ដោយ ខែ សុណង
2017-03-18
RFA

ស្ដាប់ ឬ ទាញ​យក​សំឡេង

កម្មករ​រោងចក្រ​កាត់ដេរ ជុន ចៅ [CHUN CHAO (Cambodia) Garment Co., Ltd.] នៅ​សង្កាត់​ចោមចៅ ខណ្ឌ​ពោធិ៍សែនជ័យ សម្រាក​ព្យាបាល​នៅ​គ្លីនិក​ឯកជន​មួយ​ក្រោយ​ពី​ដួល​សន្លប់​កាល​ពី​ព្រឹក​ថ្ងៃ​ទី​៤ មីនា ឆ្នាំ​២០១៦។ RFA/Sorn Chanratha

កម្មករ​ចំនួន​ជាង ៣០​នាក់ នៅ​រោងចក្រ ធាន ស៊ុង (Tien Sung) ស្ថិត​នៅ​ភូមិ​ព្រៃព្រីង​ខាងត្បូង សង្កាត់​ចោមចៅ ខណ្ឌ​ពោធិ៍សែនជ័យ រាជធានី​ភ្នំពេញ បាន​ដួល​សន្លប់ និង​ទន់​ដៃជើង ចំនួន ២​ថ្ងៃ​ជាប់​គ្នា ដោយសារ​ហេតុការណ៍​ឆេះ​បំពង់​បូម​ខ្យល់​នៃ​ម៉ាស៊ីន​ភ្លើង។ យ៉ាង​ណា​កម្មករ​ដែល​រង​គ្រោះ​បាន​វិល​ត្រឡប់​ទៅ​ផ្ទះ​វិញ​ហើយ បន្ទាប់​ពី​បាន​​នាំ​ទៅ​សម្រាក​ព្យាបាល​នៅ​មន្ទីរពេទ្យ ប៉ុន្តែ​ស្ថិត​នៅ​ក្រោម​ការ​តាមដាន​ឃ្លាំមើល​ករណី​អ្នក​មាន​បញ្ហា​នៅ​មាន​ស្ថានភាព​មិន​ទាន់​ស្រួល។

កម្មករ​ជាង ១០​នាក់​បន្ថែម​ទៀត​បាន​ទន់​ដៃជើង និង​មាន​អាការៈ​មិន​ស្រួល​ខ្លួន​ត្រូវ​បញ្ជូន​ទៅ​មន្ទីរពេទ្យ ដោយសារ​ឥទ្ធិពល​នៃ​ក្លិន​មិន​ល្អ​ក្នុង​រោងចក្រ ដែល​បាន​ឆេះ​បំពង់​បូម​ខ្យល់​នៃ​ម៉ាស៊ីន​ភ្លើង កាល​ពី​ថ្ងៃ​ទី​១៧ មីនា។

អ្នក​នាំ​ពាក្យ​បេឡា​ជាតិ​របប​សន្តិសុខ​សង្គម នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ លោក ជាវ ប៊ុនរិទ្ធ មាន​ប្រសាសន៍​ថា កម្មករ​ដែល​ចូល​ធ្វើការ​ថ្ងៃ​ទី​១៨ ខែ​មីនា មាន​សភាព​ទន់​ដៃ​ជើង មាន​អារម្មណ៍​ភិតភ័យ និង​តក់ស្លុត បន្ថែម​នោះ គឺ​ដោយសារ​ធុំ​ក្លិន​ឆ្ងៀម​និង​ឈឺ​ក្បាល​សល់​ពី​ចំហាយ​កាល​ពី​ព្រឹក​ថ្ងៃ​ទី​១៧ ខែ​មីនា ដោយ​ហេតុការណ៍​ឆេះ​បំពង់​បូម​ខ្យល់​នៃ​ម៉ាស៊ីន​ភ្លើង ធ្វើ​ឲ្យ​ហុយ​ផ្សែង​ចូល​ទៅ​ក្នុង​អាគារ​ផលិតកម្ម។

លោក​ថា កាល​ពី​ព្រឹក​ថ្ងៃ​១៧ ខែ​មីនា មាន​កម្មករ​ចំនួន ២០​នាក់​បាន​ដួល​សន្លប់​ដោយ​គិត​ថា រោងចក្រ​ឆេះ ទើប​ចុច​កណ្ដឹង​ប្រកាស​អាសន្ន​ដែល​ធ្វើ​ឲ្យ​កម្មករ​ផ្អើល។ លោក​បាន​បន្ទោស​ថា បញ្ហា​នេះ​មក​ពី​រដ្ឋបាល​ខ្វះ​ការ​យល់​ដឹង​ពី​វិធានការ​ផ្សេងៗ៖ «បើ​យើង​ពិនិត្យ​ជាក់​ស្ដែង​គឺ​ពាក់ព័ន្ធ​ទៅ​នឹង​បំពង់​ភ្លើង​វា​ធ្លាយ ហើយ​ផ្សែង​បាន​ធ្លាយ​ចូល​ក្នុង​រោងចក្រ​ក៏​បាន​ណែនាំ​ឲ្យ​ខាង​រោងចក្រ​បើក​កង្ហារ​បឺត​យក​ក្លិន​ចេញ ព្រោះ​ផ្សែង​ហ្នឹង ធុំ​ឆ្ងៀម​វា​ធ្វើ​ឲ្យ​កម្មករ​ឈឺ​ក្បាល វិលមុខ ទន់​ដៃ​ទន់​ជើង​ទៅ»។

លោក ជាវ ប៊ុនរិទ្ធ បន្ត​ថា ក្រុម​ការងារ​គណៈកម្មការ​ទប់ស្កាត់​ករណី​ដួល​សន្លប់​បាន​ចុះ​ទៅ​ពិនិត្យ​លក្ខណៈ​បច្ចេកទេស​មើល​បរិយាកាស​ជុំវិញ​រោងចក្រ អាគារ​ពាក់ព័ន្ធ កម្ដៅ សម្ពាធ​ខ្យល់ សំណើម ប្រព័ន្ធ​ខ្យល់​ចេញ​ចូល​តម្រូវ​ឲ្យ​លាង​សម្អាត ពិនិត្យ​មើល​បន្ទប់​ទឹក បង្គន់​ឡូ តម្រូវ​ឲ្យ​រោងចក្រ​កែ​លម្អ​រួច​ហើយ នៅ​ថ្ងៃ​ទី​១៨ ខែ​មីនា។ ក្រុម​ការងារ​បច្ចេកទេស​បាន​អប់រំ​ពន្យល់​ណែនាំ​ដល់​កម្មករ និង​បណ្ដុះបណ្ដាល​រដ្ឋបាល​រោងចក្រ​ឲ្យ​យល់​ដឹង​ពី​អំពី​វិធី​សង្គ្រោះ។

រោងចក្រ ធាន ស៊ុង ស្ថិត​នៅ​ភូមិ​ព្រៃ​ព្រីង​ខាងត្បូង សង្កាត់​ចោមចៅ ខណ្ឌ​ពោធិ៍សែនជ័យ រាជធានី​ភ្នំពេញ មាន​កម្មករ​ជាង ១​ពាន់​នាក់។

ទោះ​យ៉ាង​ណា​កម្មករ​ដែល​រងគ្រោះ​ដួល​សន្លប់ បាន​វិល​ត្រឡប់​ទៅ​ផ្ទះ​វិញ​ហើយ ប៉ុន្តែ​ស្ថិត​នៅ​ក្រោម​ការ​តាមដាន​ឃ្លាំមើល​ករណី​អ្នក​មាន​បញ្ហា​នៅ​មាន​ស្ថានភាព​មិន​ទាន់​ស្រួល​ខ្លួន​នោះ​ខាង​រោងចក្រ​បន្ត​ឲ្យ​ពួកគេ​ឈប់​សម្រាក៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទ​ដែល​ទាក់ទង

• ស្ថាប័ន​ពាក់ព័ន្ធ​នឹង​វិស័យ​ការងារ​ពិភាក្សា​គ្នា​អំពី​ការ​ធ្វើ​ឲ្យ​ប្រសើរ​ឡើង​ប្រព័ន្ធ​ដោះស្រាយ​វិវាទ
  

• សមាគម​រោងចក្រ​ចង់​ពិភាក្សា​ជាមួយ​ក្រសួង​ពី​ផល​លំបាក​ទាក់ទង​នឹង​ការ​បើក​ប្រាក់​ខែ​កម្មករ
  

• កម្មករ​រោងចក្រ​ក្បាលកោះ​បន្ត​រង់ចាំ​ដំណោះស្រាយ​មួយ​សប្ដាហ៍​ទៀត​ពី​សាលា​រាជធានី​ភ្នំពេញ
  

• កម្មករ​រោងចក្រ​ក្បាលកោះ​ប៉ះ​ទង្គិច​គ្នា​មួយ​ប្រាវ​រឿង​លក់​ឡាយឡុង​នៅ​ក្នុង​រោងចក្រ
  

• កម្មករ​រោងចក្រ​ជុង​ហ្វៃ​តវ៉ា​មុខ​តុលាការ​ក្រុង​ភ្នំពេញ​ទាមទារ​ឲ្យ​ថៅកែ​ទូទាត់​ប្រាក់​ឈ្នួល
  

• ប្រធាន​សហជីព​ថា​កិច្ច​ប្រជុំ​ជាមួយ​ក្រុមហ៊ុន​កាស៊ីណូ​នៅ​ប៉ោយប៉ែត​មាន​សញ្ញា​វិជ្ជមាន​ច្រើន
  

• កម្មករ​រោងចក្រ​ក្បាលកោះ​តវ៉ា​បិទ​ផ្លូវ​​ជាតិ​លេខ​១​ទាមទារ​ប្រាក់​ឈ្នួល​ខែ​ធ្នូ
  

• មន្ត្រី​ទូត​ខ្មែរ​នៅ​ថៃ​ថា​កំពុង​អន្តរាគមន៍​លើ​ករណី​ជនជាតិ​ថៃ​បាញ់​សម្លាប់​ពលករ​ខ្មែរ​២​នាក់
  

• កម្មករ​រោងចក្រ​ក្បាលកោះ​តវ៉ា​ទាមទារ​ប្រាក់​ឈ្នួល​សម្រាប់​ខែ​ធ្នូ
  

• ប្រធាន​សហជីព​ដែល​ថៅកែ​កាស៊ីណូ​នៅ​ប៉ោយប៉ែត​បញ្ឈប់​ពី​ការងារ​ស្វែង​រក​អន្តរាគមន៍