ដោយ លោក សូរ្យ ជ័យឧត្ដម | ថ្ងៃអង្គារ ទី២១ ខែមីនា ឆ្នាំ២០១៧
http://vodhotnews.com
យ៉ាងហោចណាស់មនុស្សដល់ទៅ ៨នាក់បានស្លាប់ ហើយ ៣៣នាក់ទៀត បានរងរបួសធ្ងន់ស្រាល នៅក្នុងគ្រោះថ្នាក់ចរាចរណ៍កាលពីថ្ងៃម្សិលមិញនេះ ដែលជំរុញឲ្យតួលេខអ្នកស្លាប់ក្នុងគ្រោះថ្នាក់ចរាចរណ៍រយៈពេល ២០ថ្ងៃក្នុងខែមីនា កើនឡើងដល់ ១០៨នាក់ហើយ។
របាយការណ៍នគរបាលចរាចរណ៍ ដែលផ្សាយនៅលើវេបសាយនគរបាលជាតិកម្ពុជា បានបង្ហាញថា គ្រោះថ្នាក់ចរាចរណ៍ ១៩ករណី បានកើតឡើងកាលពីថ្ងៃម្សិលមិញនេះ ដោយបានសម្លាប់មនុស្ស ៨នាក់ ខណៈមនុស្ស ១៩នាក់រងរបួសធ្ងន់ និង១៤នាក់ទៀតរងរបួសស្រាល។
របាយការណ៍នេះ បានបន្ថែមទៀតថា គ្រោះថ្នាក់ចរាចរណ៍ចំនួន ២០៦ករណី បានកើតឡើងចន្លោះពីថ្ងៃទី ១ដល់ថ្ងៃ២០ ខែមីនានេះ ដោយបណ្តាលឱ្យមនុស្សស្លាប់ចំនួន ១០៨នាក់ និងរបួសធ្ងន់ស្រាលចំនួន ២៨១នាក់៕