លោក កុល សែម អាយុ៧២ឆ្នាំ សម្រាកព្យាបាលជំងឺនៅមន្ទីរពេទ្យព្រះកុសុមៈ។ រូបថត ហ្វេសប៊ុក
Fri, 5 August 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: កម្រត្រូវបានអ្នកស្នេហាវិស័យសិល្បៈចម្រៀងសម័យដើម រំឭកឡើងថា បទ «មាន់រងាវ» នៅមានទីផ្សារក្នុងស្រទាប់មហាជន តែងលើកមកច្រៀងបន្ទរឆ្លងឆ្លើយ បង្កើតភាពស្និទ្ធស្នាល សប្បាយរីករាយក្នុងកម្មវិធីថា ម្ចាស់បទនេះ មានឈ្មោះអ្វីឡើយ។
ទាំងកម្មវិធីវិទ្យុ និងទូរទស្សន៍ ដែលកម្មវិធីមរតកវប្បធម៌ជាតិក៏មិនដែលបានបញ្ជាក់ឲ្យដឹងផងទេគឺទើបតែត្រូវបានទម្លាយ គ្រាដែលម្ចាស់ស្លាបប៉ាកាមាសលាក់មុខរូបនេះ នៅសល់តែដង្ហើមចុងក្រោយ ដែលគេបញ្ជាក់ថា ម្ចាស់បទ «មាន់រងាវ» ឈ្មោះ កុល សែម។
ក្នុងវ័យជរា៧២ឆ្នាំ ដែលទើបត្រូវបានគេទម្លាយថា ជាម្ចាស់បទ «មាន់រងាវ» តារាចម្រៀងជើងចាស់ កុល សែម ដែលកំពុងទទួលការសង្គ្រោះបន្ទាន់នៅពេទ្យលោកសង្ឃ ជាង១សប្ដាហ៍មកហើយ ដោយសារជំងឺលើសឈាម និងតម្រងនោមធ្ងន់ធ្ងរនោះ ក៏ត្រូវបានកូនស្រីរបស់លោកតា ឈ្មោះ សួន សេដ្ឋា ទម្លាយប្រាប់ឲ្យដឹងផងដែរថា៖ «ឪពុកខ្ញុំក៏ធ្លាប់ជាដៃគូចម្រៀង ជាមួយអ្នកស្រី រស់ សេរីសុទ្ធា ក្នុងបទ «មាន់រងាវ ឬស្រីខ្មៅមាសបង» បទ «សត្វចាបយំចេប» និងបទ «កុកហើរតែឯងខ្លែងហើរទាំងគូ» ជាដើម»។
កាលបើមានជីវិត ទាំងអតីតតារាចម្រៀងជំនាន់លោក ស៊ីន ស៊ីសាមុត រូបនេះមិនត្រូវបានបង្ហាញសមាសភាព ដែលលោកទើបតែនឹងត្រូវបានគេបង្ហាញអត្តសញ្ញាណ និងស្នាដៃ នៅគ្រាដែលដង្ហើមធ្លាក់មកនៅកម្រិតចុងក្រោយនេះ ។
កត្តានេះក៏ត្រូវបានកូនស្រីអតីតតារាចម្រៀងជើងចាស់រូបនេះ ឲ្យដឹងថា៖ «ឪពុកខ្ញុំគាត់មិនដែលចង់ចេញមុខចេញមាត់អីទេ ហើយមិនដែលចង់ឲ្យគេដឹងថាគាត់នៅរស់ទេ តាំងពីដើមមក តែដោយសារកូនៗអស់លទ្ធភាពព្យាបាល ក៏សម្រេចចិត្តបង្ហាញសមាសភាពរបស់ឪពុកថា «គាត់ កុល សែម ជាម្ចាស់បទ «មាន់រងាវ» ក៏ផ្សាយក្រែងមានអ្នកជួយគាត់បានខ្លះ»។
មើលឃើញពីការអំពាវនាវរកសប្បុរសធម៌ ជួយជ្រោមជ្រែងជាជំនួយប្រាក់ព្យាបាលបន្តនោះ តារាចម្រៀងលោក សន វិជ្ជបុត្រ ដែលជាប់ងារតារាមនុស្សធម៌វ័យក្មេង កាលពីរសៀលថ្ងៃទី ៣ ខែសីហា ក៏បាននាំអំណោយមនុស្សធម៌ ដែលលោកទទួលបានពីសប្បុរសជនទាំងក្នុងនិងក្រៅប្រទេស យកទៅប្រគល់ជូនម្ចាស់បទ «មាន់រងាវ» ដែលកំពុងសម្រាកព្យាបាលជំងឺនៅមន្ទីរពេទ្យព្រះកុសុមៈ (ពេទ្យលោកសង្ឃ)។
នៅចំពោះមុខតារាចម្រៀង សន វិជ្ជបុត្រ កូនស្រី របស់ អតីតតារាចម្រៀងរូបនេះ ក៏បានរៀបរាប់បន្ថែមថា៖ «ឪពុករបស់ខ្ញុំមានវ័យ៧២ឆ្នាំ និងបានធ្លាក់ខ្លួនឈឺរ៉ាំរ៉ៃជាយូរមកហើយ ដោយទទួលការថែទាំពីកូន។ ដោយជំងឺរបស់គាត់វិវត្តទៅរកភាពធ្ងន់ធ្ងរខ្លាំង ក៏នាំគាត់មកបន្ទប់សង្គ្រោះបន្ទាន់ នៅពេទ្យលោកសង្ឃបានមួយសប្តាហ៍ហើយ»។
ជាមួយគ្នានោះ តារាចម្រៀងមានស្រុកកំណើតនេនទុំ បាភ្នំ ឈើកាច់ ខេត្តព្រៃវែង រូបនេះ ក៏បានឲ្យដឹងថា៖ «អារម្មណ៍ខ្ញុំក៏ជាអ្នកសិល្បៈ ដ្បិតថាជាអ្នកសិល្បៈជំនាន់ក្រោយ ប៉ុន្តែពេលឮមានអ្នកសិល្បៈ ពិសេសអ្នកសិល្បៈសម័យដើម មានជំងឺធ្លាក់ខ្លួនឈឺចាស់ជរា និងខ្វះថវិកាព្យាបាលនោះ អារម្មណ៍ក៏នៅមិនស្ងប់ដែរ»។
តារាចម្រៀងដែលល្បីការងារមនុស្សធម៌ជាងការងារសិល្បៈរូបនេះ បានឲ្យដឹងបន្ថែមទៀតថា៖ «ខ្ញុំមិនមែនជាអ្នកមានទេ គឺកើតជាកូនអ្នកក្រ ធ្លាប់ធ្វើស្រែ ជីកក្តាមនៅស្រុកកំណើត តែពេលនេះមានជីវភាពសមរម្យច្រឡំគេច្រឡំឯងនៅភ្នំពេញ ហើយក៏មានសប្បុរសជនជួយផង ក៏បានរួមគ្នានាំជាអំណោយមកធ្វើការឧបត្ថម្ភលោក កុល សែម ជាទឹកចិត្តចែករំលែក»៕