លោក នី សុខា (ឆ្វេង) និង លោក យី សុខសាន្ត (ស្តាំ) ពេលត្រូវនាំឡើងសវនាការ កាលពីខែមុន។ ហុង មិនា
Mon, 6 March 2017
Ananth Baliga
ភ្នំពេញប៉ុស្តិ៍
ភ្នំពេញៈ កាលពីម្សិលមិញក្រុមអង្គការសង្គមស៊ីវិលចំនួន ៧៨ បានចេញសេក្តីថ្លែងការណ៍រួមមួយដោយបានធ្វើការថ្កោលទោសចំពោះការបដិសេធមិនដោះលែងមន្ត្រីសិទ្ធិមនុស្សចំនួន ៥ រូបឲ្យនៅក្រៅឃុំនាពេលថ្មីៗនេះ និងការផ្តន្ទាទោសដ៏ធ្ងន់ធ្ងរលើសកម្មជនដីធ្លីម្នាក់គឺអ្នកស្រី ទេព វន្នី រួមនឹងការកើនឡើងនៃការគំរាមកំហែងដល់អង្គការសង្គមស៊ីវិលដោយពួកគេហៅថាជា «យុទ្ធសាស្ត្ររៀបចំទុកជាមុន» ដោយអាជ្ញាធរដើម្បីបង្ក្រាបក្រុមអ្នកជំទាស់មុនការបោះឆ្នោតឃុំ សង្កាត់ ដែលនឹងចូលមកដល់នាពេលខាងមុខ។
សេចក្ដីថ្លែងការណ៍រួមដែលចុះហត្ថលេខាដោយអង្គការសង្គមស៊ីវិលក្នុងស្រុក និងអន្តរជាតិចំនួន ៧៨ បានបង្ហាញពីការព្រួយបារម្ភរបស់ពួកគេចំពោះការកើនឡើងនៃការបង្ក្រាបរបស់រដ្ឋាភិបាលលើសេរីភាពជាមូលដ្ឋានយ៉ាងធ្ងន់ធ្ងរនឹងការវាយប្រហារមកលើបុគ្គលដែលធ្វើការលើបញ្ហាសិទ្ធិមនុស្សថាជារឿងដែល «មិនត្រឹមត្រូវតាមច្បាប់ហើយត្រូវតែបញ្ឈប់»។
សេចក្តីថ្លែងការណ៍នេះចង់ចង្អុលទៅដល់ការបដិសេធកាលពីថ្ងៃទី ២៣ ខែកុម្ភៈដែលតុលាការមិនអនុញ្ញាតឲ្យមន្ត្រីអង្គការសិទ្ធិមនុស្សអាដហុកចំនួនបួនរូបគឺលោកស្រី លឹម មុន្នី លោក នី សុខា លោក យី សុខសាន្ត និងលោក ណៃ វង់ដា នៅក្រៅឃុំហើយរហូតមកដល់ពេលនេះពួកគេត្រូវបានជាប់ឃុំចំនួន ៣១២ ថ្ងៃមកហើយដោយបានអំពាវនាវឱ្យមានការដោះលែងពួកគេជាបន្ទាន់ បន្ទាប់ពីក្រុមការងាររបស់អង្គការសហប្រជាជាតិកាលពីខែវិច្ឆិកាកន្លងទៅបានចាត់ទុកការចាប់ដាក់ពន្ធនាគារនេះថាជាការធ្វើឡើងតាមតែអំពើចិត្ត។
សេចក្តីថ្លែងការណ៍នេះក៏បានលើកឡើងផងដែរពីករណីរបស់អ្នកស្រី ទេព វន្នី ដែលជាសកម្មជនដីធ្លីបឹងកក់ដែលត្រូវតុលាការកាត់ទោសឲ្យជាប់ពន្ធនាគារចំនួន ២ ឆ្នាំកន្លះពីបទប្រើអំពើហិង្សាដែលករណីនេះវាបានបង្ហាញពីបរិយាកាសសិទ្ធិមនុស្សនៅកម្ពុជាកាន់តែធ្ងន់ធ្ងរបន្ថែមទៀត។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជាដែលជាហត្ថលេខីមួយរូបនៅក្នុងសេចក្តីថ្លែងការណ៍រួមនេះដែរបាននិយាយកាលពីម្សិលមិញថា៖ «ខណៈដែលឆ្នាំ ២០១៦ កន្លងទៅត្រូវបានគេមើលឃើញថាអ្នកការពារសិទ្ធិមនុស្សគឺជាប្រធានបទមួយដែលត្រូវបានគេចោទប្រកាន់តាមផ្លូវច្បាប់ដែលមិនត្រឹមត្រូវហើយមួយចំនួនត្រូវជាប់ពន្ធនាគារដែលស្ថានភាពនេះវាបានក្លាយជារឿងមួយដ៏គួរឱ្យកត់សម្គាល់ហើយវាកាន់តែអាក្រក់នៅក្នុងរយៈពេលប៉ុន្មានសប្តាហ៍ចុងក្រោយនេះ»៕ NS
Contact author: Ananth Baliga