ស្លាកសញ្ញារបស់គណបក្សសង្គ្រោះជាតិ (ស្តាំ) និងគណបក្សប្រជាជនកម្ពុជា (ឆ្វេង)។
គណបក្សប្រជាជនកម្ពុជាស្វាគមន៍ ចំពោះគម្រោងរបស់គណបក្សសង្រ្គោះជាតិ ដែលមិនដាក់ពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្រ្ត» ក្នុងគោលនយោបាយ សម្រាប់ការឃោសនាបោះឆ្នោតឃុំសង្កាត់នៅខែមិថុនាខាងមុខ។ ជាការស្វាគមន៍បន្ទាប់ពីគណបក្សកាន់អំណាចបានសម្តែងការមិនពេញចិត្ត និងមានគម្រោងប្តឹងគណបក្សប្រឆាំងជុំវិញការប្រើប្រាស់ពាក្យស្លោកនេះ។
លោកសុខ ឥសានអ្នកនាំពាក្យគណបក្សប្រជាជនកម្ពុជា បានប្រាប់វិទ្យុបារាំងអន្តរជាតិនៅថ្ងៃទី១៨ ខែមីនា ថាគណបក្សកាន់អំណាចស្វាគមន៍ចំពោះការដកពាក្យស្លោកនេះ។ លោកបញ្ជាក់ថា ប្រសិនបើគណបក្សប្រឆាំងមានចេតនាដកខ្លឹមសារពាក្យស្លោកនេះចេញគឺជាការល្អ ហើយលោកក៏សូមឲ្យគណបក្សនេះអនុវត្តជាក់ស្តែង ពោលគឺដកពាក្យស្លោកនេះចេញពីគោលនយោបាយ៥ចំណុច ដែលសមាជវិសាមញ្ញរបស់គណបក្សប្រឆាំងបានដាក់នាពេលកន្លងមក។
អ្នកនាំពាក្យគណបក្សកាន់អំណាចរូបនេះថា នៅពេលដែលគណបក្សប្រឆាំងបានសម្រេចដកជាផ្លូវការហើយ ប៉ុន្តែបើសកម្មជន ឬអ្នកគាំទ្រគណបក្សប្រឆាំងនៅតែប្រើពាក្យនេះទៀត នោះគឺជាការទទួលខុសត្រូវរបស់បុគ្គល ដែលជាអ្នកប្រព្រឹត្តិ។
លោកសុន ឆ័យ មន្ត្រីជាន់ខ្ពស់គណបក្សសង្រ្គោះជាតិ កាលពីថ្ងៃទី១៧ ខែមីនា ក្រោយពេលទៅជួបសួរសុខទុក្ខ សកម្មជន និងមន្ត្រីជាន់ខ្ពស់គណបក្សប្រឆាំង ដែលកំពុងជាប់ឃុំនៅពន្ធនាគារព្រៃស បានប្រាប់ឲ្យដឹងថា គណបក្សនឹងរៀបចំគោលនយោបាយ៥ចំណុចសម្រាប់ចែកចាយទៅប្រជាពលរដ្ឋ ដោយមិនមានពាក្យស្លោកខាងលើនេះទេ។ ប៉ុន្តែលោកបានបញ្ជាក់ថាពាក្យស្លោកមិនមែនជាពាក្យផ្លូវការ ដែលធ្វើឲ្យមានការពិបាកក្នុងការដោះស្រាយនោះទេ។ លោកថាបើតុលាការ ឬស្ថាប័នមានសមត្ថកិច្ច យល់ថាពាក្យស្លោក «ដូរមេឃុំបំរើបក្ស ដាក់មេឃុំបំរើរាស្ត្រ» ធ្វើឲ្យប៉ះពាល់ នោះគណបក្សប្រឆាំងនឹងសម្រេចទៅតាមស្ថាប័នទាំងនោះ។
លោកសុន ឆ័យមិនអាចទាក់ទងសុំការភ្លឺបន្ថែមបានទេនៅថ្ងៃទី១៨ ខែមីនានេះ ប៉ុន្តែលោកអេង ឆៃអ៊ាង អនុប្រធានគណបក្សសង្រ្គោះជាតិបានបញ្ជាក់ថាបច្ចុប្បន្ននេះ គណបក្សផ្សព្វផ្សាយ និងបង្រៀនតែគោលនយោបាយអាទិភាពសម្រាប់សកម្មជនរបស់ខ្លួនតែប៉ុណ្ណោះ មិនបានផ្សព្វផ្សាយ ឬបង្រៀនពាក្យស្លោកខាងលើនេះទេ។
សូមជម្រាបជូនថាពាក្យស្លោក «ដូរមេឃុំបំរើបក្ស ដាក់មេឃុំបំរើរាស្ត្រ» របស់គណបក្សសង្រ្គោះជាតិ ត្រូវបានគណបក្សផ្សព្វផ្សាយកាលពីដើមខែមីនាកន្លងទៅ។ ការណ៍នេះបានធ្វើឱ្យគណបក្សប្រជាជនកម្ពុជាយល់ឃើញថាជាការប្រមាថដល់បេក្ខជនឃុំនៃគណបក្សរបស់ខ្លួន ហើយគណបក្សកាន់អំណាចក៏ធ្លាប់មានគម្រោងប្តឹងគណបក្សប្រឆាំងដែរ៕