ដោយ លោក ឃុត សុគន្ធ | ថ្ងៃអង្គារ ទី១០ ខែមករា ឆ្នាំ២០១៧ | ម៉ោង 4:22 PM
http://vodhotnews.com
មន្រ្តីនគរបាលច្រកព្រំដែននៅក្រុងប៉ោយប៉ែត ឈ្មោះ ពិសិដ្ឋ (រូបភាពពីហ្វេសប៊ុក)
សាក្សីដែលបានចូលបំភ្លឺនៅតុលាការ ខេត្ដបន្ទាយមានជ័យ នៅព្រឹកថ្ងៃអង្គារនេះ បានឲ្យដឹងថា មន្ដ្រីគណបក្សសង្គ្រោះជាតិ លោក ឌិន ពុទ្ធី មិនបានបើកឡានបុក ដូចអ្វីដែលមន្រ្តីនគរបាលឈ្មោះ ឈាន ពិសិដ្ឋ ចោទប្រកាន់នោះទេ។
តុលាការខេត្ដបន្ទាយមានជ័យបានឃុំខ្លួនមន្ដ្រីបក្សសង្រ្គោះជាតិ លោក ឌិន ពុទ្ធី ដោយចោទពីបទហិង្សាដោយចេតនានិងមានស្ថានទំងន់ទោស បន្ទាប់ពីមន្ដ្រីប៉ូលិសព្រំដែនលោក ឈាន ពិសិដ្ឋ ដួលមុខឡានមន្ដ្រីបក្សប្រឆាំងរូបនោះកាលពីថ្ងៃទី២៣ ខែធ្នូ ឆ្នាំ២០១៦កន្លងមក។
សាក្សីមួយរូបក្នុងចំណោមបីនាក់ លោក អ៊ុន ជីវ័ន ប្រាប់វីអូឌី ក្រោយពីបំភ្លឺនៅតុលាការថាលោកបានប្រាប់តុលាការថា លោក ឌិន ពុទ្ធី មិនបានបើករថយន្ដបុកមន្ដ្រីនគរបាលច្រកទ្វារអន្ដរជាតិប៉ោយប៉ែតលោក ឈាន ពិសិដ្ឋ ដូចការចោទប្រកាន់នោះទេ។ លោកបញ្ជាក់ថា មន្ដ្រីនគរបាលរូបនោះបានធ្វើជាដួលនៅមុខឡានមន្ដ្រីបក្សប្រឆំាង ដើម្បីទំលាក់កំហុសដាក់លោក ឌិន ពុទ្ធី។
អភិបាលខេត្តបន្ទាយមានជ័យ លោក សួន បរវ បានថ្លែងនៅក្នុងកិច្ចប្រជុំមួយកាលពីល្ងាចថ្ងៃទី៩ខែមករាថា លោកចង់ឲ្យមានការសម្របសម្រួលគ្នារវាង លោក ឈាន ពិសិដ្ឋ ជាមួយលោក ឌិន ពុទ្ធី ដើម្បីបញ្ចប់បញ្ហា។ ជាមួយគ្នានោះ លោកបន្តថា លោកនឹងស្នើទៅក្រសួងមហាផ្ទៃឲ្យផ្ទេរការងារលោក ឈាន ពិសិដ្ឋ ចេញពីក្រុងប៉ោយប៉ែត ដើម្បីឲ្យប្រជាពលរដ្ឋស្ងប់អារម្មណ៍។
នៅក្នុងវីដេអូខ្លីប របស់ព្រះតេជគុណ លួន សាវ៉ាត បានបង្ហាញថា សាក្សីបីរូប គឺលោក ញ៉ែត នាង លោក ហ៊ុន សេងអឿន និងលោក អ៊ុន ជីវ័ន្ដ ឲ្យដឹងស្រដៀងគ្នាមុនចូលបំភ្លឺ នៅតុលាការថា លោក ឈាន ពិសិដ្ឋ បានដើរចូលចូលខាងមុខរថយន្ត រួចផ្ដួលខ្លួនឯង ខណៈដែលរថយន្ដនៅមួយកន្លែង។ ពួកគេបន្ដថា នៅពេលដួលរួចហើយ មន្ដ្រីនគរបាលរូបនោះនៅតែក្ដាប់កូនសោរជាប់នឹងដៃនិងមានទឹកមុខធម្មតា បន្ទាប់មកសមត្ថកិច្ចបានដឹកទៅកន្លែងផ្សេង។ ពួកគេរំពឹងថា តុលាការខេត្ដបន្ទាយមានជ័យនឹងផ្ដល់យុត្ដិធម៌ដល់លោក ឌិន ពុទ្ធី។
VOD មិនអាចទាក់ទងចៅក្រមស៊ើបសួរនៃតុលាការខេត្ដបន្ទាយមានជ័យ លោក មុយ សុភក្ដិ បាននៅឡើយទេ។
ទោះជាយ៉ាងណា សេចក្ដីថ្លែងការណ៍របស់សាលាដំបូងខេត្ដបន្ទាយមានជ័យ កាលពីពេលកន្លងទៅ បានអះអាងថា មន្ដ្រីប៉ូលិសម្នាក់ដែលដួលនៅមុខឡានមន្ដ្រីបក្សសង្គ្រោះជាតិពិតជាជនរងគ្រោះដោយសាររថយន្ដបើកបុក។
លោក ឌិន ពុទ្ធី ត្រូវបានតុលាការឃុំខ្លួនជិតមួយខែហើយ បើទោះជាមានការតវ៉ាពីសំណាក់ពលរដ្ឋរាប់រយនាក់ និងក្រុមគ្រួសារសុំដោះលែងលោករូបក៏ដោយ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្ដបន្ទាយមានជ័យលោក ស៊ុំ ចាន់គា ដែលឃ្លាំមើលករណីនេះ បានសាទរចំពោះតុលាការដែលឲ្យសាក្សីដោះបន្ទុកចូលបំភ្លឺ ប៉ុន្ដែលោកព្រួយបារម្ភពីសុវត្ថិភាពសាក្សីទាំងនោះ ខណៈមិនទាន់មានច្បាប់ការពារសាក្សីនៅឡើយ។ លោកបន្ដថា សាក្សីមួយរូបក្នុងចំណោមបីនាក់ជាអ្នកថតវីដេអូ និង២នាក់ទៀតជាអ្នកឃើញហេតុការណ៍ផ្ទាល់ ដែលបញ្ជាក់ថា មន្ដ្រីនគរបាលរូបនោះដួលមុខឡានមន្ដ្រីបក្សប្រឆាំងដោយខ្លួនឯង។ លោកស្នើឲ្យតុលាការដោះលែងមន្ដ្រីបក្សប្រឆាំងរូបនោះដោយគ្មានលក្ខខណ្ឌ៕
ដោយលោក ឃុត សុគន្ធ និង បូ សាវី
អ្នកបើកឡានប្រាកដជាមានទោស៖
1- លួចបង្រត់មនុស្សឲ្យចេញពី police ពេលដែលកំពុងមានបញ្ហាជាមួយ police.
2- គា់ត់មិនគោរពបញ្ជរពី police នៅលើផ្នល់ដោយខំព្យាយាមបើកឡានរត់គេចចេញ
អង្គហេតុនៃការចោទប្រកាន់មិនមែនរឿងពង្រត់មនុស្សនិងមិនគោរពប៉ូលីសទេ។ កុំមានបំណងតាមផ្តន្ទាឈ្នានីសមនុស្ស ត្រឹមត្រូវដែលជួយរកយុត្តិធម៏សម្រាប់សង្គម។ ត្រូវដឹងនិងហ៊ានទទួលស្គាល់ថា សង្គមយើងសព្វថ្ងៃ បើគ្មានសង្គមស៊ីវិល គ្មានអង្គការសិទ្ធិមនុស្សជួយដោះស្រាយរកយុត្តិធម៏ដល់ជនក្រីក្រដែលរងការរំលោភបំពានសិទ្ធិរស់នៅនិងប្រកបមុខរបរ ដោយសុច្ចរិតទេ មិនដឹងថាស្រុកខ្មែរត្រូវបានជិះសេះលែងដៃដោយអាជ្ញាធរ សមត្ថកិច្ចយ៉ាងណាទេ។ នេះគ្រាន់ហើយដែលនៅមានអង្គការសង្គមស៊ីវិល និងអង្គការសិទ្ធិមនុស្ស នៅចាំជួយពលរដ្ឋរងគ្រោះ បើគ្មានអង្គការទាំងនោះទេ ស្រុកខ្មែរដែលក្លាយជាឋានសួគាររបស់សមត្ថកិច្ចខិលខូចនិងអ្នកធំមានអំណាចទំនើងច្បាប់ធ្វើអ្វីៗស្រេចតែចិត្តយ៉ាងណានោះទេ។ យើងគាំទ្រតែមនុស្សប្រព្រឹត្តល្អ ប៉ុន្តែគេត្រូវដឹងថាសព្វថ្ងៃនេះមន្ត្រីភាគច្រើនសុទ្ធតែជារបស់បក្សធ្វើការបំរើនយោបាយ ដូច្នេះគ្មានទេ អព្យាក្រឹតនៃតួនាទីចំពោះផ្លូវច្បាប់។