ដោយ លោក សូរ្យ ជ័យឧត្ដម | ថ្ងៃពុធ ទី២២ ខែមីនា ឆ្នាំ២០១៧
http://vodhotnews.com
ដំរីព្រៃឈ្មោលមួយក្បាល ត្រូវបានគេប្រទះឃើញស្លាប់ នៅស្រុកកំពង់សីលា នៅព្រឹកថ្ងៃនេះ។ នេះដោយយោងតាមការចុះផ្សាយរបស់នគរបាលជាតិ។
បើតាមវេបសាយនគរបាលជាតិ ដំរីឈ្មោលនោះ ត្រូវបានគេប្រទះឃើញស្លាប់នៅក្នុងភូមិស្ទឹងច្រាល ស្ថិតក្នុងឃុំអូរបាក់រទេះ។
សេចក្ដីរាយការណ៍នោះ បានសន្និដ្ឋានថា ដំរីនោះត្រូវចរន្តអគ្គិសនីឆក់រហូតដល់ បន្ទាប់ពីទៅត្រដុសនឹងបង្គោលចែកចាយចរន្តអគ្គិសនី។
រូបថតនៅលើវេបសាយនគរបាលជាតិ បានបង្ហាញដំរីដ៏ធំនោះ ដេកស្ដូកស្ដឹងនៅជាប់នឹងបង្គោលចែកចាយចរន្តអគ្គិសនី ដែលបានដួលរលំទៅលើដី ស្ថិតក្នុងចំការធុរេនឯកជនមួយ៕