ឈាន ពិសិដ្ឋ ដែលត្រូវបណ្តេញចេញពីនគរបាលជាតិ។ រូបថត ហ្វេសប៊ុក
Tue, 11 April 2017
នៀម ឆេង
ភ្នំពេញប៉ុស្តិ៍
បន្ទាយមានជ័យៈ ភ្លាមៗបន្ទាប់ពីលោក ស ខេង រដ្ឋមន្ត្រីក្រសួងមហាផ្ទៃបានសម្រេចបណ្តេញនាយរងប៉ុស្តិ៍ច្រកទ្វារអន្តរជាតិប៉ោយប៉ែតលោក ឈាន ពិសិដ្ឋ ដែលល្បីឈ្មោះដោយសាររឿងដួលសន្លប់នៅពីមុខឡានលោក ម៉ង់ ពុទ្ធី កាលពីឆ្នាំមុនសាលាដំបូងខេត្តបន្ទាយមានជ័យកាលពីម្សិលមិញបានចេញដីកាបញ្ជាឲ្យជននេះចូលមកបង្ហាញខ្លួនពីបទ «ប៉ុនប៉ងឃាតកម្ម និងប្រើប្រាស់អាវុធខុសច្បាប់» បន្ទាប់ពីជននេះបានបាញ់ទៅលើអ្នករួមការងារម្នាក់កាលពីថ្ងៃអាទិត្យ ខណៈដែលជននេះបានរត់ភៀសខ្លួនទៅក្រៅប្រទេស។
បើតាមដីកាបញ្ជាឲ្យចូលខ្លួនរបស់សាលាដំបូងខេត្តបន្ទាយមានជ័យចេញកាលពីម្សិលមិញដោយព្រះរាជអាជ្ញាលោក មាស ច័ន្ទពិសិដ្ឋ បានសរសេរថាឲ្យឈ្មោះ ឈាន ពិសិដ្ឋ ចូលមកបង្ហាញខ្លួនឲ្យបានមុនថ្ងៃទី ៩ ខែសីហា ឆ្នាំ ២០១៧ នៅប៉ុស្តិ៍នគរបាលច្រកទ្វារអន្តរជាតិប៉ោយប៉ែតដើម្បីឆ្លើយបំភ្លឺពាក់ព័ន្ធនឹងករណីប៉ុនប៉ងឃាតកម្ម និងប្រើប្រាស់អាវុធខុសច្បាប់ប្រព្រឹត្តនៅក្នុងបរិវេណប៉ុស្តិ៍អន្តោប្រវេសន៍ ភូមិក្បាលស្ពាន ១ សង្កាត់ប៉ោយប៉ែត ក្រុងប៉ោយប៉ែតកាលពីថ្ងៃទី ៩ ខែមេសាឆ្នាំ ២០១៧។
លោក ខៀវ សុភ័គ អ្នកនាំពាក្យក្រសួងមហាផ្ទៃបានឲ្យដឹងថាលោក ស ខេង បានសម្រេចកាលពីរសៀលថ្ងៃម្សិលមិញបណ្តេញឈ្មោះ ឈាន ពិសិដ្ឋ ចេញពីក្របខ័ណ្ឌនគរបាលជាតិ ខណៈសមត្ថកិច្ចកម្ពុជាកំពុងសហការជាមួយប្រទេសមួយដែល ឈាន ពិសិដ្ឋ កំពុងស្នាក់នៅ។
លោកថា៖ «លោក (ស ខេង) បានណែនាំឲ្យនាយកដ្ឋានធ្វើការបណ្តេញចេញហើយលោក (ស ខេង) បានចុះហត្ថលេខាលើប្រកាសហ្នឹងហើយ ចំពោះវរសេនីយ៍ត្រី ឈាន ពិសិដ្ឋ ហ្នឹងដែលជានាយរងប៉ុស្តិ៍នគរបាលច្រកទ្វារប៉ោយប៉ែតហ្នឹងដោយដកហូតមុខតំណែង ឋានន្តរស័ក្តិ ហើយនិងបណ្តេញចេញផុតពីក្របខ័ណ្ឌនគរបាលជាតិព្រមទាំងបញ្ជូនខ្លួនទៅតុលាការដើម្បីធ្វើតាមនីតិវិធីច្បាប់»។
លោក សុភ័គ បន្តថាសមត្ថកិច្ចមិនអាចចាប់ ឈាន ពិសិដ្ឋ ភ្លាមៗបានទេដោយសារឈ្មោះនេះមានកាំភ្លើងក្នុងដៃ។ «ដូច្នេះក៏គេចបាត់ទៅបច្ចុប្បន្ននេះវានៅក្រៅប្រទេសតែមិនអាចប្រាប់ឈ្មោះប្រទេសបានទេហើយយើងក៏បានសុំសហការសមត្ថកិច្ចក្រៅប្រទេសដើម្បីចាប់ខ្លួនក្រោយពេលតុលាការចេញដីកាចាប់ខ្លួនរួចហើយ»។
ទោះយ៉ាងណាយោងតាមរបាយការណ៍របស់ប៉ុស្តិ៍ច្រកទ្វារព្រំដែនប៉ោយប៉ែតដែលបង្ហោះតាមហ្វេសប៊ុកកាលពីយប់ថ្ងៃអាទិត្យបានសរសេរថាកាំភ្លើងរបស់ ឈាន ពិសិដ្ឋ ត្រូវបានមន្ត្រីបម្រើការជាមួយគ្នាដកហូតភ្លាមៗនៅកន្លែងកើតហេតុ។
វិធានការលើមន្ត្រីនគរបាលរូបនេះធ្វើឡើងមួយថ្ងៃ បន្ទាប់ពីមានរបាយការណ៍មួយបញ្ជាក់ថានាយរងប៉ុស្តិ៍រូបនេះបានបាញ់ទៅលើមន្ត្រីនគរបាលបម្រើការងារជាមួយគ្នាដោយសារជម្លោះបុគ្គលកើតចេញពីពាក្យសម្តីមាក់ងាយគ្នា។
កាលពីព្រលប់ថ្ងៃអាទិត្យសារព័ត៌មាន Freshnews ដែលស្និទ្ធនឹងរដ្ឋាភិបាលបានបង្ហោះរបាយការណ៍ ២ ទំព័រដែលប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែតបានផ្ញើទៅអគ្គនាយកដ្ឋានអន្តោប្រវេសន៍។
របាយការណ៍នោះសរសេរថា នៅព្រឹកថ្ងៃទី ៩ ខែមេសា នៅពេលលោក សេម មករា នាយផ្នែករដ្ឋបាលបានហៅឈ្មោះ នៅ លីដា មន្ត្រីផ្នែករដ្ឋបាល និងឈ្មោះ កឹម កែវរក្សា មន្ត្រីប្រថាប់ត្រាឲ្យមកជួបគ្នាដើម្បីដោះស្រាយជម្លោះពាក្យសម្តី ដែលបានកើតឡើងកាលពីសប្តាហ៍មុននោះស្រាប់តែឈ្មោះ ឈាន ពិសិដ្ឋ នាយរងប៉ុស្តិ៍ក៏បានជិះឡានមកជាមួយឈ្មោះ កឹម កែវរក្សា។ ពេលមកដល់ឈ្មោះ ឈាន ពិសិដ្ឋ បានដកកាំភ្លើងខ្លីភ្ជង់លើលោក សេម មករា ប៉ុន្តែមិនទាន់មានការផ្ទុះអាវុធឡើយ។ លោក សេម មករា ក៏បានចូលក្នុងបន្ទប់វិញ។ បន្តិចក្រោយមកពេលលោក សេម មករា មកដល់មុខបន្ទប់ក៏ត្រូវឈ្មោះ ឈាន ពិសិដ្ឋ បាញ់ចំស័ក្តិពាក់លើស្មាដាច់ធ្លាក់មកលើឥដ្ឋ។ ពេលនោះមន្ត្រីធ្វើការជាមួយគ្នាបានឃាត់ និងដកអាវុធពី ឈាន ពិសិដ្ឋ។
ទោះបីរបាយការណ៍នេះរៀបរាប់យ៉ាងលម្អិតដូច្នេះក្តី ក៏ លោក ស៊ឹម សំអាតនាយប៉ុស្តិ៍ច្រកទ្វារអន្តរជាតិប៉ោយប៉ែតបានថ្លែងកាលពីម្សិលមិញថារបាយការណ៍ដែលបានបង្ហោះកន្លងមកមិនមែនជារបាយការណ៍របស់លោកទេ។ «ចេញពីប្រភពណាខ្ញុំមិនដឹងទេ។ របាយការណ៍នោះចុះលេខខុស អត់មានហត្ថលេខាខ្ញុំ ហើយខ្លឹមសារខុសពីរបាយការណ៍ដែលខ្ញុំបានដាក់ទៅអគ្គនាយកដ្ឋានអន្តោប្រវេសន៍»។
ប៉ុន្តែលោក ស៊ឹម សំអាត បដិសេធធ្វើអត្ថាធិប្បាយលើរបាយការណ៍របស់លោក។ លោក សេម មករា ដែលជាជនរងគ្រោះក្នុងរឿងនេះក៏បានបដិសេធធ្វើអត្ថាធិប្បាយផងដែរ។
អគ្គនាយកនៃអគ្គនាយកដ្ឋានអន្តោប្រវេសន៍លោកនាយឧត្តមសេនីយ៍ សុខ ផល បានថ្លែងថានេះជាករណីជម្លោះបុគ្គលមិនមែនស្ថាប័នទេ។ លោកថាស្ថាប័នមិនកាន់ជើងមនុស្សខិលខូចឡើយ «អង្គភាពគ្មានប៉ុនសរសៃសក់ណាទៅគាំទ្រអាមនុស្សខូចហ្នឹងទេ ត្រូវតែផ្ដន្ទាទោសហើយ»។
ឈាន ពិសិដ្ឋ ចាប់ផ្តើមល្បីនៅលើបណ្តាញសង្គមហ្វេសប៊ុក នៅពេលលោកមានរឿងចម្រូងចម្រាសជាមួយលោក ម៉ង៉ ពុទ្ធី ប្រធានសមាគមសេដ្ឋកិច្ចក្រៅប្រព័ន្ធ និងជាអតីតអនុប្រធានគណបក្សសង្គ្រោះជាតិ ក្រុងប៉ោយប៉ែតនៅពេលលោក ពិសិដ្ឋ ត្រូវបានគេជឿថាបានធ្វើពុតជាដួលសន្លប់នៅពីមុខឡានរបស់លោក ម៉ង់ ពុទ្ធី កាលពីខែធ្នូ ឆ្នាំមុន។
លោក សុខ ផល បញ្ជាក់ថារឿងដួលមុខឡាន និងរឿងថ្មីនេះមិនជាប់ពាក់ព័ន្ធគ្នាទេ «រឿងលើកមុនមិនមែនវាទៅវាយគេទេ។ រឿងលើកមុនថាវាដួល ល្បិចអីយ៉ាងម៉េចមិនដឹងទេគ្រាន់តែថាវាមិនមានប៉ះពាល់អីដល់គេ ប៉ុន្តែលើកនេះវាប៉ះពាល់គេ យើងត្រូវតែធ្វើតាមច្បាប់»៕
Contact author: នៀម ឆេង