Mon, 20 March 2017
មាស សុខជា
ភ្នំពេញប៉ុស្តិ៍
ភ្នំពេញៈ ក្រុមមន្ត្រីជាន់ខ្ពស់គណបក្សប្រឆាំងបានឱ្យដឹងកាលពីម្សិលមិញថាពាក្យស្លោកនយោបាយ «ដូរមេឃុំបម្រើបក្សដាក់មេឃុំបម្រើរាស្ត្រ» នោះគណបក្សមិនចាំបាច់ផ្លាស់ប្តូរទេ ខណៈពាក្យនេះមិនត្រូវបានប្រើប្រាស់ជាផ្លូវការក្នុងគោលនយោបាយរបស់បក្សនោះ។
អនុប្រធានគណបក្សសង្គ្រោះជាតិ (CNRP) លោក អេង ឆៃអ៊ាង និងលោកស្រី មូរ សុខហួរ បានបញ្ជាក់ថាគណបក្សសង្គ្រោះជាតិមិនមានគម្រោងផ្លាស់ប្តូរពាក្យស្លោកនយោបាយនេះទេដោយសារវាមិនទាន់ត្រូវបានអនុម័តដើម្បីដាក់ជាផ្លូវការទៅក្នុងគោលនយោបាយគណបក្សពេលសមាជវិសាមញ្ញកាលពីថ្ងៃទី ២ ខែមីនា នៅឡើយទេ ដោយលោកថា គណបក្សសង្គ្រោះជាតិគ្រាន់តែបានអនុម័តនូវគោលនយោបាយអាទិភាពចំនួន ៥ ចំណុចដើម្បីប្រើប្រាស់នៅក្នុងយុទ្ធនាការនយោបាយតែប៉ុណ្ណោះហើយពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្ត្រ» គ្រាន់តែបានលើកឡើងក្នុងផ្ទៃក្នុងរបស់គណបក្សប៉ុណ្ណោះ។
លោក ឆៃអ៊ាង បានបន្តថា៖ «ពាក្យស្លោកនេះអ្នកណាចង់ប្រើៗចុះ។ ដូច្នេះពាក្យស្លោក «ដូរមេឃុំបម្រើបក្ស ដាក់មេឃុំបម្រើរាស្ត្រ» យើងមិនត្រូវការអត្ថាធិប្បាយ ឬពន្យល់នោះទេពីព្រោះពួកគេ [សកម្មជន] យល់ដោយខ្លួនឯងអំពីពាក្យស្លោកនេះ។ ដូច្នេះអ្វីដែលគណបក្សត្រូវផ្តោតគឺគោលនយោបាយជាអាទិភាព»។ «ចំណែកឯពាក្យស្លោកអ្នកគាំទ្រប្រើៗទៅ។ នេះជាសិទ្ធិសេរីភាពរបស់គាត់។ គណបក្សមិនបង្ខំ មិនជំរុញថាត្រូវតែប្រើ ឬមិនប្រើនោះទេ។ បង្ខំយើងមិនបង្ខំឲ្យប្រើទេ។ ហាមឃាត់ក៏យើងមិនហាមឃាត់ទេ។ នេះជាសេរីភាពរបស់អ្នកគាំទ្រ»។
លោក ឆៃអ៊ាង បានបន្ថែមថាពាក្យស្លោកនោះគឺមិនចាំបាច់ផ្លាស់ប្តូរ ឬផ្លាស់ប្តូរគឺវាអាស្រ័យទៅលើប្រជាជន។ លោកថាបើទោះបីជាតុលាការបង្ខំឱ្យគណបក្សសង្គ្រោះជាតិផ្លាស់ប្តូរពាក្យស្លោកនេះក៏គណបក្សមិនដឹងថាផ្លាស់ប្តូរយ៉ាងម៉េចដែរពីព្រោះវាមិនបានដាក់បញ្ចូលនៅក្នុងគោលនយោបាយទេ។
លោកស្រី មូរ សុខហួរ ក៏បានថ្លែងដែរថា៖ «ជំហររបស់យើងគឺនៅដដែលនាពេលនេះ។
យើងមិនផ្លាស់ប្តូរពាក្យស្លោកនេះទេគឺពាក្យស្លោកគ្រាន់តែជាពាក្យស្លោក។ គោលនយោបាយបក្សគឺគោលនយោបាយបក្ស។ ពាក្យស្លោកនេះយើងមិនដែលធ្វើឲ្យរីកសាយនោះទេ។ យើងមិនដែលដើរ និងប្រកាសអំពីពាក្យស្លោកនេះទេ»។
លោកស្រីបានបញ្ជាក់ថា៖ «ពាក្យស្លោកគឺជាពាក្យស្លោកគោលនយោបាយគឺជាគោលនយោបាយវាមិនជាប់ពាក់ព័ន្ធគ្នាទេ» ហើយសូម្បីតែនៅក្នុងឯកសារក៏មិនទាន់បានព្រីនពាក្យស្លោកនេះសម្រាប់ការឃោសនាដែរ។
នៅពេលទាក់ទងពីម្សិលមិញអ្នកនាំពាក្យគណបក្សប្រជាជនកម្ពុជា (CPP) លោក សុខ ឥសាន បានថ្លែងថាប្រសិនបើគណបក្សសង្គ្រោះជាតិនិយាយដូច្នោះមានន័យថាមិនមានឆន្ទៈដើម្បីដកពាក្យស្លោកនេះចេញទេហើយអ្វីដែលគណបក្សសង្គ្រោះជាតិបានលើកឡើងគឺគណបក្សប្រជាជនមិនទាន់ជឿនៅឡើយទេ។
លោកបានបន្តថា៖ «ខ្ញុំមិនយល់ទេរង់ចាំសួរយោបល់ពីមេដឹកនាំរបស់ខ្ញុំជាមុនសិន។
ប្រសិនបើគាត់ [គណបក្សសង្គ្រោះជាតិ] បានធ្វើដូចនេះគឺគាត់មិនមានឆន្ទៈក្នុងការដក [ពាក្យស្លោក] នេះចេញទេ។ ដូច្នេះយើងមិនទាន់មានគោលការណ៍ជាក់លាក់ដើម្បីជឿជាក់ឲ្យបានច្បាស់លាស់ទេ ដោយសារតែគាត់និយាយម្តងឆ្វេងម្តងស្តាំ»។
លោក សុខ ឥសាន បានបន្ថែមថាគណបក្សប្រជាជនមិនអាចបង្ខំគណបក្សសង្គ្រោះជាតិឲ្យផ្លាស់ប្តូរពាក្យស្លោកនេះទេ ប៉ុន្តែដោយផ្អែកលើការពិតគណបក្សប្រជាជននៅតែរក្សាជំហរក្នុងការដាក់ពាក្យបណ្តឹងទៅកាន់តុលាការប្រសិនបើគណបក្សសង្គ្រោះជាតិមិនកែតម្រូវពាក្យស្លោកនេះ។
គួររំឭកដែរថានៅក្រោយពេលមានការលេចចេញនូវសារនយោបាយនេះមានមេឃុំ-សង្កាត់មកពីគណបក្សកាន់អំណាចមួយចំនួនបានចេញមុខតវ៉ា និងថ្កោលទោសចំពោះគណបក្សសង្គ្រោះជាតិដោយមានហៅសារនេះថាជាការប្រមាថ និងមើលមិនឃើញពីអ្វីដែលពួកគេបានធ្វើជូនពលរដ្ឋនៅតាមមូលដ្ឋានកន្លងមក៕ NS