ដោយ លោក សូរ្យ ជ័យឧត្ដម | ថ្ងៃអាទិត្យ ទី១៩ ខែមីនា ឆ្នាំ២០១៧
http://vodhotnews.com
យ៉ាងហោចណាស់មនុស្ស ៥នាក់បានស្លាប់ ហើយ ១៥នាក់ទៀតបានរងរបួស នៅក្នុងគ្រោះថ្នាក់ចរាចរណ៍កាលពីថ្ងៃម្សិលមិញនេះ ដែលធ្វើឲ្យតួលេខអ្នកស្លាប់ដោយសារគ្រោះថ្នាក់ចរាចរណ៍នៅខែមីនានេះ កើនឡើងដល់ជិត ១០០នាក់ហើយ។
របាយការណ៍នគរបាលចរាចរណ៍ ដែលផ្សាយនៅលើវេបសាយនគរបាលជាតិ បានបង្ហាញថា គ្រោះថ្នាក់ចរាចរណ៍ ៨ករណី បានកើតឡើងកាលពីថ្ងៃម្សិលមិញនេះ ដោយបានសម្លាប់មនុស្ស ៥នាក់ ហើយមនុស្ស ១៥នាក់ទៀតបានរងរបួស ក្នុងនោះ ៦នាក់រងរបួសធ្ងន់។
របាយការណ៍ដដែលនេះ បានឲ្យដឹងថា ក្នុងរយៈពេល ១៨ថ្ងៃដំបូងនៃខែមីនានេះ មនុស្សដល់ទៅ ៩៥នាក់ហើយ បានស្លាប់ និង ២៣៧នាក់ បានរងរបួស នៅក្នុងគ្រោះថ្នាក់ចរាចរណ៍សរុប ១៧៧ករណី នៅទូទាំងប្រទេសកម្ពុជា៕