ឋាភិបាលដោះលែងអ្នកការពារសិទ្ធិមនុស្ស
- សាលាឧទ្ធរណ៍បដិសេធសំណើសុំនៅក្រៅឃុំរបស់មន្ត្រីអាដហុកនិងមន្ត្រីគ.ជ.ប
- សមត្ថកិច្ចឃាត់ខ្លួនសកម្មជនដីធ្លីម្នាក់ដែលពាក់អាវពណ៌ខ្មៅទាមទារដោះលែងមន្ត្រីសិទ្ធិមនុស្ស
- សហគមន៍ដីធ្លីថានឹងបន្តយុទ្ធនាការថ្ងៃច័ន្ទពណ៌ខ្មៅទាមទារដោះលែងមន្ត្រីគ.ជ.បនិងសង្គមស៊ីវិល
- ខ្មែរ-អាមេរិកាំងធ្វើបាតុកម្មទាមទារឲ្យអាមេរិកដាក់ទណ្ឌកម្មសេដ្ឋកិច្ចមកលើកម្ពុជា